މާލެއާއި ހުޅުލެއާ ދެމެދު އަޅުއްވާ، ޗައިނާ- މޯލްޑިވްސް ފްރެންޑްޝިޕް ބްރިޖާއެކު، ހުޅުލެއާއި ހުޅުމާލެ ގުޅުވައިދޭ މަގުވެސް ތަރައްޤީކުރައްވަން ސަރުކާރުން ވަނީ ނިންމަވާފައެވެ. ބްރިޖްގެ މަސައްކަތް ނިމުމުގެ ކުރިން މިމަގުގެ މަސައްކަތް ނިންމަވާލެއްވުމަކީ ސަރުކާރުގެ އަމާޒެވެ. އެގޮތުން މިއަހަރުގެ ތެރޭގައި ޢަމަލީ މަސައްކަތް ފެއްޓެވުމަށް ހައުސިންގ މިނިސްޓްރީން ގެންދަވަނީ ތައްޔާރުވެވަޑައިގަންނަވަމުންނެވެ.
ހުޅުލޭ ވައިގެ ބަނދަރާއި، ހުޅުމާލެ ގުޅުވައިދޭ މަގަކީ، މިހާރުވެސް ވަރަށް ގިނަ ރައްޔިތުން ބޭނުންކުރަމުން އަންނަ މަގެކެވެ. ނަމަވެސް ބްރިޖްގެ މަޝްރޫޢު ނިމި، ބްރިޖް ބޭނުންކުރަން ފެށުމުން މި މަގު ބޭނުންކުރާ މީހުންގެ އަދަދު އިތުރުވާނެތީ، ސަރުކާރުން ވަނީ މަގު އިތުރަށް ފުޅާކުރައްވައި، ތަރައްޤީކުރެއްވުމަށް ނިންމަވާފައެވެ. މަގުގެ ދިގު މިނުގައި 1.2 ކިލޯ މީޓަރު ހުންނައިރު، މިހާރުގެ ފުޅާމިނަކީ 10 ކިލޯ މީޓަރެވެ. ނަމަވެސް ބްރިޖްގެ ފުޅާމިނަށް މަގު ބަދަލުކުރައްވައި، ބްރިޖްގެ މަގުތައް ޑިޒައިން ކުރައްވާފައިވާ ގޮތަށް މި މަގުވެސް ހެއްދެވުމަށް ނިންމަވާފައިވާ ކަމަށް ހައުސިން މިނިސްޓަރ ޑރ މުޙައްމަދު މުޢިއްޒު ވިދާޅުވިއެވެ. ބްރިޖްގެ ފުޅާމިނަކީ، 20.3 ކިލޯ މީޓަރެވެ. އެހެންކަމުން ހުޅުލެ- ހުޅުމާލެ މަގުވެސް މި ފުޅާމިނަށް ބަދަލުވެގެންދާނެއެވެ.
ހައުސިން މިނިސްޓްރީން ވަނީ މި މަގު ހެއްދެވުމަށް ލަފާދޭނެ، ކޮންސަލްޓަންޓެއް ހޯއްދެވުމަށް ޢިއުލާންކުރައްވާފައެވެ. މިއާއެކު ޑިޒައިންގެ މަސައްކަތް ފެއްޓެވުމަށްވެސް ގެންދަވަނީ ތައްޔާރުވެވަޑައިގަންނަވަމުންނެވެ. މާލެ- ހުޅުލޭ ބްރިޖަކީ ސަރުކާރުން އެންމެ ބޮޑު އިސްކަންދެއްވައިގެން ކުރިއަށް ގެންދަވާ މަޝްރޫޢެވެ. އަދި މިއީ ދިވެހި ތާރީޚްގައިވެސް ރާއްޖޭގައި ކުރެވޭ އެންމެ ބޮޑު ސިވިލް އިންޖިނިއަރިންގެ މަސައްކަތެވެ. ބްރިޖްގެ ޢަމަލީ މަސައްކަތް ފެށިގެން ކުރިއަށްދާއިރު، ބްރިޖްގެ ޕްލެޓްފޯމްތައް ހެދުމުގެ މަސައްކަތް މިމަހުގެ 10 ވަނަ ދުވަހުގެ ނިޔަލަށް ނިންމާލެވޭނެ ކަމަށް މަސައްކަތުގެ ކޮންޓްރެކްޓަރ، ޗައިނާގެ ސީ.ސީ.ސީ.ސީ ސެކަންޑް ހާބަރ އިންޖިނިއަރިންއާ ޙަވާލާދެއްވައި ހައުސިންގ މިނިސްޓްރީން ވިދާޅުވެއެވެ. މާލެއާއި، ހުޅުލޭގައި ހަދާ މަގުތަކާއެކު، ބްރިޖްގެ ދިގުމިން ގާތްގަނޑަކަށް 2 ކިލޯ މިޓަރު ހުންނާނެއެވެ.