ސްވިމިން އެސޯސިއޭޝަން އޮފް މޯލްޑިވްސްގެ ފަސްވަނަ އިންތިޚާބު އަންނަ ޖޫން މަހުގެ އެއްވަނަ ދުވަހު ބާއްވަން ތާވަލުކޮށްފިއެވެ.
ސްވިމިން އެސޯސިއޭޝަންގެ ވެބްސައިޓުގައިވާ ގޮތުން ޖޫން މަހުގެ އެކެއްވާ ހޮނިހުރި ދުވަހު އިންތިޚާބު ބާއްވާއިރު، އެ އިންތިޚާބުގައި ވާދަކުރަން އެދޭ ފަރާތްތަކަށާއި މެންބަރުންނަށް މިހާރު ވަނީ ފުރުސަތު ހުޅުވާލާފައެވެ. އަދި އިންތިޚާބީ ޖަލްސާ ޒުވާނުންގެ މަރުކަޒުގެ ހަރުގޭގައި ބާއްވާއިރު، އެ ޖަލްސާގެ ރަޖިސްޓްރޭޝަން ފެށޭނީ އެ ދުވަހުގެ ހެނދުނު 10:30 ގައި ކަމަށްވެސް ވަނީ ބުނެފައެވެ. މީގެ އިތުރުން އިންތިޚާބުގެ ޤަވާއިދާއި ފޯމުތައް އެސޯސިއޭޝަނުގެ ވެބްސައިޓުން ޑައުންލޯޑް ކުރެވޭނެ ކަމަށްވެސް ސްވިމިން އެސޯސިއޭޝަނުން ވަނީ ބުނެފައެވެ.
ސްވިމިން އެސޯސިއޭޝަންގެ މިހާރުގެ ރައީސް މުޙައްމަދު އަބްދުލް ސައްތާރު (ޗަމްޕީ) އަންނަނީ އެ އެސޯސިއޭޝަންގެ ރައީސްގެ މަގާމު ތިންވަނަ ދައުރަކަށް ފުރިހަމަކުރައްވަމުންނެވެ. އެގޮތުން 2020 ވަނަ އަހަރުގެ ޖުލައި މަހު ބޭއްވި ސްވިމިން އެސޯސިއޭޝަންގެ ހަތަރުވަނަ އިންތިޚާބުގައި ރައީސްގެ މަގާމަށް ކުރިމަތިލެއްވީވެސް ސައްތާރު އެކަންޏެވެ. އެއާއެކު ސައްތާރު ތިންވަނަ ދައުރަކަށް ހޮވިވަޑައިގަތީ 48 ވޯޓާއެކުގައެވެ. ރައީސްގެ މަގާމަށް އޭނާ އެކަނި ކުރިމަތިލެއްވުމުން، ނަގާފައިވަނީ ފެންނަ ނުފެންނަ ވޯޓެކެވެ.
ދާދި ފަހުން ސައްތާރު ވަނީ އޭޝިއާ އެކުއަޓިކްސް ބިއުރޯއަށް އިންތިޚާބުކުރައްވާފައެވެ. މިއީ ރާއްޖޭގެ ބޭފުޅެއް އޭޝިއާ އެކުއަޓިކްސް ބިއުރޯއަށް އިންތިޚާބުވެވަޑައިގެންނެވި ފުރަތަމަ ފަހަރެވެ. މީގެ އިތުރުން ސައްތާރު އަންނަނީ މޯލްޑިވްސް އޮލިމްޕިކް ކޮމިޓީ (އެމްއޯސީ) ރައީސްގެ މަގާމު 2021 ވަނަ އަހަރުން ފެށިގެން ފުރުއްވަމުންނެވެ.