އެތުލެޓިކްސް އެސޯސިއޭޝަން އޮފް މޯލްޑިވްސްގެ އިންތިޚާބު އަންނަ މެއި މަހުގެ 24 ވަނަ ދުވަހު ބާއްވަން ނިންމައިފިއެވެ.
މި އިންތިޚާބުގައި މަގާމުތަކަށް ކުރިމަތިލުމަށް ހުޅުވާލަނީ އަންނަ އާދިއްތަ ދުވަހެވެ. އަދި ކުރިމަތިލުމުގެ ސުންގަޑިއަކީ އަންނަ މަހުގެ 15 ވަނަ ދުވަސް ކަމަށް އެތުލެޓިކްސް އެސޯސިއޭޝަނުން މައުލޫމާތުދެއެވެ. މީގެ އިތުރުން ކެންޑިޑޭޓުންގެ ނަންތައް ތަރުތީބުކުރާނީ މެއި މަހުގެ 17 ވަނަ ދުވަހެވެ.
އެތުލެޓިކްސް އެސޯސިއޭޝަންގެ ރައީސްގެ މަގާމުގައި މީގެ ކުރިން ހުންނެވި މުޙައްމަދު ޠަލާލް، ކޮމިޝަނަރ އޮފް ސްޕޯޓްސްގެ މަގާމަށް ވަޑައިގަންނަވަން ވަނީ އެ މަގާމުން އިސްތިއުފާދެއްވާފައެވެ. އޭނާ އިސްތިއުފާ ދެއްވުމުން އިންތިޚާބުގެ ނިޔަލަށް އެ އެސޯސިއޭޝަންގެ ހިންގުން ހަވާލުކުރެއްވީ ނައިބު ރައީސް އަޙްމަދު އަޒީލަށެވެ.
އެތުލެޓިކްސް އެސޯސިއޭޝަނުގެ މިހާރުގެ ހިންގާ ކޮމިޓީގެ ދައުރު މި އަހަރު ހަމަވާއިރު، ހަތް މަގާމަކަށް ބޭފުޅުން އިންތިޚާބު ކުރައްވާނެއެވެ. އޭގެ ތެރެއިން ރައީސާއި، ނައިބު ރައީސް އަދި ހަޒާންދާރުގެ މަގާމަށް ކުރިމަތިލެއްވޭނީ އެސޯސިއޭޝަންގެ މެންބަރު ކުލަބުތަކުގެ ތެރެއިން ކޮންމެވެސް އެއް ކުލަބެއްގެ ރުހުން ލިބިގެންނެވެ. އެތުލެޓިކްސް އެސޯސިއޭޝަނުން ބުނީ އެ އެސޯސިއޭޝަނުގެ ހިންގާ ކޮމިޓީގެ މަގާމުތައް ތަމްސީލުކުރާނީ ކުލަބުތަކުން ކަމަށެވެ. އަދި އެއް ކުލަބަކަށް އެއް މަގާމަށް ވުރެ އިތުރަށް ތަމްސީލުނުކުރެވޭނެ ކަމަށްވެސް ވަނީ ބުނެފައެވެ.