ސްވިމިން އެސޯސިއޭޝަން އޮފް މޯލްޑިވްސްގެ އެންމެ ބޮޑު އަމާޒަކީ ސަރުކާރުން ދޭ ފައިސާއަށް ބަރޯސާނުވުން ކަމަށް އެ އެސޯސިއޭޝަންގެ ނައިބު ރައީސް އިސްމާޢީލް ޢަލީ ވިދާޅުވެއްޖެއެވެ.
ޕީއެސްއެމުން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަކަދައްކަވަމުން އިސްމާޢީލް ވިދާޅުވީ ކުޅިވަރެއް އަމިއްލަ ފައިމައްޗަށް ތެދުވެވޭނީ އެ ކުޅިވަރަކަށް ސަރުކާރަކުން ކުރާ ޚަރަދު ނިމުމަކަށް އައުމުން ކަމަށެވެ. އެގޮތުން ހުޅުމާލޭގައި އަލަށް އަޅާ ސްވިމިން ޕޫލަށް ދޫކޮށްފައިވާ ބިމުގައި އެންމެ ފެންވަރު ރަނގަޅު ވަސީލަތް ގާއިމުކޮށް، އެ ތަނުން ކުޅިވަރަށް ނަފާ ހޯދޭނެ މަގެއް ހޯދައި، އަމިއްލަ ފައިމައްޗަށް ކޮޅަށް ތެދުވަން މަސައްކަތްކުރަމުން އަންނަ ކަމަށް ވިދާޅުވިއެވެ.
"ޕޫލް ޑިޒައިން ކުރުމުގައިވެސް އަޅުގަނޑުމެން އަމާޒުހިފީ އެ ކަމަށް. ހިންގާ ކޮމިޓީގައިވެސް ވަރަށް ބޮޑަށް މަޝްވަރާ ކުރެވިގެން، އެ ބޭފުޅުންގެވެސް ވަރަށް ބޮޑު އެހީތެރިކަމާއެކު އިރާދަކުރެއްވިއްޔާ އަޅުގަނޑުމެން ބޭނުންވާ ފެންވަރަށް، ވަރަށް ރަނގަޅަށް އެ ތަން ތަރައްގީވެގެންދާނެ.އިސްމާޢީލް ޢަލީ - ސްވިމިން އެސޯސިއޭޝަންގެ ނައިބު ރައީސް
އަލަށް ގާއިމުކުރާ ޕޫލްގެ ޑްޒައިނިން ނިންމާލުމަށްފަހު، ބޭރުގެ ތަޖުރިބާކާރުންނާއެކު ކޮންސެޕްޓާ ގުޅޭގޮތުން މަޝްވަރާކުރެވިގެންދިޔަ ކަމަށް އިސްމާޢީލް ވިދާޅުވިއެވެ. އަދި އައު ޕޫލް އާއެކު ފަރިތަކުރުމަށް ދިމާވާ ގޮންޖެހުންތަކަށް ނިމުމެއް އަންނާނެ ކަމަށާއި، އެ ފޫލް ގާއިމުވުމާއެކު މިހާރު ބޭނުންކުރަމުންދާ ޕޫލް އާންމު ރައްޔަތުންނަށް ވީހާވެސް ގިނަ ވަގުތަށް ހުޅުވާލެވިގެންދާނެ ކަމަށްވެސް ވިދާޅުވިއެވެ.
އިސްމާޢީލް ވިދާޅުވީ ޕޫލް ނިމިގެންދާއިރު ފެތުން ކުޅިވަރެއްގެ ގޮތުގައި ކުރިއަރައިދިޔުމުގެ ފުރިހަމަ ކެޕޭސިޓީ އާއި ގާބިލުކަން އެ އެސޯސިއޭޝަންގައި ހުންނާނެ ކަމަށެވެ.