މެއިމަހުގެ ދިހަވަނަ ދުވަހު ޕަބްލިކް ސަރވިސް މީޑިއާއިން ފާހަގަކުރާ ކުޑަކުދިންގެ ބްރޯޑްކާސްޓިންގ ދުވަހު ޚަބަރާބެހޭ ކަންކަމުގައި ބައިވެރިކުރާނެ ދަރިވަރުން ތަމްރީންކުރުމުގެ ޕްރޮގްރާމެއް މިއަދު ހިންގައިފިއެވެ.
ޢުމުރުން 8 އަހަރާއި 14 އަހަރާ ދެމެދުގެ ދަރިވަރުން ކިޔަވަމުން އަންނަ މާލޭގެ ހުރިހާ ސްކޫލަކުން ކުދިން ހިމެނޭހެން ޖުމްލަ 45 ދަރިވަރުންނާއެކު ނޫސްވެރިކަމާގުޅޭ ތަމްރީން ޕްރޮގްރާމެއް މިއަދު ވަނީ ޕީއެސްއެމްއިން ކުރިއަށް ގެންގޮސްފައެވެ. މި ތަމްރީން ސެޝަންގައި، ޚަބަރު ހެދުމާއި، ޓީވީއާއި ރޭޑިއޯއަށް ރިޕޯޓް ހެދުމާއި، ޚަބަރު ކިޔުމާ ގުޅޭގޮތުން ދަރިވަރުންނަށް މަޢުލޫމާތުދީފައިވެއެވެ.
ތާޖުއްދީން ސްކޫލްގައި މިއަދު ކުރިއަށްދިޔަ މި ސެޝަންގައި، ކުދިންނަށް ކިޔަވައިދެއްވީ، ޕީ.އެސް.އެމް ނިއުސް ޓީމުގެ ސީނިއަރ ސްޓާފުންނެވެ. ކުޑަކުދިންގެ ބްރޯޑްކާސްޓިންގ ދުވަހުގެ ގޮތުގައި މެއިމަހުގެ ދިހަވަނަ ދުވަސް ފާހަގަކުރުމަށް ނިންމައި، ޕީ.އެސް.އެމުން އެކަން އިޢުލާންކުރީ މާޗް 29 ވަނަ ދުވަހު ފާހަގަކުރި ޓީ.ވީ.އެމްގެ 38 ވަނަ އަހަރީ ދުވަހުގެ ހަފްލާގައެވެ.
ޕީ.އެސް.އެމްގެ ހުރިހާ ޗެނަލަކުން މެއިމަހުގެ ދިހަވަނަ ދުވަހު ގެނެސްދޭ، ހުރިހާ ޚަބަރުތަކުގައި ކުޑަކުދިން ބައިވެރިކުރުމަށް ބޮޑު އިސްކަމެއް ދިނުމަށް ވަނީ ހަމަޖެހިފައެވެ. އެގޮތުން ޚަބަރު ކިޔުމާއި، ޕްރޮގްރާމް ހުށައެޅުމާއި، ޕްރޮގްރާމް އުފެއްދުމާއި، ޚަބަރުތައް އުފެއްދުން ފަދަ އެތައް ކަމެއް ކުރުމުގެ ފުރުޞަތު ކުޑަކުދިންނަށް ލިބިގެންދާނެއެވެ.