ހައްދުންމަތިން ރައީސަށް ހޫނު މަރުޙަބާއެއް
-
ހައްދުންމަތީގެ 6 ރަށަކަށް ވަޑައިގަންނަވާނެ
-
ރައްޔިތުންނާއި، ކައުންސިލްތަކޢި އތމ ކޮމިޓީތަކާ ބައްދަލުކުރައްވާނެ
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހައްދުންމައްޗަށް ވަޑައިގަތުމުން އެއަތޮޅުން އެމަނިކުފާނަށް ހޫނު މަރުޙަބާއެއް ދަންނަވައިފިއެވެ.
ރައީސް ހައްދުންމައްޗަށް ވަޑައިގެންނެވީ މިއަދުއެވެ. މި ދަތުރުފުޅުގައި އެމަނިކުފާނާއެކު ސަރުކާރުގެ މަތީފަންތީގެ ވަފުދެއް ބައިވެރިވެވަޑައިގަންނަވައެވެ.
މި ދަތުރުފުޅަކީ ރައްޔިތުންނާ ގާތުން ބައްދަލުކުރެއްވުމަށް ރައީސުލްޖުމްހޫރިއްޔާ ކުރައްވަމުން ގެންދަވާ ދަތުރުފުޅެކެވެ. ރަމަޟާން މަހުގެ ކުރިން ވެސް އެމަނިކުފާނު ވަނީ ރާއްޖޭގެ އެކި އަތޮޅުތަކުގެ ރައްޔިތުންނާ ބައްދަލުކުރެއްވުމުގެ ގޮތުން ދަތުރުފުޅުކުރައްވާފައެވެ. މިއީ ރަމަޟާން މަހަށްފަހު އަތޮޅު ތެރެއަށް އެމަނިކުފާނު ކުރައްވާ ފުރަތަމަ ދަތުރުފުޅެވެ.
ރައީސްގެ މިދަތުރުފުޅުގައި ހައްދުންމަތީގެ 6 ރަށަކަށް ވަޑައިގެން އެރަށްރަށުގެ ރައްޔިތުންގެ އިތުރުން ކައުންސިލްތަކާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކާ ބައްދަލުކުރައްވާނެއެވެ. މި ބައްދަލުކުރެއްވުންތަކުގައި ރަށްރަށުގެ ތަރައްގީއަށް ބޭނުންވާ ކަންކަމާއި ރައްޔިތުން އެންމެ އެދޭ ކަންކަމާ ގުޅޭގޮތުން މަޝްވަރާ ކުރައްވާނެއެވެ.
ހައްދުންމަތީގެ ދަތުރުފުޅަށްފަހު ނުރަސްމީ ދަތުރުފުޅެއްގައި ރައީސުލްޖުމްހޫރިއްޔާ އައްޑޫ ސިޓީއަށް ވަޑައިގަންނަވާނެއެވެ. އެމަނިކުފާނު ވަޑައިގެންނެވުމަށް ހަމަޖެހިފައިވަނީ އެ ސިޓީގެ ހިތަދޫއަށެވެ.
ރައީސްގެ މި ދަތުރުފުޅު ނިންމަވާލެއްވުމަށްފަހު މާލެ ވަޑައިގެންނެވުމަށް ހަމަޖެހިފައިވަނީ އަންނަ ހޮނިހިރު ދުވަހުއެވެ.