ކެމްޕޭނަށް ރައީސް ޞާލިހު ފުވައްމުލައްކާއި އައްޑޫއަށް ފުރާވަޑައިގެންފި

މަޖިލިސް އިންތިޚާބުގެ ކެމްޕޭނަށް ކުރީގެ ރައީސް އަދި އެމްޑީޕީގެ އެޑްވައިޒަރު އިބްރާހިމް މުޙައްމަދު ޞާލިހު ފުވައްމަލަކު ސިޓީ އާއި އައްޑޫ ސިޓީއަށް ފުރާވަޑައިގެންފިއެވެ.

އެމަނިކުފާނުގެ މި ދަތުރުފުޅުގައި އެމްޑީޕީގެ ޗެއަރޕާސަން ފައްޔާޒް އިސްމާއިލް ވެސް ބައިވެރިވެވަޑައިގަންނަވައެވެ. މިއީ ރައީސް ޞާލިހު މަޖިލިސް އިންތިޚާބުގެ ކެމްޕޭނުގައި ފުވައްލުމަކާއި އައްޑުއަށް ކުރައްވާ ފުރަތަމަ ދަތުރުފުޅެވެ.

މަޖިލިސް އިންތިޚާބުގައި އެމްޑީޕީން 90 ދާއިރާއަކަށް ވާދަކުރާއިރު އެ ޕާޓީގެ ލީޑަރޝިޕުން އަންނަނީ ރާއްޖޭގެ އެކި ސަރަހައްދުތަކުގައި ކެމްޕޭނުގެ ހަރަކާތްތަކުގައި ބައިވެރިވަމުންނެވެ. އެގޮތުން ޕާޓީގެ ރައީސް އަބްދުﷲ ޝާހިދުއާއި ކުރީގެ ނައިބު ރައީސް ފައިސަލް ނަސީމް ވެސް ގެންދަވަނީ ކެމްޕޭން ދަތުރުތައް ކުރައްވަމުންނެވެ.

އެމްޑީޕީން ވަނީ މި ރަމަޟާން މަހުގެ ތެރޭގައި މާލެ ސަރަހައްދުގައި ޑޯޓުޑޯ ހަރަކާތްތައް ވެސް ކުރިއަށްގެންގޮސްފައެވެ.

ރައްޔިތުންގެ މަޖިލިސް އިންތިޚާބު އޮންނާނީ މި މަހުގެ 21 ވަނަ ދުވަހުއެވެ. މި އިންތިޚާބުގައި 93 ދާއިރާއަކަށް މެންބަރުން އިންތިޚާބު ކުރާނެއެވެ.