ކްރިކެޓް ބޯޑް އޮފް މޯލްޑިވްސް (ސީބީއެމް) އިން އިންތިޒާމުކޮށްގެން ބާއްވާ ރަމަޟާން ކްރިކެޓް ކާނިވަލުގެ ފަހު މުބާރާތް ކަމަށްވާ ކޮމްޕެނީ ޓޭޕްބޯލްގެ ފައިނަލް މެޗުގައި ލޮޓެމް ޝިޕިން (އަހިންޝަކާ) ބަލިކޮށް، މުބާރާތުގެ ޗެމްޕިއަންކަން ފްރެންޑްސް މޯލްޑިވްސްއިން ހޯދައިފިއެވެ.
ކުޅިވަރު އެކުވެނީގެ ކްރިކެޓް ދަނޑުގައި މިއަދު ހަވީރު ކުޅުނު ފައިނަލް މެޗު ފްރެންޑްސް މޯލްޑިވްސްއިން ކާމިޔާބުކޮށްފައިވަނީ ތިން ލަނޑުންނެވެ.
މި މެޗުގެ ގުރުދިމާވުމުން އަހިންޝަކާ ގަސްދުކުރީ ހޮވުމަށެވެ. އެއާއެކު ފްރެންޑްސް މޯލްޑިވްސް އެންމެ ފުރަތަމަ ކުޅެން އަރައި އަށް އޯވަރު ހަމަވިއިރު ހަތް ކުޅުންތެރިން ނުބައިވެގެން ވަނީ 105 ލަނޑު ހަދާފައެވެ. އެ ޓީމުން އެންމެ ރަނގަޅަށް ކުޅުނީ 17 ބޯޅައިން 49 ލަނޑު ހެދި ބަބިންއެވެ. ޖަވާބުގައި އަހިންޝަކާ ކުޅެން އަރައި އަށް އޯވަރު ހަމަވިއިރު ހަތަރު ކުޅުންތެރިން ނުބައިވެގެން ހެދުނީ 102 ލަނޑެވެ. އެ ޓީމުން އެންމެ ރަނގަޅަށް ކުޅެފައިވަނީ 15 ބޯޅައިން 31 ލަނޑު އެއްކުރި ސަމްޕަތު ދިނޭޝްއެވެ.
މި މެޗާއެކު މި އަހަރުގެ ރަމަޟާން ކްރިކެޓް ކާނިވަލުގެ ކުޅުން ނިމިގެންދިޔައިރު، މި އަހަރުވެސް ކާނިވަލުގައި ވަނީ ތިން މުބާރާތެއް ކުރިއަށްގެންގޮސްފައެވެ. އަދި މި ތިން މުބާރާތުގައި ޖުމްލަ 32 ޓީމެއް ވަނީ ވާދަކޮށްފައެވެ.