ޕީއެންއެފް އުފެއްދުމުގެ ޖަލްސާ ހުއްޓުވީ ހުއްދަ ނެތި ބާއްވަން އުޅުމުން: ފުލުހުން

ޕީޕަލްސް ނޭޝަނަލް ފްރަންޓް، ޕީއެންއެފް އުފެއްދުމަށް ޣިޔާސުއްދީން އިންޓަނޭޝަނަލް ސްކޫލުގައި ބާއްވަން އުޅުނު ޖަލްސާ ހުއްޓުވީ ހުއްދަ ނެތި ސްކޫލެއްގެ ހޯލުގައި އެ ޖަލްސާ ބާއްވަން އުޅުމުންކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.

ޕީއެންއެފްއިން ޕާޓީ އުފެއްދުމުގެ ޖަލްސާ ބާއްވަން މަސައްކަތްކުރީ އިލެކްޝަންސް ކޮމިޝަނުން އެ ހުއްދަ ދިނުމުންނެވެ. ނަމަވެސް އެ ޖަލްސާ ބާއްވަން ނިންމާފައި އޮތް ޣިޔާސުއްދީން ސްކޫލްގެ ހޯލް ދެވެން ނެތްކަމަށް އެ ސްކޫލުން އެންގުމާއި ގުޅިގެން އެތަނުގައި އެޖަލްސާ ބޭއްވޭ ގޮތް ވަނީ ނުވެފައެވެ. އަދި ފުލުހުން ވަނީ އެ ސްކޫލް ކައިރިއަށް ޖަމާވި މީހުން އެ ސަރަހައްދުން ދުރަށް ޖެއްސުމަށް މަސައްކަތްކޮށްފައެވެ. އެކަމާއި ގުޅިގެން ބައެއް ފަރާތްތަކުން ވަނީ ސަރުކާރުން ސިޔާސީ ހަރަކާތްތަކަށް ހުރަސް އަޅަމުންދާކަމަށް ތުހުމަތުކޮށްފައެވެ.

ފުލުހުންގެ ތަރުޖަމާނު އަހުމަދު ޝިފާން ވިދާޅުވީ ފުލުހުން ޣިޔާސުއްދީން އިންޓަރނޭޝަނަލް ސްކޫލު ކައިރީ ހަރަކާތްތެރިވީ އެސްކޫލުގައި ހުއްދަދީފައިނުވާ އެއްވުމަށް ބާއްވަން އުޅޭތީ އެކަން ހުއްޓުވައި، ސްކޫލް ރައްކާތެރިކުރުމަށް ސްކޫލްގެ ފަރާތުން ތައުލީމާބެހޭ ވުޒާރާގައި އެދިފައިވާތީ ކަމަށެވެ. އަދި އެ ވުޒާރާއިން އެކަން ތަންފީޒުކުރުމަށް، ފުލުހުންގެ އެހީތެރިކަމަށް އެދިފައިވާކަމަށްވެސް ޝިފާން ވިދާޅުވިއެވެ.

ޝިފާން ވިދާޅުވީ ޣިޔާސުއްދީން އިންޓަނޭޝަނަލް ސްކޫލުން ވަނީ ޖަލްސާ ބޭއްވުމަށް ޕީއެންއެފްއާއެކު ވެފައިވާ އެއްބަސްވުން ބާތިލުކޮށް އެކަން އެ ޕާޓީއަށް އަންގާފައިކަމަށެވެ. ނަމަވެސް އެއްބަސްވުން ބާތިލު ކުރުމުންވެސް ޖަލްސާ ބާއްވަން މަސައްކަތް ކޮށްފައިވާކަމަށް ޝިފާން ވިދާޅުވިއެވެ. އެހެންކަމުން އެކަން ފުލުހުން ހުއްޓުވާފައިވާކަމަށް ފުލުހުން ވިދާޅުވެއެވެ. އަދި ގާނޫނާއި ގަވާއިދުތަކުގެ ތެރެއިން ކުރިއަށްގެންދާ ސިޔާސީ ހަރަކާތްތަކަށް ފުލުހުންގެ ފުރިހަމަ އެއްބާރުލުން ލިބޭނެކަމަށްވެސް އެ މުއައްސަސާއިން ވިދާޅުވެއެވެ.

ޕީއެންއެފް އުފެއްދުމަށް ބާއްވަން އުޅުނު ޖަލްސާއަށް ހުރަސް އެޅި ކަމަށް ބުނެ ދައްކާ ވާހަކަތައް ސަރުކާރުންވެސް ވަނީ ދޮގުކޮށްފައެވެ. އަދި ޣިޔާސުއްދީން ސްކޫލްގައި އެ ޖަލްސާ ބޭއްވެން ނެތުމުން، ޕީއެންއެފްގެ ޖަލްސާ ބާއްވާނެ ތަނެއް ވަގުތުން ހަމަޖައްސައި ދީފައިވާކަމަށް ސަރުކާރުން ވިދާޅުވެއެވެ.

ސަރުކާރުން ވިދާޅުވީ ޤާނޫނީ ހަމަތަކުގެ މަތީން ހިންގާ ސިޔާސީ ކޮންމެ ޙަރަކާތަކަށްވެސް ފަހިކޮށްދެވެން އޮތް ކޮންމެ ކަމެއް ކުރިމަގުގައިވެސް ހެޔޮ ނިޔަތާއެކު މި ސަރުކާރުން ދާނީ ފަހިކޮށްދެމުންކަމަށެވެ. އަދި މި ސަރުކާރުން އަބަދުވެސް ކުރިއަށް ދާނީ ސިޔާސީ ޙަރަކާތްތަކަށް ޖާގަދީގެން، ޤައުމުގެ ކުރިއެރުމާއި ރައްޔިތުންނަށް ލާބަޔާ މަންފާ ހޯދައިދިނުމުގެ ވިސްނުން އިސްކޮށްގެންކަމަށްވެސް ސަރުކާރުން ވިދާޅުވެއެވެ.

ސްކޫލުގައި ހުއްދަނެތި ޖަލްސާ ބާއްވަން އުޅުމުން އެކަން ފުލުހުން ހުއްޓުވުމުން ޕީއެންއެފް އުފެއްދުމުގެ ޖަލްސާ ބާއްވާފައިވަނީ ރާޅުގަނޑު ސަރަހައްދުގައި ހުންނަ ބްރިޖް ވިއު ޕްލެޓްފޯމުގައެވެ. އެތަނުގައި ބޭއްވި ޖަލްސާގައި ވަނީ ޕާޓީގެ ލޯގޯ އާއި ކުލަ އާއި ސިއްކަ އަދި އަސާސީ ގަވާއިދު ވަނީ ފާސްކޮށްފައެވެ.

މި ޖަލްސާގައި ޕާޓީގެ ދާއިމީ ސެނެޓް އިންތިޚާބު ވަންދެން 20 މެންބަރުންގެ ވަގުތީ ސެނެޓެއް ހޮވައި، ނަންތައް ފާސްކޮށްފައިވާއިރު ޕާޓީގެ ވަގުތީ ރައީސްގެ މަގާމަށް އައްޔަންކުރައްވާފައިވަނީ ކުރީގެ ރައީސް އަބްދުﷲ ޔާމީންގެ ދަރިކަލުން ޒެއިން އަބްދުﷲ ޔާމީންއެވެ.