ކްރިކެޓް ބޯޑް އޮފް މޯލްޑިވްސް (ސީބީއެމް) އިން އިންތިޒާމުކޮށްގެން ބާއްވާ ރަމަޟާން ކްރިކެޓް ކާނިވަލުގެ ފަހު މުބާރާތް ކަމަށްވާ ކޮމްޕެނީ ޓޭޕްބޯލްގެ ފައިނަލަށް ފްރެންޑްސް މޯލްޑިވްސް އާއި ލޮޓެމް ޝިޕިން (އަހިންޝަކާ) ދަތުރުކޮށްފިއެވެ.
ކުޅިވަރު އެކުވެނީގެ ކްރިކެޓް ދަނޑުގައި ކުރިއަށްދާ މި މުބާރާތުގައި މިއަދު ހަވީރު ކުޅުނު ސެމީ ފައިނަލް ފުރަތަމަ މެޗުން ފްރެންޑްސް މޯލްޑިވްސް މޮޅުވީ އެންމެ ފަހުގެ ޗެމްޕިއަން ފަތަހަ ސްޓާސްއާ ވާދަކޮށް 50 ލަނޑުންނެވެ.
މި މެޗުގެ ގުރުދިމާވުމުން ފަތަހަ ގަސްދުކުރީ ހޮވުމަށެވެ. އެއާއެކު ފްރެންޑްސް މޯލްޑިވްސް އެންމެ ފުރަތަމަ ކުޅެން އަރައި އަށް އޯވަރު ހަމަވިއިރު ތިން ކުޅުންތެރިން ނުބައިވެގެން ވަނީ 143 ލަނޑު ހަދާފައެވެ. އެ ޓީމުން އެންމެ ރަނގަޅަށް ކުޅުނީ އަށް ބޯޅައިން 33 ލަނޑު ހެދި ބަބިން އާއި، 13 ބޯޅައިން 32 ލަނޑު އެއްކުރި މުޙައްމަދު ޝަމީމެވެ. ޖަވާބުގައި ފަތަހަ ކުޅެން އަރައި އަށް އޯވަރު ހަމަވިއިރު ތިން ކުޅުންތެރިން ނުބައިވެގެން ހެދުނީ 93 ލަނޑެވެ. އެ ޓީމުން އެންމެ ރަނގަޅަށް ކުޅެފައިވަނީ ނުބައިނުވެ 21 ބޯޅައިން 37 ލަނޑު ހެދި ކައުސަރު އަޙްމަދެވެ.
މީގެ އިތުރުން މި މުބާރާތުގައި މިއަދު ހަވީރު ކުޅުނު ސެމީ ފައިނަލް ދެވަނަ މެޗުން އަހިންޝަކާ މޮޅުވީ އެސްޓީއޯ ރެކްރިއޭޝަން ކުލަބާ ވާދަކޮށް ހަތަރު ވިކެޓުންނެވެ.
މި މެޗުގެ ގުރުދިމާވުމުން އަހިންޝަކާ ގަސްދުކުރީ ހޮވުމަށެވެ. އެއާއެކު އެސްޓީއޯ އެންމެ ފުރަތަމަ ކުޅެން އަރައި އަށް އޯވަރު ހަމަވިއިރު އަށް ކުޅުންތެރިން ނުބައިވެގެން ހެދުނީ 98 ލަނޑެވެ. އެ ޓީމުން އެންމެ ރަނގަޅަށް ކުޅުނީ 14 ބޯޅައިން 31 ލަނޑު ހެދި ކަމްރުލްއެވެ. ޖަވާބުގައި އަހިންޝަކާ ކުޅެން އަރައި ވަނީ ފަހު ބޯޅައިގައި ތިން ކުޅުންތެރިން ނުބައިވެގެން 99 ލަނޑު ހަދައި މެޗު ކާމިޔާބުކޮށްފައެވެ. އެ ޓީމުން އެންމެ ރަނގަޅަށް ކުޅެފައިވަނީ 19 ބޯޅައިން 35 ލަނޑު އެއްކުރި ތަރަކަ ރުވާންއެވެ.
މި ނަތީޖާއާއެކު މުބާރާތުގެ ފައިނަލަށް ފްރެންޑްސް މޯލްޑިވްސް އާއި އަހިންޝަކާ ދަތުރުކުރިއިރު، ފައިނަލް މެޗު ކުޅުމަށް ހަމަޖެހިފައިވަނީ މާދަމާ ހަވީރެވެ.