އެފްއޭއެމްއިން މަނީލޯންޑަރ ކުރިކަމަށް ތުހުމަތުކުރެވޭ މައްސަލައިގެ ތަހުގީގު އަވަސްކުރަން މަޝްވަރާކޮށްފި

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން މަނީލޯންޑަރ ކުރިކަމަށް ތުހުމަތު ކުރެވިގެން ދިވެހި ފުލުހުންގެ ޚިދުމަތުން ތަހުގީގުކުރަމުންދާ މައްސަލައިގައި މަސައްކަތްކުރައްވާ އިންވެސްޓިގޭޓަރުންނާ ޕްރޮސިކިއުޓަރ ޖެނެރަލް ބައްދަލުކުރައްވައި، ތަހުގީގު އަވަސްކުރުމާ ގުޅޭގޮތުން މަޝްވަރާކުރައްވައިފިއެވެ.

އެފްއޭއެމްގެ ރައީސް ބައްސާމް އަދީލް ޖަލީލްގެ މައްޗަށް ޕްރޮސެކިއުޓަރ ޖެނެރަލްގެ އޮފީހުން މީގެ ކުރިން ވަނީ ދެ ދައުވާއެއް އުފުލާފައެވެ. އެގޮތުން ބައްސާމްގެ މައްޗަށް އުފުލާފައިވަނީ ޚިޔާނާތްތެރިވުމާއި މަނީލޯންޑަރިންގެ ދައުވާއެވެ. މިއީ އެފްއޭއެމަށް އެކި ފަރާތްތަކުން ދޭ ފައިސާއަށް ޚިޔާނާތްތެރިވެ، އިތުރު ކުށުގެ އަމަލުތަކެއް ހިންގާކަމަށް ތުހުމަތުކުރެވޭ މައްސަލައިގައި ދައުލަތުން އޭނާގެ މައްޗަށް އުފުލާފައިވާ ދެ ދައުވާއެކެވެ.

މީގެ ކުރިން ޕީޖީ އޮފީހުން ވަނީ އެފްއޭއެމުގެ އިސްވެރިންތަކެއް ފައިސާއަށް ޚިޔާނާތްތެރިވެ، އިތުރު ކުށުގެ އަމަލުތައް ހިންގާކަމަށް ތުހުމަތުކުރެވޭ މައްސަލަ، ދިވެހި ފުލުހުންގެ ޚިދުމަތުން ބަލަމުންދަނީ ޕްރޮސެކިއުޓަރ ޖެނެރަލްގެ އަމުރަކަށް ކަމަށް ބުނެފައެވެ. އަދި މި މައްސަލައިގެ ތަހުގީގު އަދިވެސް ކުރިއަށްދާ ކަމަށާއި، ތަހުގީގުތައް ނިމެމުންދާ ވަރަކަށް އިތުރު ބައިތަކާ ގުޅިގެން ދައުވާ ކުރަންޖެހޭ މީހުންގެ މައްޗަށް ދައުވާކުރާނެ ކަމަށްވެސް ވަނީ ބުނެފައެވެ.

އެއާއެކު މި މައްސަލައިގައި މަސައްކަތްކުރައްވާ އިންވެސްޓިގޭޓަރުންނާ ޕްރޮސިކިއުޓަރ ޖެނެރަލް މިއަދު ބައްދަލުކުރެއްވިއިރު، މިބައްދަލުވުމުގައި ވަނީ އެ މައްސަލައިގައި މިހާރު ބާކީ ނުނިމި ހުރި މަސައްކަތްތަކަކީ ކޮބައިކަމާއި، އެ މަސައްކަތްތައް ނިންމާނެ ގޮތުގެ ވަގުތު ރޮނގަކާބެހޭ ގޮތުން މަޝްވަރާކޮށްފައެވެ.

އަދި މި މަސައްކަތުގައި ދައުލަތުގެ އިދާރާތަކުން ބޭނުންވާ އެހީތެރިކަން ހޯދޭނެ ގޮތްތަކާއި، މި މައްސަލައިގައި މިހާތަނަށް ލިބިފައިވާ ހެކިތައް ޕްރޮސިކިއުޓަރ ޖެނެރަލްގެ އޮފީހަށް ހުށަހަޅައި، ޕްރޮސިކިއުޓަރުން އެ ހެކިތައް ދިރާސާކޮށް، އިތުރަށް ހޯދައި ފުރިހަމަކުރަންޖެހޭ ކަންކަމަކީ ކޮބައިކަމާބެހޭ ގޮތުން މަޝްވަރާކޮށް، ގޮތްތަކެއްވެސް ވަނީ ނިންމާފައެވެ. އޭގެ ތެރޭގައި މި މައްސަލައިގައި އިތުރަށް ތުހުމަތުކުރެވޭ މީހުންގެ ބައިތަކުގައި ތުހުމަތު އިއްވައި، ބަޔާން ނެގުމާބެހޭ ގޮތުންވެސް ވަނީ މަޝްވަރާކޮށްފައެވެ.

މިއަދުގެ ބައްދަލުވުމުގައި ދެ ފަރާތުން އެއްބަސްވެފަވަނީ ފުލުހުން މިމައްސަލައިގައި ކުރައްވަން ހުރި މަސައްކަތްތައް ނިންމަވައި، ވީހާވެސް އަވަހަކަށް، ދައުވާކުރުމާމެދު ގޮތެއް ނިންމުމަށް ޕީޖީ އޮފީހަށް ހުށަހެޅުމަށެވެ.

އެފްއޭއެމްގެ ރައީސް ބައްސާމުގެ މައްޗަށް ޕީޖީ އޮފީހުން މީގެ ކުރިން ދެ ދައުވާއެއް އުފުލާފައިވާއިރު، އެ ކުށް ސާބިތުވެއްޖެނަމަ 100,000 (އެއް ލައްކަ) ރުފިޔާއާއި 1,000,000 (އެއް މިލިޔަން) ރުފިޔާއާ ދެމެދުގެ އަދަދަކުން ޖޫރިމަނާ ކުރުމާއެކު ފަސް އަހަރާއި 15 އަހަރާއި ދެމެދުގެ މުއްދަތަކަށް ޖަލަށްލުން ހިމެނެއެވެ.