އެފްއޭއެމް ވެޓެރަންސް ލީގު 2024 ގައި ފަހަތުން އަރައި މުއިވެޔޮ ފްރެންޑްސް ބަލިކޮށް، އެންމެ ފަހުގެ ރަނަރަޕް ދަ ގްރާންޑޭ ސްޕޯޓްސް ކުލަބުން ދެވަނަ މޮޅު ހޯދައިފިއެވެ.
ހެންވޭރު ދަނޑުގައި ކުރިއަށްދާ މި މުބާރާތުގައި މިއަދު ހަވީރު ކުޅުނު ގްރޫޕް ބީގެ މެޗު ދަ ގްރާންޑޭއިން ކާމިޔާބުކުރީ ފަހު ވަގުތު ޖެހި ލަނޑާއެކު 3-2 ގެ ނަތީޖާއަކުންނެވެ.
މި މެޗުގައިވެސް މުއިވެޔޮ ޓީމުގެ ކެޕްޓަން ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވަނީ ކުޅުއްވާފައެވެ. މި މެޗުގެ ފުރަތަމަ ހާފު މުއިވެޔޮ ޓީމުން ޑޮމިނޭޓުކޮށް ގިނަ ހަމަލާތަކެއް އުފެއްދި ނަމަވެސް، މި ހާފުގެ ފަހު މިނެޓުގައި ދަ ގްރާންޑޭއިން ވަނީ ލީޑު ނަގާފައެވެ. ކައުންޓަރ އެޓޭކެއްގައި އުފެއްދި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ހޫދު ނާޒިރެވެ.
އެކަމަކު މުއިވެޔޮ ޓީމުން ވަނީ ދެވަނަ ހާފު ފަށައިގެން ރަނގަޅު ކުޅުމެއް ދައްކައި، އެ ޓީމު ކޮޅަށް ނަތީޖާ އަނބުރާލާފައެވެ. އެގޮތުން މެޗުގެ 44 ވަނަ މިނެޓުގައި ކޯނަރަކުން އަބްދުﷲ ޝުޖާއު ވަނީ މުއިވެޔޮއަށް ނަތީޖާ އެއްވަރުކޮށްދީފައެވެ. އަދި އޭގެ ތިން މިނެޓު ފަހުން އަޙްމަދު ސައީދު (އައްމަޓީ) ވަނީ ލަނޑެއް ޖަހައި، މުއިވެޔޮއަށް ލީޑު ނަގައިދީފައެވެ.
މި މެޗުގައި ދަ ގްރާންޑޭއިން ނަތީޖާ އެއްވަރުކުރީ މެޗު ނިމެން ފަސް މިނެޓަށް ވެފައި ވަނިކޮށެވެ. ހިލޭ ޖެހުމަކުން މި ލަނޑު އެ ޓީމަށް ކާމިޔާބުކޮށްދިނީ އިބްރާހީމް ޒައީމެވެ. އަދި މެޗުގެ އިތުރު ވަގުތުގައި މުއިވެޔޮގެ ގޯލްކީޕަރު ހެދި ގޯހެއްގެ ފައިދާ ނަގައި، އިބްރާހީމް ޒައީމް ވަނީ ދަ ގްރާންޑޭއަށް އަލުން ލީޑު ނަގައިދީފައެވެ.
މި މެޗުން ދަ ގްރާންޑޭ މޮޅުވިއިރު، މުބާރާތުގައި ކުޅުނު ފުރަތަމަ މެޗުން އެ ޓީމު ވަނީ މޯލްޑިވްސް ސޮކަރ މޭޓްސް (އެމްއެސް މޭޓްސް) އަތުން ފަހަތުން އަރައި 2-1 ގެ ނަތީޖާއަކުން މޮޅުވެފައެވެ.
40 އަހަރުން މަތީގެ ކުޅުންތެރިންނަށް ޚާއްސަކޮށްގެން ބާއްވާ ވެޓެރަންސް ލީގު މި ފަހަރު ކުރިއަށްދަނީ 10 ޓީމުގެ މެދުގައެވެ. ދެ ގްރޫޕަކަށް ބަހާލައިގެން މުބާރާތުގެ ކުޅުން ކުރިއަށްދާއިރު، ދަ ގްރާންޑޭ އާއި މުއިވެޔޮ އާއި، އެމްއެސް މޭޓްސްގެ އިތުރުން ގްރޫޕް ބީގައި ހިމެނެނީ ލެގޫންސް ސްޕޯޓްސް ކުލަބު އަދި ކުލަބު ސްޓެލްކޯއެވެ. އަދި ގްރޫޕް އޭގައި ހިމެނެނީ އެންމެ ފަހުގެ ޗެމްޕިއަން ހުޅުމާލެ ވެޓެރަންސް އާއި ވިލިމާލެ ޔުނައިޓެޑާއި، ޕޮލިސް ކުލަބާއި، ހުއްރިއްޔާ އަދި ދިވެހި ސިފައިންގެ ކުލަބެވެ.