ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ އިންތިޚާބު މި މަހުގެ 26 ވަނަ ދުވަހަށް ފަސްކޮށް، ހިންގާ ކޮމިޓީން ހުސްވެފައިވާ މަގާމުތަކަށް ކުރިމަތިލުމަށް އަލުން ހުޅުވާލައިފިއެވެ.
މިއީ ވީއޭއެމުގެ އިންތިޚާބު ފަސްކުރި ދެވަނަ ފަހަރެވެ. އެގޮތުން މި މަހުގެ ކުރީކޮޅު ބޭއްވި ވީއޭއެމުގެ ހިންގާ ކޮމިޓީގެ ބައްދަލުވުމުގައި ވަނީ އިންތިޚާބީ ކޮންގްރެސް މިދިޔަ ހުކުރު ދުވަހު ބޭއްވުމަށް ނިންމާފައެވެ. އެކަމަކު ބައެއް ކަންކަން ފުރިހަމަވެފައި ނެތުމުން މި މަހުގެ ތިންވަނަ ދުވަހު ކޮމިޝަނަރ އޮފް ސްޕޯޓްސް މުޙައްމަދު ޠަލާލް ފޮނުއްވި ސިޓީގައި ވަނީ އެ އެސޯސިއޭޝަނުގެ އިންތިޚާބުގެ ކަންކަން ކުރިއަށްގެންދިޔުމާ ގުޅޭގޮތުން މޯލްޑިވްސް އޮލިމްޕިކް ކޮމިޓީ (އެމްއޯސީ) އާއި ސްޕޯޓްސް ކައުންސިލް ހިމެނޭ ގޮތަށް ހިންގާ ކޮމިޓީއާއެކު ބައްދަލުވުމެއް ހަމަޖައްސައި، ގޮތްތަކެއް ނިމެންދެން އިންތިޚާބުގެ ކަންކަން މަޑުޖައްސާލުމަށް އެދިފައެވެ.
އޭގެ ފަހުން މި މަހުގެ 12 ވަނަ ދުވަހުގެރޭ ބޭއްވި މިރޭ އެކްސްޓްރާ އޯޑިނަރީ ކޮންގްރެސްގައި ވަނީ ހަތަރު ދުވަހަށް އިންތިޚާބު ފަސްކޮށް، މާދަމާ އިންތިޚާބު ބޭއްވުމަށް ބައިވެރި މެންބަރު ކުލަބުތަކުގެ އަގުލަބިއްޔަތުން ފާސްކޮށްފައެވެ. ނަމަވެސް އެ ކޮންގްރެސްގައި ނިންމި ނިންމުންތައް ބަލައިނުގަންނަކަން ސްޕޯޓްސް ކޮމިޝަނަރު ވަނީ ނިންމާފައެވެ. އޭގެ ފަހުން އެމްއޯސީ އާއި ސްޕޯޓްސް ކައުންސިލް ހިމެނޭ ގޮތަށް ބޭއްވި ބައްދަލުވުމެއްގައި ވަނީ ވީއޭއެމުގެ އޮޑިޓުގެ މަސައްކަތް ކުރަަން މުހުލަތެއްދިނުމަށްފަހު، ގާނޫނީ ގޮތުން ދެން ފުރިހަމަވާން ޖެހޭ ކަންކަންވެސް ފުރިހަމަކޮށް، ހުސްވެފައިވާ ހިންގާ ކޮމިޓީގެ މަގާމުތަކަށް މެންބަރުން އިންތިޚާބުކުރުމުގެ ފުރުސަތު ދީފައެވެ.
އެއާއެކު ވީއޭއެމުން މިއަދު ބޭއްވި ހިންގާ ކޮމިޓީގެ ބައްދަލުވުމުގައި ވަނީ މީގެ ކުރިން ބާއްވަން މަސައްކަތްކުރި އިންތިޚާބުގެ ކަންކަން ބާތިލުކުރުމަށާއި، އައު އިންތިޚާބެއް މި މަހުގެ 26 ވަނަ ދުވަހުގެރޭ ބޭއްވުމަށް ނިންމާފައެވެ. އަދި އިންތިޚާބު ބާއްވަން މީގެ ކުރިން ކުރި އިއުލާން ބާތިލުކޮށް، މަގާމުތަކަށް ކުރިމަތިލާން ކުރި އިއުލާންވެސް ބާތިލުކުރުމާއެކު، ހިންގާ ކޮމިޓީން ހުސްވެފައިވާ މަގާމުތަކަށް ކުރިމަތިލުމަށް އަލުން ވަނީ ހުޅުވާލާފައެވެ. އެގޮތުން މަގާމުތަކަށް ކުރިމަތިލުމުގެ ފުރުސަތު މި މަހުގެ 24 ވަނަ ދުވަހުގެ މެންދުރުފަހު 14:00 ގެ ނިޔަލަށް ވަނީ ހުޅުވާލާފައެވެ.
މީގެ ކުރިން ވީއޭއެމުން ބާއްވަން މަސައްކަތްކުރި އިންތިޚާބުގައި ހުސްވެފައިވާ އެ އެސޯސިއޭޝަނުގެ ރައީސްގެ މަގާމަށް ކުރިމަތިލެއްވި ހަމައެކަނި ބޭފުޅަކީ ކުރީގެ ރައީސް މުޙައްމަދު ލަތީފެވެ. ވީއޭއެމުގެ ރައީސްގެ މަގާމަށް 2021 ވަނަ އަހަރުގެ އޭޕްރީލް މަހުގެ ތެރޭގައި އިންތިޚާބުވެވަޑައިގެންނެވި މުޙައްމަދު ރަނޭޝް (ރަނޭ) ވަނީ މިދިޔަ މަހުގެ ފަހުކޮޅު މަގާމުން އިސްތިއުފާދެއްވާފައެވެ.