ކްރިކެޓް ބޯޑް އޮފް މޯލްޑިވްސް (ސީބީއެމް) އިން އިންތިޒާމުކޮށްގެން ބާއްވާ ރަމަޟާން ކްރިކެޓް ކާނިވަލުގެ ފުރަތަމަ މުބާރާތް ކަމަށްވާ އޯޕަން ޓޭޕްބޯލްގައި މިއަދު ކުޅުނު މެޗުތަކުން ކަރުދާސް ކްރިކެޓް ކުލަބާއި އޭއާރްސީ މޮޅުވެއްޖެއެވެ.
ކުޅިވަރު އެކުވެނީގެ ކްރިކެޓް ދަނޑުގައި މިއަދު ހަވީރު ކުޅުނު ގްރޫޕް ސީގެ ފުރަތަމަ މެޗުން ކަރުދާސް ކްރިކެޓް ކުލަބު މޮޅުވީ ސީބީއެމްއާ ބައްދަލުކޮށް 36 ލަނޑުންނެވެ
މި މެޗުގެ ގުރުދިމާވުމުން ސީބީއެމް ގަސްދުކުރީ ހޮވުމަށެވެ. އެއާއެކު ކަރުދާސް ކްރިކެޓް ކުލަބު އެންމެ ފުރަތަމަ ކުޅެން އަރައި އަށް އޯވަރު ހަމަވިއިރު އެންމެ ކުޅުންތެރިއަކު ނުބައިވެގެން ވަނީ 127 ލަނޑު ހަދާފައެވެ. އެ ޓީމުން އެންމެ ރަނގަޅަށް ކުޅުނީ 10 ބޯޅައިން 34 ލަނޑު ހެދި އަޙްމަދު ހަސަނާއި، 10 ބޯޅައިން 33 ލަނޑު ހެދި ހަސަން އަފްލާމުގެ އިތުރުން 13 ބޯޅައިން 31 ލަނޑު އެއްކުރި އިބްރާހީމް އިއުޖާޒް ހާފިޒެވެ.
ޖަވާބުގައި ސީބީއެމް ކުޅެން އަރައި އަށް އޯވަރު ހަމަވިއިރު އެންމެ ކުޅުންތެރިއަކު ނުބައިވެގެން ހެދުނީ 91 ލަނޑެވެ. އެ ޓީމުން އެންމެ ރަނގަޅަށް ކުޅެފައިވަނީ ނުބައިނުވެ 14 ބޯޅައިން 26 ލަނޑު ހެދި މުޙައްމަދު ނައިޝަމް އާއި، 12 ބޯޅައިން 22 ލަނޑު އެއްކުރި އިސްމާޢީލް ނަޒްވާނެވެ.
މީގެ އިތުރުން މި މުބާރާތުގައި މިއަދު ހަވީރު ކުޅުނު ގްރޫޕް ސީގެ ދެވަނަ މެޗުން އޭއާރްސީ މޮޅުވީ ކިންޒާ ކެފޭއާ ބައްދަލުކޮށް 85 ލަނޑުންނެވެ.
މި މެޗުގެ ގުރުދިމާވުމުން ކިންޒާ ކެފޭ ގަސްދުކުރީ ހޮވުމަށެވެ. އެއާއެކު އޭއާރްސީ އެންމެ ފުރަތަމަ ކުޅެން އަރައި އަށް އޯވަރު ހަމަވިއިރު ދެ ކުޅުންތެރިން ނުބައިވެގެން ވަނީ 148 ލަނޑު ހަދާފައެވެ. އެ ޓީމުން އެންމެ ރަނގަޅަށް ކުޅުނީ 12 ބޯޅައިން 32 ލަނޑު ހެދި މުޙައްމަދު އައްޒާމާއި، 31 ބޯޅައިން 31 ލަނޑު އެއްކުރި ހަސަން ރަޝީދެވެ.
ޖަވާބުގައި ކިންޒާ ކެފޭ ކުޅެން އަރައި އަށް އޯވަރު ހަމަވިއިރު ފަސް ކުޅުންތެރިން ނުބައިވެގެން ހެދުނީ 63 ލަނޑެވެ. އެ ޓީމުން އެންމެ ރަނގަޅަށް ކުޅެފައިވަނީ ނުބައިނުވެ 16 ބޯޅައިން 16 ލަނޑު ހެދި އީޒާން ކިންއެވެ.
ދިވެހީންނަށް ހުޅުވާލައިގެން ކުރިއަށްދާ އޯޕަން މުބާރާތުގައި މި ފަހަރުވެސް 12 ޓީމެއް ބައިވެރިވެފައިވާއިރު، މުބާރާތުގެ ކުޅުން ކުރިއަށްދަނީ ތިން ގްރޫޕަކަށް ބަހާލައިގެންނެވެ. މި މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ މި މަހުގެ 22 ވަނަ ދުވަހެވެ.