ރާއްޖޭގެ ކުޅިވަރު ކުރިއެރުވުމަށް އެންމެ ޅަފަތުން ފެށިގެން "އޮލިމްޕިޒަމް" ގެ މާނަ ކުދިންގެ ކިބައިގައި އަށަގަންނުވަންޖެހޭ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ހެންވޭރު މީރުމާގެ ކާނިމާ މާލަމުގައި ރޭ ބޭއްވި މޯލްޑިވްސް އޮލިމްޕިކް ކޮމިޓީ (އެމްއޯސީ) ގެ އަހަރީ އާންމު ޖަލްސާ ޝަރަފުވެރިކޮށްދެއްވައި ވާހަކަފުޅުދައްކަވަމުން ރާފިޢު ވިދާޅުވީ ކުޅިވަރު ކުރިއެރުވުމަށް ކުރެވެމުންދާ މަސައްކަތްތަކަކީ ޒާތީވުމެއް ނެތި ކުރެވެމުންދާ މަސައްކަތްތަކެއް ކަމަށާއި، އަދި އެއީ ވަރަށް މާތް މަގުސަދެއްގެ ކުރައްވަމުން ގެންދަވާ މަސައްކަތްތަކެއް ކަމަށެވެ. އެގޮތުން ރާއްޖޭގެ ކުޅިވަރުގައި ހަރަކާތްތެރިވެފައިވާ ލެޖެންޑުންނަށް އަމާޒުކޮށްގެން ތައްޔާރުކުރަމުންދާ "ނެޝަލަންސް ސްޕޯޓްސް ވެޓެރަންސް އެމްބެސެޑަރސް" ދަފުތަރުގެ ވާހަކަ ރާފިޢު ވަނީ ފާހަގަކުރައްވާފައެވެ.
ރާފިޢު ވިދާޅުބީ ރާއްޖޭގެ ކުޅިވަރު ކުރިއެރުވުމަށްޓަކައި ކޮންމެ މުއައްސަސަކާއަށް ޚާއްސަ ދައުރެއް އަދާކުރެވިދާނެ ކަމަށާއި، މިއީ ވަކި ތަފާތެއް އޮތް ބައެއް ނޫން ކަމަށެވެ. އެކަމަކު އެ ތަފާތު ފެނިގެންދަނީ ތަފާތުކޮށް މަސައްކަތް ކުރެވެމުން ކަމަށްވެސް ވިދާޅުވިއެވެ. އަދި ކުޅިވަރު ކުރިއަރުވަން އެންމެ އެއް ލަނޑުދަނޑިއެއް ހާސިލުކުރުމަށް މަސައްކަތް ކުރާނަމަ، އެ ތަފާތުކަން ނުފެންނާނެ ކަމަށްވެސް ރާފިޢު ވިދާޅުވިއެވެ.
"އަޅުގަނޑުމެން މިކަން ކުރުމަށްޓަކައި ކަލްޗަރަލް ޗޭންޖެއް އެބަ ގެންނަން ޖެހޭ. މާނައަކީ ކުޑައިރުއްސުރެން ވަކި ބައްޓަމަކަށް ކުޅިވަރުގެ ހުނަރު ދަސްކޮށްދީ، "އޮލިމްޕިޒަމް" ގެ މާނަ އެކުދިންގެ ގައިގައި އަށަގަންނަން އެބަޖެހޭ.ޢަބްދުﷲ ރާފިޢު - ކުޅިވަރާއި ހަށިހެޔޮކަމާ ބެހޭ ވަޒީރު
ރާފިޢު ވިދާޅުވީ ކުޅިވަރުގެ ތެރެއިން ކުދިންނަށް އުފާވެރިކަން ގެނެސްދީ، އެ ކުދިންނަކީ ރިވެތި އާދަ އަށަގަނެ، މުޅި މުޖުތަމައު ގަދަރުވެރި ބައެއްގެ ގޮތުގައި އުޅޭ ތަނެއްގެ ގޮތަށް ހަދަންޖެހޭ ކަމަށެވެ.
މި މަގުން ރާއްޖޭގެ ކުޅިވަރު ތަރައްގީކުރުމަށް މަސައްކަތް ކުރެވިއްޖެނަމަ، ކުރިއަށް އޮތް 10 އަހަރުގެ ތެރޭގައި އިންޑިއަން އޯޝަން އައިލެންޑް ގޭމްސް (އައިއޯއައިޖީ) އާއި ސައުތު އޭޝިއަން ގޭމްސް ރާއްޖޭގެ ބޭއްވުމުގެ އިތުރަށް 2030 ވަނަ އަހަރުގެ އޭޝިއަން ގޭމްސްއިން ޕޯޑިއަމް ފިނިޝިން ހާސިލުކުރެވޭނެ ކަމަށެވެ. މީގެ އިތުރުން 2034 ވަނަ އަހަރު ނުވަތަ 2040 ވަނަ އަހަރުގެ އޮލިމްޕިކްސް ގޭމްސްއިން ވަނަ ހާސިލުކުރުންވެސް ހިމެނޭ ކަމަށް ވަޒީރު ވިދާޅުވިއެވެ.
މި ކަންކަމަކީ ކުޅިވަރުގެ ދިގު ރާސްތާ ޕްލޭނުގައި ދާންވީ ރާސްތާ ބަޔާންކޮށް ހިމަނާފައިވާ ކަންކަން ކަމެވެ. ރާފިޢު ވިދާޅުވީ ޕްލޭނުގައި ހުރި ކަންކަން ކުރުމަށްޓަކައި ހުރިހާ ކުޅިވަރު އެސޯސިއޭޝަންތަކާއި މުއައްސަސާތަކުގެ އެއްބާރުލުން ވަރަށް މުހިންމުވާނެ ކަމަށެވެ.