އެފްއޭއެމް ވެޓެރަންސް ލީގަކީ ރަމަޟާން މަހު އެންމެ ފޯރިއާއެކު ކުރިއަށްދާ އެންމެ މަގުބޫލް އެއް މުބާރާތެވެ. އެއީ ސަބަބުތަކެއް ނެތިއެއް ނޫނެވެ. އެގޮތުން ރާއްޖޭ ކުރީގެ މަޝްހޫރު ގިނަ ކުޅުންތެރިންތަކެއް މި މުބާރާތުން ފެނިގެންދެއެވެ. އޭރުގެ ކުޅުންތެރިންގެ ހުނަރާއި، އެ ކުޅުންތެރިންގެ ކުޅުން ބަލާލުމަށް ގިނަ ބަޔަކު މެޗު ކުޅޭ ސަރަހައްދަ ޖަމާވެއެވެ.
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އެންމެ ފުރަތަމަ ބޭއްވި ވެޓެރަންސް މުބާރާތް އިންތިޒާމުކުރި ނަމަވެސް، މި ފަހަކަށް އައިސް މުބާރާތް ބާއްވާފައިވަނީ އެކި ފަރާތްތަކުން އަމިއްލަ ކުލަބުތަކާ ގުޅިގެންނެވެ. އެ ގޮތުން ސޮކަރ ވެޓެރަންސް އެސޯސިއޭޝަން އޮފް މޯލްޑިވްސް (އެސްވީއޭއެމް) އާއި މޯލްޑިވްސް ސޮކަރ މޭޓްސް (އެމްއެސް މޭޓްސް) ގުޅިގެންވެސް ވަނީ މުބާރާތް ކުރިއަށް ގެންގޮސްފައެވެ.
މިހާރު މި މުބާރާތް އިންތިޒާމުކުރަނީ ކުލަބު އިވެންޓްސް އިންނެވެ. ކުލަބް އިވެންޓްސްގެ ފަރާތުން މުބާރާތް އިންތިޒާމުކުރުމުގައި ވޭތުވެދިޔަ ތިން އަހަރުވެސް ފެނިގެންދިޔައީ ކުރީގެ ކުޅުންތެރިޔާ އަދި ތަޖުރިބާކާރު ކޯޗު މުޙައްމަދު ނިޒާމް (ނިޒާމްބެ) ލީޑު ކުރިތަނެވެ. މި ފަހަރުވެސް އޭނާ މުބާރާތާ ހަވާލުވީ ފުޓްބޯޅައިގެ ފޯރި ކެނޑި، މުބާރާތުގެ ވިދުން ފަޑުވެދާނެތީއެވެ. މިފަހަރުވެސް މުބާރާތް ބޯމަތިވުމާއެކު، އެ ޒިންމާ ނިޒާމްބެ ނެގީ ފުޓްބޯޅައަށް ކަމެއް ކޮށްދިނުމުގެ ނިޔަތުގައެވެ. ނިޒާމްބެ ބުނީ މުބާރާތުގެ ފޯރި ކެނޑިގެންދިޔަ ނުދިއުމަށްޓަކައި މި ފަހަރުވެސް މުބާރާތާ ހަވާލުވީ ކަމަށެވެ.
"މުބާރާތުގެ ފޯރި ކެނޑިގެން ނުދިއުމަށްޓަކައި އަސްލު ހަވާލުވީ. މިއީ ހަގީގަތުގައި ކުރީގެ ވަރަށް ބައިވަރު ކުޅުންތެރިން ލުކް ފޯވާޑް ކުރާ މުބާރާތެއް. ހިތަށް އެރީ ކޮންމެވެސް ގޮތަކުން މުބާރާތް ކުރިއަށް ގެންދާނަމޭ.ތަޖުރިބާކާރު ކޯޗު މުޙައްމަދު ނިޒާމް (ނިޒާމްބެ)
ހެންވޭރު ދަނޑުގައި ކުޅޭ މި ފަހަރުގެ ވެޓެރަންސް ލީގުގައި ވާދަކުރާ 10 ޓީމު ވަނީ ދެ ގްރޫޕަކަށް ބަހާލާފައެވެ. އެއީ ކޮންމެ ގްރޫޕެއްގެ ގަދަ ދެ ޓީމު ސެމީ ފައިނަލަށް ދަތުރުކުރާ ގޮތަށެވެ. އެ ގޮތުން ގްރޫޕް އޭގައި ހިމެނެނީ އެންމެ ފަހުގެ ޗެމްޕިއަން ހުޅުމާލެ ވެޓެރަންސް ކުލަބާއި، ވިިލިމާލެ ޔުނައިޓެޑާއި، ޕޮލިސް ކުލަބާއި، ހުއްރިއްޔާ ސްޕޯޓްސް ކުލަބު އަދި ދިވެހި ސިފައިންގެ ކުލަބެވެ. އަދި ގްރޫޕް ބީގައި ހިމެނެނީ އެންމެ ފަހުގެ ރަނަރަޕް ދަ ގްރާންޑޭ ސްޕޯޓްސް ކުލަބާއި، އެމްއެސް މޭޓްސް އާއި، މުއިވެޔޮ ފްރެންޑްސް އާއި، ލެގޫންސް ސްޕޯޓްސް ކުލަބު އަދި ކުލަބު ސްޓެލްކޯއެވެ.
މި ފަހަރުގެ މުބާރާތުގައި ފުރަތަމަ ޑިވިޝަނަށް ނިސްބަތްވާ އެއްވެސް ކުލަބެއް ނުފެންނައިރު، ކުރީގެ މައްޝޫރު ކުޅުންތެރިން ކުޅުނު ކުލަބު ވެލެންސި އާއި، ވިކްޓަރީ ސްޕޯޓްސް ކުލަބާއި، ނިއު ރޭޑިއަންޓް ސްޕޯޓްސް ކުލަބުވެސް މުބާރާތުގައި ބައިވެރިވެފައެއް ނުވެއެވެ.
40 އަހަރުން މަތީގެ ކުޅުންތެރިންނަށް ޚާއްސަކޮށްގެން ބާއްވާ ވެޓެރަންސް މުބާރާތުގެ ޗެމްޕިއަންކަން ހޯދި ޓީމުތަކަށް ބަލާއިރު އެންމެ ކާމިޔާބު ޓީމަކީ ފަސް ފަހަރު މުބާރާތުގެ ތަށި އުފުލާލި ވެލެންސިއާއެވެ. ނިއު ރޭޑިއަންޓާއި، މާޒިޔާ ސްޕޯޓްސް އެންޑް ރެކްރިއޭޝަނާއި، ސޮކަރ ވެޓެރަންސް އެސޯސިއޭޝަން އަދި ހުޅުމާލެ ވެޓެރަންސްއިންވެސް ވަނީ މި މުބާރާތް މީގެ ކުރިން ކާމިޔާބުކޮށްފައެވެ.