ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ އިންތިޚާބު މި މަހުގެ 15 ވަނަ ދުވަހު ބޭއްވުމަށް އެ އެސޯސިއޭޝަނުގެ ހިންގާ ކޮމިޓީން ނިންމައިފިއެވެ.
މި ގޮތަށް ނިންމާފައިވަނީ ރޭގެ ވަގުތެއްގައި ބޭއްވި އެ އެސޯސިއޭޝަނުގެ ހިންގާ ކޮމިޓީގެ ބައްދަލުވުމެއްގައެވެ.
ވީއޭއެމުގެ ރައީސްގެ މަގާމަށް 2021 ވަނަ އަހަރުގެ އޭޕްރީލް މަހުގެ ތެރޭގައި އިންތިޚާބުވެވަޑައިގެންނެވި މުޙައްމަދު ރަނޭޝް (ރަނޭ) ވަނީ މިދިޔަ ހަފުތާގައި މަގާމުން އިސްތިއުފާދެއްވާފައެވެ. މަގާމުން ރަނޭ އިސްތިއުފާދެއްވިއިރު، އޭނާގެ ދައުރުގައި ބާކީ އަހަރަކަށް ވުރެ ގިނަ ދުވަސް އޮތެވެ.
ރަނޭ މަގާމުން އިސްތިއުފާދެއްވަން ނިންމެވީ މި ވަގުތު ވަޒީފާ އާއި ދިރިއުޅުމުގެ ކަންތައްތައް، ގައުމުން ބޭރަށް ބަދަލުކުރަން ޖެހުމުންނެވެ. އެގޮތުން ގައުމީ އެއާލައިން ކަމަށްވާ މޯލްޑިވިއަންގެ ސީނިއާ ކެޕްޓަނެއްގެ ގޮތުގައި މަސައްކަތް ކުރެއްވި ރަނޭ މިހާރު ވަނީ ވަޒީފާގެ ފުރުސަތެއް ލިބުމުން، ޔުނައިޓެޑް އަރަބް އެމިރޭޓްސް (ޔޫއޭއީ) އަށް ދިރިއުޅުން ބަދަލުކުރައްވާފައެވެ.
ރަނޭ މަގާމުން އިސްތިއުފާދެއްވުމާއެކު ވީއޭއެމުން ރޭ ބޭއްވި ހިންގާ ކޮމިޓީގެ ބައްދަލުވުމުގައި ވަނީ، އެ ބައްދަލުވުމުގެ އަގުލަބިއްޔަތުން ރައީސްގެ މަސްއޫލިއްޔަތު އަދާކުރުމަށް ނައިބު ރައީސް ޢަބްދުﷲ ނާޝިދު ހަމަޖެއްސުމަށް ނިންމާފައެވެ. އަދި އެ ބައްދަލުވުމުގައި ވަނީ އެ އެސޯސިއޭޝަނުގެ ހިންގާ ގަވާއިދާ އެއްގޮތަށް ހިންގާ ކޮމިޓީއަށް އިންތިޚާބުކުރަންޖެހޭ މެންބަރުން އިންތިޚާބުކުރުމަށް ތާރީޚުތައްވެސް ކަނޑައަޅާފައެވެ.
އެގޮތުން ވީއޭއެމުގެ އިންތިޚާބު ބާއްވާކަން މިއަދު އިއުލާންކޮށްފައިވާއިރު، އިންތިޚާބަށް ކުރިމަތިލުމުގެ ފުރުސަތު ހަމަވާނީ މި މަހުގެ 10 ވަނަ ދުވަހު ކަމަށްވެސް ވަނީ ނިންމާފައެވެ. އަދި އިންތިޚާބީ ކޮންގްރެސް މި މަހުގެ 15 ވަނަ ދުވަހު ބޭއްވުމަށްވެސް ހިންގާ ކޮމިޓީން ވަނީ ނިންމާފައެވެ.
ވީއޭއެމުގެ ރައީސްގެ މަގާމުން ރަނޭ އިސްތިއުފާދެއްވާފައިވާއިރު، ދާދި ފަހުން އޭނާގެ ސްޕެޝަލް އެޑްވައިޒަރަކަށް އެ އެސޯސިއޭޝަންގެ ކުރީގެ ރައީސް މުޙައްމަދު ލަތީފް އައްޔަންކުރެއްވިއެވެ. އަދި އެ އެސޯސިއޭޝަނުގެ ޖެނެރަލް ސެކްރެޓަރީގެ މަގާމަށް މުޙައްމަދު ސައީދުވެސް ވަނީ މި ފަހުން އައްޔަންކުރައްވާފައެވެ.