އައިއެޗްއެފް ޓްރޮފީގައި ވާދަކުރާ ރާއްޖޭގެ 17 އަހަރުން ދަށާއި 19 އަހަރުން ދަށުގެ ޓީމު، މުބާރާތަށް ތައްޔާރުވުމަށް ޚާއްސަ ތަމްރީނުތަކެއް ކުރިއަށްގެންދަން ހަމަޖެހިއްޖެއެވެ.
މި ފަހަރު މުބާރާތަށް ދިޔުމުގެ ކުރިން ގައުމީ ޓީމު ކޭމްޕް ކުރުމަށް ހަމަޖެހިފަވަނީ ލ. އަތޮޅުގައި ކަމަށް ހޭންޑްބޯލް މޯލްޑިވްސްއިން ވަނީ މައުލޫމާތުދީފައެވެ.
ލ. އަތޮޅުގެ ކޭމްޕާ ގުޅޭގޮތުން ޕީއެސްއެމުން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަކަދައްކަވަމުން އެ އެސޯސިއޭޝަނުގެ ރައީސް އަޙްމަދު މުޖުތަބާ ވިދާޅުވީ މިކަމުގެ ބޭނުމަކީ ޚާއްސަކޮށް ކުޅުންތެރިންނަށް މިފަދަ ކޭމްޕެއްގެ ބޭނުންތެރިކަމާއި، ތަފާތު ދައްކަދިނުން ކަމަށެވެ. އަދި މި ކޭމްޕުގައި ލ. އަތޮޅުގައި އެމްއެންޑީއެފްއިން ތަމްރީނު ހަދަމުންދާ ބޭސްގައި ޚާއްސަ ތަމްރީނުތަކެއް ކުރިއަށްގެންދާނެ ކަމަށްވެސް ވިދާޅުވިއެވެ.
"އަޅުގަނޑުމެން މި ކޭމްޕުގައި އެމްއެންޑީއެފްގެ އެހީތެރިކަމާއެކު އެ ކުދިން މިލިޓަރީ ބޭސްގައި ބާތިއްބައިގެން، އެ މީހުންގެ އެހީތެރިކަމާއެކު ޓްރެއިންވެސް ކުރެވި، ޖިސްމާނީ ދުޅަހެޔެކޮމަވެސް ބަދަލުތަކެއް ގެނެވޭނެ ޓައިމްތަކެއް ލާފައި، އެވެސް ބަދަލުކޮށްފައި، އަޅުގަނޑުމެން އެކުދިންގެ ޑިސިޕްލިންވެސް ވަކިގޮތަކަށް ބައްޓަން ކުރެވިގެން.އަޙްމަދު މުޖުތަބާ - ހޭންޑްބޯލް މޯލްޑިވްސްގެ ރައީސް
މި ކޭމްޕުގައި ކުޅުންތެރިންގެ ފިކުރާ ވިސްނުމަށް ކާމިޔާބު ހޯދޭނެ ގޮތްތަކަކަށް ވިސްނައިދުނުމުގެ އިތުރުން, ވަކި ގަޑިތަކަށް ތަމްރީނު ހެދުން ފަދަ ކަންކަންވެސް ކުރިއަށްދާނެ ކަމަށް މުޖުތަބާ ވިދާޅުވިއެވެ. އަދި މި ޕްރޮގްރާމަކީ ވަރަށް ބޮޑު މަސައްކަތެއްގެ ފެށުން ކަމަށާއި، ކާމިޔާބީ ހޯދުމަށް ކުރަންޖެހޭ މަސައްކަތެއްގެ ގޮތުގައި ތަންފީޒުކުރަމުގެ މަސައްކަތް ފަށާފައިވާ ކަމަށްވެސް މުޖުތަބާ ވިދާޅުވިއެވެ. މި ޕްލޭންގެ ދަށުން މި ފަހަރުގެ ޓީމާ މެދު ވަރަށް އުއްމީދު ބޮޑު ކަމަށްވެސް މުޖުތަބާ ވިދާޅުވިއެވެ.
މުޖުތަބާ ވިދާޅުވީ ރާއްޖޭ ޓީމުން މުބާރާތަށް ނުކުންނާނީ ނިސްބަތުން ވަރުގަދަ ބޮޑެތި ޓީމުތަކާ ދެކޮޅަށް ކަމަށާއި، އެހެންނަމަވެސް މުބާރާތުގައި ރާއްޖޭގެ އަމާޒަކީ ރަން މެޑަލް ހޯދުން ކަމަށެވެ. މިދިޔަ އަހަރު ކުރިއަށްދިޔަ އައިއެޗްއެފް ޓްރޮފީ މުބާރާތުގަައި ރާއްޖޭގެ 17 އަހަރުން ދަށާއި 19 އަހަރުން ދަށުގެ އަންހެން ޓީމުން ވަނީ ލޯ މެޑަލް ހޯދާފައެވެ.