ދިވެހިރާއްޖޭގެ އިސްލާމިކް ޔުނިވަރސިޓީގެ ޚިދުމަތްތައް މި އަހަރުގެ ތެރޭގައި ރާއްޖޭގެ އެކި ސަރަޙައްދުތަކަށް ފޯރުކޮށްދެއްވާނެކަމަށް އެ ޔުނިވަރސިޓީގެ ވައިސް ޗާންސެލަރ ޑޮކްޓަރ މުޙައްމަދު ޝަޙީމް ޢަލީ ސަޢީދު ވިދާޅުވެއްޖެއެވެ.
ޕީއެސްއެމްއަށް ދެއްވި އިންޓަރވިއުއެއްގައި ޑރ. ޝަހީމް ވިދާޅުވީ އިސްލާމިކް ޔުނިވަރސިޓީގެ ޚިދުމަތްތައް ރާއްޖޭގެ އެކި ސަރަޙައްދުތަކަށް ފޯރުކޮށްދިނުމުގެ މަސައްކަތުގެ ތެރެއިން ލ. އަތޮޅާއި ގއ. އަތޮޅާއި، އައްޑޫ އަދި ފުވައްމުލަކުގައި މި އަހަރުގެ ތެރޭގައި ކޯސްތަކެއް ފެއްޓެވުމަށް މަސައްކަތް ކުރައްވަމުން ގެންދަވާކަމަށެވެ. އަދި މިކަމަށްޓަކައި ކުރައްވަންޖެހޭ ދިރާސާތައް މިހާރު ކުރައްވަމުން ގެންދަވާކަމަށް ޝަހީމް ވިދާޅުވިއެވެ.
ޝަހީމް ވިދާޅުވީ އެ ޔުނިވަރސިޓީގެ ކޯސްތަކުގައި އޮންލައިންކޮށް ކިޔެވޭނެ މަގުފަހިކޮށްދިނުމަކީ ޢަމާޒެއް ކަމަށާއި، އަންނަ އަހަރުގެ ޖެނުއަރީމަހު އޮންލައިން ކޯސްތައް ފެއްޓެވުމަށްވެސް މަސައްކަތް ކުރައްވަމުންދާކަމަށެވެ.
މީގެ އިތުރަށް ދިވެހިރާއްޖޭގެ އިސްލާމިކް ޔުނިވަރސިޓީ ތަރައްޤީ ކުރުމަށްޓަކަށް ޔުނިވަރސިޓީ ޑިވެލޮޕްމަންޓް ފަންޑުގެ ނަމުގައި އުފައްދަވާފައިވާ ފަންޑަށް މިހަތަނަށް 1.6 މިލިއަން ރުފިޔާ ލިބިފައިވާކަމަށް ޝަހީމް ވިދާޅުވިއެވެ. އަދި އަމާޒަކީ 2020 އަހަރަށް 50 މިލިއަން ރުފިޔާއަށް އިތުރުކޮށް ޔުނިވަރސިޓީގެ އަމިއްލަ އައުޤާފްތަކެއް އުފެއްދެވުންކަމުގައި ޝަހީމް ވިދާޅުވިއެވެ.
ދިވެހިރާއްޖޭގެ އިސްލާމިކް ޔުނިވަރސިޓީ އަކީ ޢަރަބި-އިސްލާމީ ތަޢުލީމު ފޯރުކޮށްދިނުމަށްޓަކައި މީގެ ކުރިން ހިންގަމުން އައި ކުއްލިއްޔަތުއްދިރާސާތުލް އިސްލާމިއްޔާ، އިސްލާމިކް ޔުނިވަރސިޓީއަށް ބަދަލުކުރެއްވުމަށް ދިވެހިރާއްޖޭގެ އިސްލާމިކް ޔުނިވަރސިޓީގެ ޤާނޫނަށް އަމަލުކުރަން ފެއްޓެވުމާއެކު މިދިޔަ އަހަރުގެ ޖުލައި މަހުން ފެށިގެން ޔުނިވަރސިޓީއެއްގޮތުގައި ހިންގަވަމުން އަންނަ ތަނެކެވެ.