ދިމްޔާތުގައި ހުންނެވިއިރު ދައުލަތުން އެއްވެސް ޚަރަދެއް ކޮށްފައި ނުވާނެ: ރައީސް

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަމިއްލަ ގެކޮޅު ކަމަށްވާ މ. ދިމްޔާތުގައި ހުންނެވި ދުވަސްތަކަށް ދައުލަތުން ޚަރަދު ކުރި ކަމަށް ބުނެ ދެކެވޭ ވާހަކަތައް އެމަނިކުފާނު ދޮގުކުރައްވައިފިއެވެ.

ރައީސް މިކަން ހާމަކުރެއްވީ އާންމުންގެ ސުވާލުތަކަށް ޖަވާބުދެއްވުމަށް ކޮންމެ ދުވަހަކު ކުރިއަށްގެންދާ "ރައީސްގެ ޖަވާބު" ޕްރޮގްރާމުގައި ށ. ފުނަދޫ، ނީލްވިލާ، އާމިނަތު ނަޖްމާ ކުރި ސުވާލަކަށް ޖަވާބުދެއްވަމުންނެވެ. ނަޖުމާ ސުވާލުކޮށްފައިވަނީ ރައީސް އަމިއްލަ ގެކޮޅުގައި ހުންނެވި ދުވަސްތަކަށް ދައުލަތުން ބޮޑެތި ޚަރަދުތަކެއް ކުރި ކަމަށް ދެކެވޭ ވާހަކަތަކާ ގުޅޭގޮތުންނެވެ.

ދިމްޔާތުގައި ހުންނެވި މުއްދަތުގައި ދައުލަތުން 25 މިލިއަން ރުފިޔާ ހޭދަކުރި ކަމަށް ދެކެވޭ ވާހަކަތަކަށް ރައްދު ދެއްވައި ރައީސް ވިދާޅުވީ އެއީ ކަނޑައެޅިގެން ދޮގު ވާހަކަތަކެއް ކަމަށެވެ. ރައީސުލްޖުމްހޫރިއްޔާ ހުންނެވުމުގެ ޚަރަދު ދައުލަތުން ކުރާގޮތަށް އޮތް ނަމަވެސް އެމަނިކުފާނު ބޭނުންފުޅުވީ އަމިއްލަ ގެކޮޅުގައި ހުންނެވި މުއްދަތުގައި ހުރިހާ ޚަރަދެއްވެސް އަމިއްލަފުޅަށް ކުރެއްވުމަށް ކަމަށް ރައީސް ވިދާޅުވިއެވެ.

މީގެ އިތުރުން އެމަނިކުފާނާއި އަނބިކަނބަލުންގެ ފަރީއްކުޅުވުމުގެ ޚަރަދަށް 100 ދުވަހުގެ ތެރޭގައި 30 މިލިއަން ރުފިޔާ ދައުލަތުން ޚަރަދު ކުރިކަމަށް ބުނެ ދެކެވޭ ވާހަކަތައް ދޮގުކުރައްވައި ރައީސް ވިދާޅުވީ އެއީ ބުއްދި ގަބޫލުކުރާ ވާހަކައެއް ނޫންކަމަށެވެ. އެގޮތުން، މުލިއާގޭގައި ކެއުމުގެ ޚަރަދަށް ވެސް އަހަރަކު ހޭދަކުރަން ޖެހެނީ ހަތްލައްކަ ރުފިޔާ ކަމަށާއި އެފަދަ ހަގީގަތާ ޚިލާފު ޚަބަރު ފަތުރަނީ ސަރުކާރާ ދެކޮޅަށް ދައްކާނެ އިތުރު ވާހަކައެއް ނެތުމުން ކަމަށް އެމަނިކުފާނު ވިދާޅުވިއެވެ.

"މިވާގޮތަކީ އަޅުގަނޑުމެންގެ މަސައްކަތްތައް ރައްޔިތުންނަށް ވަރަށް ސާފުކޮށް އެބައެނގޭ، ދެ ފުށް ފެންނަ ގޮތަށް، ހާމަކަން ބޮޑުގޮތަށް ހުރިހާ އެންމެންނަށް ވެސް ކަންކަން އެނގެމުންދާއިރު އެކަހަލަ ކަންކަން ނެތީ އެއްވެސް ވަރަކަށް ދައްކާނެ ވާހަކައެއް އިދިކޮޅަށް. އެހެންވެ ހަދަހަދައިގެން، ހުސް ދޮގުވާހަކަ، އެއްވެސް ވަރެއްގެ ތެދެއްނެތް ދޮގުވާހަކަ ފެތުރުން މިހާރު ސްޓްރެޓެޖީއަކަށް ގެންގުޅޭތަން މިފެންނަނީ،" ރައީސް ވިދާޅުވިއެވެ.

ރައީސް ވަނީ މިފަހަކަށް އައިސް ހަގީގަތާ ޚިލާފު ޚަބަރުތައް ފެތުރުން އިތުރުވެފައިވާކަން ފާހަގަކުރައްވައި އެކަމަށް ސަމާލުވުމަށް އެދިވަޑައިގެންފައެވެ. އަދި އެފަދަ ޚަބަރުތަކުގެ ކަންކަން އޮޅުންފިލުވައި ހަގީގަތް ސާފުކުރުމަށް އެމަނިކުފާނު އެދިވަޑައިގެންނެވިއެވެ.