ކުޅިވަރުގެ ދިގު ރާސްތާ ޕްލޭން: އޭޝިއަން ގޭމްސް، އައިއޯއައިޖީ އަދި ސައުތު އޭޝިއަން ގޭމްސް ބޭއްވުމުގެ އަމާޒު
ރާއްޖޭގެ ކުޅިވަރު ކުރިއެރުވުމުގެ ދިގު ރާސްތާ ޕްލޭންގައި ކުރިއަށް އޮތް 20 އަހަރުގެ ތެރޭގައި ރާއްޖޭގައި އޭޝިއަން ގޭމްސް އަދި 10 އަހަރުގެ ތެރޭގައި އިންޑިއަން އޯޝަން އައިލެންޑް ގޭމްސް (އައިއޯއައިޖީ) އާއި ސައުތު އޭޝިއަން ގޭމްސް ބޭއްވުމުގެ އަމާޒު ހިމަނައިފިއެވެ.
އިއްޔެ ބޭއްވި ހަފުލާއެއްގައި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވަނީ ކުޅިވަރުގެ ދިގު ރާސްތާ ޕްލޭންގެ ޑްރާފްޓް، ޕްރެޒެންޓޭޝަނެއްގެ ސިފައިގައި ހުށަހަޅައިދީފައެވެ. މި ޕްލޭންގައި ތިންވަނައަށް ތަރުތީބުކޮށްފައިވަނީ ކުޅިވަރު ބައްދަލުވުންތަކާއި މުބާރާތްތައް ރާއްޖޭގައި ބޭއްވުމަށް ކުރަން ޖެހޭ މަސައްކަތެވެ. އެ ބައިގައި ބުނެފައި ވަނީ އެތުލީޓް ޑިވެލޮޕްމަންޓް ހަރުދަނާ ކުރާއިރު ޓޫރިޒަމްގެ ތެރެއިން ސްޕޯޓްސް ޓޫރިޒަމްގެ މަންޒިލެއްގެ ގޮތުގައިވެސް ރާއްޖެ ތަރައްގީކުރުން ހިމެނޭ ކަމަށެވެ.
ކުރިއަށް އޮތް 10 އަހަރުގެ ތެރޭ އައިއޯއައިޖީ އާއި ސައުތު އޭޝިއަން ގޭމްސް އަދި ކުރިއަށް އޮތް 20 އަހަރު ތެރޭގައި އޭޝިއަން ގޭމްސް ބޭއްވުމުގެ އަމާޒާއެކު އެކަމަށް ސްޓްރެޓެޖިކް ޕްލޭނެއް އެކުލަވާލުން މި ޕެލޭންގައި ހިމެނޭ އެންމެ މުހިންމު ކަމެއްގެ ގޮތުގައި ވަނީ ފާހަގަކޮށްފައެވެ. މުބާރާތްތައް ރާއްޖޭގައި ބޭއްވުމުގެ ބައިވެރިންގެ ގޮތުގައި ހިމަނާފައިވަނީ ޓޫރިޒަމް މިނިސްޓްރީ، އިކޮނޮމިކް މިނިސްޓްރީ، ހައުސިން މިނިސްޓްރީ، މޯލްޑިވްސް އޮލިމްޕިކް ކޮމިޓީ (އެމްއޯސީ) އަދި ގައުމީ ކުޅިވަރު އެސޯސިއޭޝަންތަކެވެ.
ކުޅިވަރާއި ހަށިހެޔޮކަމާ ބެހޭ ވަޒީރު ރާފިޢު އިއްޔެ އިފުތިތާހުކޮށްދެއްވި ޕްލޭން، އެ ވުޒާރާގެ ވެބްސައިޓުން ޑައުންލޯޑް ކުރެވޭ ގޮތަށް ހުރިއިރު، މިހާރު މި ޕްލޭން މި އޮތީ އެކި ފަރާތްތަކުގެ ޚިޔާލު ހޯދުމަށް ހުޅުވާލެވިފައެވެ. ޚިޔާލުތައް ލިބޭ މިންވަރަށް ބެލުމަށް ފަހު، ޕްލޭންގެ ކަންކަން އަލުން އިވެލުއޭޓްކުރާނެ ކަމަށް ވަޒީރު ވިދާޅުވިއެވެ.