ރާއްޖޭގެ ކުޅިވަރު ކުރިއެރުވުމުގެ ދިގު ރާސްތާ ޕްލޭންގައި އޮލިމްޕިކްސްއިން މެޑަލް ހޯދުމުގެ ހުވަފެނުގައި ގިނަ ކަންތައްތަކެއް މަގުފަހިކޮށްދިނުމަށް ހިމަނައިފިއެވެ.
އިއްޔެ ބޭއްވި ހަފުލާއެއްގައި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވަނީ ކުޅިވަރުގެ ދިގު ރާސްތާ ޕްލޭންގެ ޑްރާފްޓް، ޕްރެޒެންޓޭޝަނެއްގެ ސިފައިގައި ހުށަހަޅައިދީފައެވެ. އެތުލީޓުންނަށް ރަނގަޅު ފެންވަރުގެ ތަމްރީން ދެމެހެއްޓެނިވި ގޮތެއްގައި ދިނުމުގެ ނިޒާމެއް ކަނޑައަޅާ ގޮތަށް ޕްލޭނުގައި ހިމަނާފައިވާއިރު، ވީހާވެސް އަވަހަށް އެކި ކުޅިވަރުގެ ހުނަރުވެރި ކުދިން ހޯދައި، ރަނގަޅު ތަމްރީންތައްދީ، އެ ކުދިން ކުރިއެރުވުން ވަނީ ހިމަނާފައެވެ.
މީގެ ދުރު ވިސްނުމަކީ ބައިނަލްއަގުވާމީ ބޮޑެތި ގޭމްސްތަކުން ރާއްޖެއަށް މެޑަލް ހޯދޭނެ ވަރަށް ދުރާލާ އެތުލީޓުން ޑިވެލޮޕްކުރުމެވެ. އެ ގޮތުން ޕްލޭނުގައި ކާމިޔާބު ހޯދުމުގެ އަމާޒެއްގެ ގޮތުން ހިމަނާފައިވަނީ 2030 އާއި 2034 ގެ އޭޝިއަން ގޭމްސްގައި މެޑަލެއް ހޯދުމާއި، 2036 އާއި 2040 ގެ އޮލިމްޕިކްސްއިން ރާއްޖެއަށް މެޑަލް ގެނެވޭތޯ، އެ އަޒުމުގައި މަސައްކަތް ކުރުމެވެ.
ރާއްޖޭގެ ކުޅިވަރު އެސޯސިއޭޝަންތަކުގެ ހަރަކާތްތައް މިހާރަށް ވުރެ ފުޅާވެ، އަތޮޅުތަކުގައިވެސް ގަވާއިދުން ކަންކަން ހިންގުމަށްވެސް މި ޕްލޭނުގައި ވަނީ ބާރު އަޅާފައެވެ. އަދި ތައުލީމާ ބެހޭ ވުޒާރާއާ ގުޅިގެން ފިޒިކަލް އެޑިއުކޭޝަން މާއްދާގެ ކަންކަން ބެލެހެއްޓުމަށް ގައުމީ ފެންވަރުގެ ކޯޑިނޭޓަރަކު ކަނޑައެޅުން ހިމެނެއެވެ.
ރާއްޖޭގެ ކުޅިވަރުގެ ދިގު ރާސްތާ ޕްލޭން އެކުލަވާލުމުގައި އެމެރިކާގެ އިންޓަނޭޝަނަލް ކޯޗިން އެންރިޗްމަންޓް ސެޓިފިކެޓް ޕްރޮގްރާމް (އައިސީއީސީޕީ) ގެ އެހީތެރިކަން ހޯދުމަށް، ރާއްޖޭގައި ވަނީ ހަފުތާއެއްގެ މުއްދަތަކަށް ހަރަކާތްތަކެއް ކުރިއަށްގެންގޮސްފައެވެ.