ހައްދުންމަތީ ގަން ފޮނަދޫ ސަރަޙައްދުގައި މިހާރު ކުރިއަށްދާ ރައްކާ ރޯޑް ޝޯވްގެ ތެރެއިން މިއަދު ވަނީ، އެލައިޑް އިންޝިއުރަންސްގެ ފަރާތުން ގަމު ޕޮލިސް ސްޓޭޝަނަށް ހެލްމެޓް ހަވާލުކޮށްފައެވެ.
އެލައިޑް އިންޝިއުރަންސްގެ ފަރާތުން ގަމު ޕޮލިސް ސްޓޭޝަނަށް ހަދިޔާ ކޮށްފައިވަނީ 16 ހެލްމެޓެވެ. މި ހެލްމެޓްތައް ހަވާލުކޮށްދެއްވީ މިއަދު ހަވީރު، ގަމު ރީޖަނަލް ހޮސްޕިޓަލްގައި ބޭއްވި ރަސްމިއްޔާތެއްގައި ޕްރޮސިކިއުޓަރ ޖެނެރަލް އައިޝަތު ބިޝާމެވެ.
މި ރަސްމިއްޔާތުގައި ވާހަކަދައްކަވަމުން، ތ. އަދި ލ. އަތޮޅު ހިމެނޭ ސައުތު ސެންޓްރަލް ޑިވިޒަންގެ ކޮމާންޑަރ، ސްޕްރިންޓެންޑެންޓް އޮފް ޕޮލިސް، އަހުމަދު ޝާކިރު ވިދާޅުވި، ގަމާއި ފޮނަދޫ ސަރަޙައްދުގައި ތާރު އަޅައިގެން ޒަމާނީ ފެންވަރަށް މަގު ހަދަމުންދާއިރު، ހެލްމެޓަކީ ވަރަށް މުހިންމު އެއްޗަކަށް ވެފައިވާ ކަމަށެވެ. ހެލްމެޓް ބޭނުން ކުރުމުގެ ނަމޫނާ ދެއްކުމަށްޓަކައި ގަމާއި ފޮނަދޫ ސަރަޙައްދުގެ މުއައްސަސާތަކުގެ އިސްވެރިންގެ ތެރެއިން ހެލްމެޓް އެޅުމަށް 30 މީހުންގެ ލިސްޓެއް ތައްޔާރުކޮށްފައިވާ ކަމަށްވެސް ވިދާޅުވިއެވެ. އަދި ޒުވާނުންނަށް ހެލްމެޓް އެޅުމުގެ ނަމޫނާ ދެއްކެން އޮތީ، މުއްސަސާތަކުގެ އިސްވެރިން އެ ކަމުގައި އިސްނަގައިގެން ކަމަށް ޝާކިރު، ފާހަގަކުރެއްވިއެވެ.
ލ.އަތޮޅުގައި ކުރިއަށްގެންދާ ރައްކާ ރޯޑްޝޯވްގެ ތެރެއިން، ރެއާއި މިއަދުވެސް ވަނީ ސްކޫލް ކުދިންނަށާއި، ސަރުކާރު މުވައްޒަފުންނަށް މަޢުލޫމާތު ދިނުމުގެ ޕްރޮގްރާމްތަކެއް ކުރިއަށް ގެންގޮސްފައެވެ.