ކުލަބު ވެލެންސިއާގެ ބޯޑުން ދާދި ފަހުން ވަކިކުރި މެންބަރުން ހުށަހެޅި މައްސަލައިގައި އެ ކުލަބުގެ ޗެއާމަން އަބްދުﷲ އަޒްމީނާ ދެކޮޅަށް ވަގުތީ އަމުރެއް ނެރެދެވެން ނެތް ކަމަށް ސިވިލް ކޯޓުން ނިންމައިފިއެވެ.
މި މައްސަލައަކީ ވެލެންސިއާގެ ޗެއާމަންގެ މަގާމަށް އަޒްމީން އައުމުގައި ކަންކޮށްފައިވާ ގޮތާއި މެދު ހިތްހަަމަނުޖެހުން ފާޅުކޮށް، އަދި އެ ކުލަބުގެ ބޯޑުން ވަކިކުރި މެންބަރުން، އެ މަގާމުން ވަކިކުރުމުން އެކަން ބާތިލުކޮށްދިނުމަށް އެދި ކޯޓަށް ހުށަހެޅި މައްސަލައެކެވެ.
ބޯޑުން މެންބަރުން ވަކިކޮށް، އައު ބޯޑެއް ފާސްކޮށް ރަޖިސްޓްރީކޮށްދިން މައްސަލައިގައި ހިތްހަމަނުޖެހުން ފާޅުކޮށް، އެ މެންބަރުން ހިމެނޭ ގޮތަށް ކޮމިޝަނަރ އޮފް ސްޕޯޓްސް މުޙައްމަދު ޠަލާލް ދިރިއުޅުއްވާ ގެ ކައިރީގައިވެސް މީގެ ކުރިން ވަނީ މުޒާހަރާކޮށްފައެވެ.
ވެލެންސިއާގެ ބޯޑުން ވަކިކޮށްފައިވާ މެންބަރުންނަކީ އެ ކުލަބުގެ ފައިނޭންސް ޑައިރެކްޓަރުގެ މަގާމުގައި ހުރި ހުސައިން ވަހީދު (ދޮނާ) އާއި، ބޯޑުގެ އާންމު މެންބަރުންގެ ގޮތުގައި ތިބި އަލީ މަމްދޫހް މުޙައްމަދާއ، މިސްބާހް މުޙައްމަދާއި، އިލްމާއު ހުސެއިން (މައު) އަދި ޔޫސުފް ރަމީޒް (ރަމީ) އެވެ. މި މައްސަލަ ސިވިލް ކޯޓަށް ހުށަހެޅީ މި މެންބަރުންނެވެ.
ކޯޓަށް ހުށަހެޅި މައްސަލައިގައި ބުނެފައިވަނީ މިދިޔަ އަހަރުގެ ޑިސެމްބަރު މަހުގެ 11 ވަނަ ދުވަހު އަޒްމީން ވެލެންސިއާގެ ޗެއާމަންގެ މަގާމަށް އައިސްފައިވަނީ، ގަވާއިދާ ޚިލާފަށް ކަމަށާއި، އޭގެ ފަހުން ޑިސެމްބަރު 26 ވަނަ ދުވަހު އަޒްމީން މަގާމުން އިސްތިއުފާދީފައިވާ ކަމަށެވެ.
އަދި އިސްތިއުފާދިނުމަށްފަހު މިދިޔަ ޑިސެމްބަރު މަހުގެ 29 ގައި ބޭއްވި ބައްދަލުވުމެއްގައި ވެލެންސިއާގެ ބޯޑަށް އައްޔަންކުރި ދެ މެންބަރުން ކަމަށްވާ ވެލެންސިއާގެ އެކެޑަމީގެ ކޯޗުކަން ކުރަމުން އަންނަ ކުރީގެ ކުޅުންތެރިޔާ ޔޫސުފް އަޒީމް (ޔޫއްޓޭ) އާއި ވެލެންސިއާގެ ޓީމުގެ މެނޭޖަރުކަން ކޮށްފައިވާ އަޙްމަދު ޝަރީފް (މާޑޭ) އަށް، ވެެލެންސިއާގެ އެއްވެސް ކަމެއްގައި ބައިވެރިނުވެވޭ ގޮތަށް އަމުރެއް ނެރެދިނުމަށް ވަނީ އެދިފައެވެ.
ކޯޓުން ދެ ފަރާތުން ހުށަހެޅި ކަންތައްތަކަށް ބެލުމަށް ފަހު، ނިންމީ ވަގުތީ އަމުރެއް ނެރެދެވެން ނެތް ކަމަށާއި، މިފަދަ ކަންކަމުގައި މީގެ ކުރިން ރާއްޖޭގެ ޝަރުއީ މަރުހަލާގައި ކަންކަން ކޮށްފައިވާ ގޮތަށް ބަލާއިރު، މީގެ އެންމެ ރަނގަޅު ގޮތަކީ މައްސަލައިގައި ހިމެނޭ ފަރާތްތައް، ދެ ފަރާތުގެ ހައްގު ކަށަވަރުވާނެހެން، ކުލަބުގެ ކަންކަން އަމިއްލައަށް ނިންމުން ކަމަށެވެ.
އަދި ކޯޓުން ވަކި ގޮތަކަށް އަމުރުނެރެ މި ވަގުތު ކަމެއްކޮށްފިނަމަ، އެއް ފަރާތަކުން އައިސްފައިވާ މިފަދަ މައްސަލައެއްގައި ވަކި ކޮޅަކަށް ބުރަވެ، ގެއްލުމެއް ލިބިދާނެފަދަ ހާލަތެއް ކުރިމަތިވެދާނެތީ، މި ވަގުތު އަމުރެއް ނެރެދެވެން ނެތް ކަމަށްވެސް ވަނީ ބުނެފައެވެ.