ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ހިންގާ ކޮމިޓީގެ މެންބަރުކަމުގެ މަގާމުން ކުލަބު އީގަލްސްގެ ވައިސް ޗެއާމަން މުފާވިޒް ހާޝިމް (މުފާ) އިސްތިއުފާދެއްވައިފިއެވެ.
މިދިޔަ ދެ ދައުރުގައި ވެސް އެފްއޭއެމްގެ ރައީސްގެ މަގާމުގައި ހުންނެވި ބައްސާމް އަދީލް ޖަލީލްގެ އަރިސް ބޭފުޅެއްގެ ގޮތުގައި މަސައްކަތްކުރެއްވި މުފާ މަގާމުން އިސްތިއުފާދެއްވާފައިވާކަން އޭނާ ވަނީ ކަށަވަރުކޮށްދެއްވާފައެވެ.
މުފާ އަކީ އެފްއޭއެމުން މިދިޔަ ޖެނުއަރީ މަހުގެ 31 ވަނަ ދުވަހު ބާއްވަން އިއުލާނުކުރި އެ އެސޯސިއޭޝަންގެ އިންތިޚާބުގައި ރައީސްގެ މަގާމަށް ކެންޑިޑެސީ ހުށަހެޅުއްވި ބޭފުޅެކެވެ. އެކަމަކު އެ އިންތިޚާބުގެ ކަންކަން ހުއްޓާލަން ފީފާ އާއި އޭއެފްސީން އެ ފަހަރު ވަނީ އަންގާފައެވެ. ފީފާ އާއި އޭއެފްސީން އެގޮތަށް އެންގީ އިންތިޚާބުގައި ރައީސް ކަމަށް ދެން ވާދަކުރައްވަން ހުށަހެޅުއްވި އެ އެސޯސިއޭޝަންގެ ކުރީގެ ރައީސް އަޙްމަދު ޠާރިޤު (ޓޮމް) ގެ ކެންޑިޑެސީ ބާތިލުކުރަން އެފްއޭއެމުގެ އިލެކްޓޯރަލް ކޮމިޓީން ނިންމާފައިވަނިކޮށް، އިލެކްޓޯރަލް ކޮމިޓީ އެކުލަވާލައިފައިވާ ގޮތް ސައްހަ ނޫން ކަމަށް ބަޔާންކޮށެވެ.
އޭގެ ފަހުން މި މަހުގެ އަށްވަނަ ދުވަހު ބޭއްވި އެފްއޭއެމުގެ އެކްސްޓްރާ އޯޑިނަރީ ކޮންގްރެސްއެއްގައި ވަނީ އިންތީޚާބީ ކޮމިޓީތައް އެކުލަވާލާފައެވެ. އަދި މި މަހުގެ ފަހުކޮޅު އައު އިންތިޚާބަކަށް އިއުލާންކުރާނެ ކަމަށް މައުލޫމާތުލިބެއެވެ.
އެފްއޭއެމުގެ ހިންގާ ކޮމިޓީން މުފާ އިސްތިއުފާދެއްވިއިރު، ދެން އޮންނަ އިންތިޚާބެއްގައި ވާދަކުރައްވާނެކަމުގެ އިޝާރާތެއް ބައްސާމް ވަނީ ދެއްވާފައެވެ. އެފްއޭއެމުގެ އިންތިޚާބުގައި ވާދަނުކުރައްވާނެކަމަށް ބައްސާމް މީގެ ކުރިން ވިދާޅުވި ނަމަވެސް، އެފްއޭއެމުގެ އެކްސްޓްރާ އޯޑިނަރީ ކޮންގްރެސްއަށްފަހު މީޑިއާތަކަށް މައުލޫމާތުދެއްވަމުން ބައްސާމް ވިދާޅުވީ ކެންސަލްވި އިންތިޚާބަކީ މުޅިން އެހެން އިންތިޚާބެއް ކަމަށާއި، ކުރިއަށް ދެން އޮތް އިންތިޚާބުގައި ވާދަކުރެއްވުމާ ގުޅޭގޮތުން ވަކި އެއްޗެއް ބުނަން ބޭނުންނުވާ ކަމަށެވެ.