ހުޅުމާލޭގައި އަލަށް ގާއިމުކުރާ ސްވިމިން ޕޫލުގެ މަސައްކަތް ކުރިއަށް އޮތް 18 މަސްދުވަހުގެ ތެރޭގައި ނިންމާލެވޭނެ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ބައިނަލްއަގުވާމީ ފެންވަރުގެ ސްވިމިން ޕޫލެއް ރާއްޖޭގައި ގާއިމުކުރުމަކީ ސްވިމިން އެސޯސިއޭޝަން އޮފް މޯލްޑިވްސް އާއި ރާއްޖޭގެ ފެތުންތެރިން ގިނަ ދުވަސްތަކެއް ވަންދެން ދެކެމުން އަންނަ ހުވަފެނެކެވެ. އެގޮތުން ޕޫލެއް އެޅުމުގެ މަސައްކަތް މީގެ ކުރިން ފެށި ނަމަވެސް، އެ މަސައްކަތް ހުއްޓިފައި އޮންނަތާ ދޮޅު އަހަރު ދުވަސް ވަނީ ވެފައެވެ.
އެއާއެކު ހުޅުމާލޭގައި މި ޕޫލް ގާއިމުކުރުމުގެ މަސައްކަތް މިހާރު ކުރިއަށްދާއިރު، ޕޫލުގެ އިތުރުން ވޯމްއަޕް އޭރިއާ އަކާއި، ހައިޖަމްޕް ކުރެވޭ ގޮތަށް ޕޫލް ވަނީ ފަރުމާކޮށްފައެވެ. މީގެ ކުރިން ހުޅުމާލެގައި 25 މީޓަރުގެ ޕޫލެއް ގާއިމުކޮށްފައިވީ ނަމަވެސް، އަލަށް ގާއިމޔކުރެވިގެންދާނީ އޮލިމްޕިކް ސައިޒުގެ 50 މީޓަރުގެ ޕޫލެކެވެ.
ޕީއެސްއެމުން ގެނެސްދިން "ކުޅިވަރު ވިންދު" ޕްރޮގުރާމުގައި ވާހަކަފުޅުދައްކަވަމުން ރާފިޢު ވިދާޅުވީ ސަރުކާރުގެ އަމާޒަކީ މި މަސައްކަތް ބާރު ސްޕީޑުގައި ކުރިއަށްގެންގޮސް، އެސޯސިއޭޝަނާ ޕޫލް ހަވާލުކުރުން ކަމަށެވެ. އަދި ސަރުކާރުން ކަމާ ގުޅުންހުރި އިދާރާތަކާ ވާހަދައްކައިގެން, ޕޫލުގެ މަސައްކަތް މިހާރު ފެށިފައިވާ ކަމަށްވެސް ވިދާޅުވިއެވެ.
"ސްވިމިން ޕޫލެއްގެ މަސައްކަތް ކުރިއަށް އެ ދަނީ. އެއީ ގާތްގަނޑަކަށް އަހަރެއް ދޮޅު އަހަރެއް ވަންދެން ހުއްޓިފައި އޮތް މަސައްކަތެއް. އިރާދަކުރެއްވިއްޔާ އަޅގަނޑުމެން އޮލިމްޕިކް ސްޓޭންޑަޑުގެ ޕޫލެއް އަޅައިދޭނަން.ޢަބްދުﷲ ރާފިޢު - ކުޅިވަރާއި ހަށިހެޔޮކަމާ ބެހޭ ވަޒީރު
މި ވަސީލަތްތަކާއެކު ކުޅިވަރަށް އިންގިލާބީ ބަދަލެއް ގެނެވިދާނެކަން ވަޒީރު ވަނީ ފާހަގަކުރައްވާފައެވެ. ރާއްޖޭގައި ކުޅިވަރު ކުރިއަރުވަން ކުރަން ހުރި މަސައްކަތްތައް ގިނަ ކަމަށާއި، އެ ގޮތުން މި ވަގުތު ހުރި ކުޅިވަރު ވަސީލަތްތަކަށް ގެންނަން ޖެހޭ ބަދަލުތައް ގެނެސްގެން، އެތުލީޓުންނަށް މީގެ އެންމެ ރަނގަޅު މަންފާކުރާނެ ގޮތަކަށް ކަަންކަން ބައްޓަންކުރުން މުހިންމު ކަމަށްވެސް ވިދާޅުވިއެވެ.
ރާއްޖޭގައި ބައިނަލްއަގުވާމީ ފެންވަރުގެ ސްވިމިން ޕޫލެއް އެޅުމުގެ އަމާޒުގައި މަސައްކަތްކުރަމުން އަންނަތާ އެތައް ޒަމާނެއް ވަނީ ވެފައެވެ. އެގޮތުން ވޭތުވެދިޔަ ސަރުކާރުތަކުން އެކި ފެންވަރުގައި އެކި މަސައްކަތްތަކެއް ވަނީ ކޮށްފައެވެ. އެކަމަކު ދިމާވި އެކި މައްސަލަތަކާ ގުޅިގެން ޕޫލުގެ މަސައްކަތް އޮތީ މަޑުޖެހިފައެވެ.