ރާއްޖޭގެ ކުޅިވަރުގައި ހަރަކާތްތެރިވެފައިވާ ލެޖެންޑުންނަށް އަމާޒުކޮށްގެން ތައްޔާރުކުރަމުންދާ "ނެޝަލަންސް ސްޕޯޓްސް ވެޓެރަންސް އެމްބެސެޑަރސް" ދަފުތަރުގައި ރަޖިސްޓްރީވުމުގެ ފުރުސަތު ކުޅިވަރާއި ހަށިހެޔޮކަމާ ބެހޭ ވުޒާރާއިން ހުޅުވާލައިފިއެވެ.
މިކަން އިއުލާންކުރެއްވީ ހެންވޭރު ބޯޅަގޭގެ ސެމިނާ ރޫމުގައި މިއަދު ބޭއްވި ނޫސްވެރިންގެ ބައްދަލުވުމުގައި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އާއި ކޮމިޝަނަރ އޮފް ސްޕޯޓްސް މުޙައްމަދު ޠަލާލެވެ. މި ދަފުތަރު އެކުލަވާލާނީ 2015 ވަނަ އަހަރުން ފެށިގެން އަމަލުކުރަމުން އަންނަ ކުޅިވަރާ ބެހޭ ގާނޫނުގެ 13 ވަނަ މާއްދާއިން ބާރު ލިބިގެން ހަދާފައިވާ އުސޫލެއްގެ ތެރެއިންނެވެ.
މި ބައްދަލުވުމުގައި ރާފިޢު ވިދާޅުވީ ކުޅިވަރާ ބެހޭ ވުޒާރާގެ ޕޯޓަލް މެދުވެރިކޮށް ވެޓެރަންސް އެމްބެސެޑަރުންގެ ދަފުތަރުގައި ރަޖިސްޓަރީވުމަށް ހުޅުވާލެވިފައިވާނެ ކަމަށެވެ. އަދި ޕޯޓަލް މެދުވެރިކޮށް ކޮންމެ ފަރާތަކަށްވެސް ނަން ހުށަހެޅޭއިރު، ފޮނުވާ މައުލޫމާތުތައް ސައްހަތޯ ކަނޑައެޅުމުގެ ކަންކަން ކުރާނީ ކޮމިޓީއަކުންނާއި އެސޯސިއޭޝަންތަކުގެ އެހީގައި ކަމަށްވެސް ވިދާޅުވިއެވެ.
ވެޓެރަންސް އެމްބެސެޑަރުންގެ ދަފުތަރު އެކުލަވާލާ ކޮމިޓީގައި ހިމެނޭނީ ކުޅިވަރާ ބެހޭ ވަޒީރު އައްޔަންކުރައްވާ ފަސް މެންބަރުންނެވެ. އެ ކޮމިޓީން ހުރިހާ ކަންކަމެއް ބަލައި ސާފުކޮށް، އެމްބެސަޑަރުންގެ ގޮތުގައި ހޮވާ ފަރާތްތަކާއެކު ޚާއްސަ އިގުރާރެއްގައި ސޮއިކުރާނެއެވެ.
ރާފިޢު ވިދާޅުވީ ވެޓެރަންސް އެމްބެސެޑަރުންގެ ދަފުތަރެއް އެކުލަވާލުވުމުގެ ބޭނުމަކީ ގައުމީ ނުވަތަ ބައިނަލްއަގުވާމީ ފެންވަރުގައި ކުޅިވަރު ކުޅެ، ގިނަގުނަ ކާމިޔާބު ހޯދާފައިވާ ފަރާތްތަކާއި، އަދި ކުޅިވަރަށް ޚިދުމަތް ކޮށްދީފައިވާ ފަރާތްތަކުގެ އަގުވަޒަންކޮށް، އެ ފަރާތްތަކަށް ހިތްވަރުދީ އަދި ކުޅިވަރުގެ މާހައުލުގައި ދެމިތިބުމުގެ ޝައުގުވެރިކަން އުދެއްދުން ކަމަށެވެ. އަދި ކުޅިވަރުގެ ދާއިރާއިން އެފަދަ އެތުލީޓުން ފާހަގަކުރަންޖެހޭ ކަމަށާއި، އެ ބޭފުޅުންނަކީ މުޖުތަމައުގައި ގަދަރުވެރި ބައެއްގެ ގޮތުގައި އުޅެވޭނެ މަގުފަހިވެފައި އޮންނަން ޖެހޭ ކަމަށްވެސް ވިދާޅުވިއެވެ.
ވެޓެރަންސް އެމްބެސެޑަރުންގެ ދަފުތަރުގައި ރަޖިސްޓްރީވުމަށް ހުށަހަޅާއިރު، ނުވަ ޝަރުތެއް ފުރިހަމަވާން ޖެހެއެވެ. އަދި މި ދަފުތަރުގައި ހިމެނޭ އެމްބެސަޑަރުންގެ ޒިންމާތަކާއި ލިބޭ މަންފާތަކެއްވެސް ވަނީ އެކުލަވާލާފައެވެ. އެގޮތުން ލިބޭ މަންފާތަކަށް ބަލާއިރު، ގައުމީ ނުވަތަ ބައިނަލްއަގުވާމީ ފެންވަރުގައި ބޭއްވޭ ކުޅިވަރުގެ ހަރަކާތްތަކުގައި ވެޓެރަންސް އެމްބެސަޑަރެއްގެ ގޮތުގައި ބައިވެރިވުމުގެ ފުރުސަތުދިނުމާއި، ޚަރަދުތައް ހަމަޖައްސައިދިނުމުގެ އިތުރުން، އެބެސަޑަރެއްގެ ޝަރަފުގައި ދޭ މެޑަލް ނުވަތަ ބެޖް އެރުވުން ހިމެނެއެވެ. އަދި ސްޕޯޓްސް މެޑިކަލް އިންޝިއުރަންސް ހަމަޖައްސައިދީ، މާލީ އިދާރާތަކުން ލިބެން ހުންނަ އެހީތެރިކަންވެސް ހޯދައިދިނުން ވަނީ ހިމަނާފައެވެ.
ނޫސްވެރިންގެ މި ބައްދަލުވުމުގައި ޠަލާލް ވަނީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ސަރުކާރުގެ ފުރަތަަމަ 100 ދުވަހުގެ ތެރޭގައި މުހިންމު ކަމެއްގެ ގޮތުގައި ދެކިގެން، ކުރީގެ ކުޅިވަރު ކުޅުންތެރިންނާއި ޚިދުމަތްތެރިންނަށް އެމްބެސަޑަރުންގެ ގޮތުގައި ކަންކަން ފަހިކޮށްދޭން ނިންމި ނިންމުމަށް މަރުހަބާ ދަންނަވާފައެވެ.
ވެޓެރަންސް އެމްބެސެޑަރުންގެ ދަފުތަރުގައި ރަޖިސްޓަރީވުމުގެ ފުރުސަތު މިހާރު ހުޅުވާލާފައިވާއިރު، އެމްބެސަޑަރެއްގެ ގޮތުގައި ހަމަޖެއްސުމަށްފަހު، އެ ދަފްތަރުން ނަން އުނިކުރެވޭ ތިން ހާލަތެއްވެސް އުސޫލުގައި ވަނީ ހިމަނާފައެވެ.