މިއަހަރު މާފުށީގައި ޑޮލަރު އޭޓީއެމް ބަހައްޓާނެ: ރައީސް

މާފުށީގައި މިއަހަރު ތެރޭގައި ޑޮލަރު އޭޓީއެމްއެއް ބަހައްޓާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވި ސަރުކާރުން މިހާރު ކުރިއަށްގެންދާ "ރައީސްގެ ޖަވާބު" ޕްރޮގްރާމުގެ ތެރެއިން އާންމު ރައްޔިތަކު ކުރި ސުވާލަށް ޖަވާބު ދެއްވަމުންނެވެ. ރައީސްއާ ސުވާލު ކުރީ ކ. މާފުށީ، ޖަންބުމާގޭ އަހުމަދު ސަމީރެވެ.

އަހުމަދު ސަމީރު ވަނީ މާފުއްޓަށް ރައީސުލްޖުމްހޫރިއްޔާ ވެވަޑައިގެންފައިވާ ވަޢުދުތަކާ ގުޅޭގޮތުން ސުވާލުކޮށްފައެވެ. އެގޮތުން އެ ރަށުގައި ޑޮލަރު އޭޓީއެމެއް ބަހައްޓާނެ ކަމަށް އެމަނިކުފާނު ވަޢުދުވެވަޑައިގެންފައިވާއިރު އެ ވަޢުދުފުޅު ފުރިހަމަވާނީ ކޮންއިރަކުތޯ އޭނާ ސުވާލު ކުރިއެވެ.

އެ ސުވާލަށް ޖަވާބު ދެއްވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، މާފުށީގައި ޑޮލަރު އޭޓީއެމެއް ބެހެއްޓުމަކީ ކޮންމެހެން ކުރަން ޖެހޭ ކަމެއް ކަމަށެވެ. އެ މަސައްކަތް ބީއެމްއެލްއާ ގުޅިގެން ކުރިއަށްގެންދަވާނެކަމަށްވެސް އެމަނިކުފާނު ވިދާޅުވިއެވެ.

"އަޅުގަނޑުމެން ބޭންކް އޮފް މޯލްޑިވްސްއާ ވާހަކަދައްކައިގެން އިރާދަކުރެއްވިއްޔާ މިއަހަރު ތެރޭގައި އަޅުގަނޑުގެ ޓާގެޓަކީ ވީހާވެސް އަވަހަށް އެ އޭޓީއެމް ބެހެއްޓުން. ވަރަށް މަސައްކަތް ކުރާނަން،" ރައީސް ވިދާޅުވިއެވެ.

މާފުށީގެ ބިން ހިއްކުމާ ގުޅޭގޮތުން ރައީސް ވެވަޑައިގެންފައިވާ ވަޢުދުފުޅާ ގުޅޭގޮތުންވެސް އަހުމަދު ސަމީރު ސުވާލު ކުރިއެވެ. އެ ސުވާލާ ގުޅިގެން ރައީސް ވިދާޅުވީ އެ މަޝްރޫޢުގެ މަސައްކަތް ސީދާ މިއަހަރު ތެރޭގައި ނުފެށުނު ނަމަވެސް ވީހާވެސް އަވަހަށް އެ މަޝްރޫޢުގެ މަސައްކަތް ފަށްޓަވާނެ ކަމަށެވެ. އެމަނިކުފާނު މަސައްކަތް ކުރައްވަނީ ދައުރުގެ ފަހު އަހަރަށް މަޝްރޫޢުތައް ބަހައްޓަން ނޫން ކަމަށާއި، ރައްޔިތުންނަށް ފައިދާ ހުރި އެފަދަ މަޝްރޫޢުތައް ވީހާވެސް އަވަހަށް ކުރިއަށްގެންދަން ބޭނުންފުޅުވާކަމަށް ރައީސް ވިދާޅުވިއެވެ.

މާފުއްޓަކީ ރާއްޖޭގައި މީހުން ދިރިއުޅޭ ރަށްތަކުގެ ތެރެއިން ލޯކަލް ޓޫރިޒަމް އެންމެ ފުޅާކޮށް ކުރަމުން އަންނަ އެއް ރަށެވެ. އެ ރަށުގައި ޑޮލަރު އޭޓީއެމްއެއް ނެތުމާއި މީހުން ދިރިއުޅެން އަދި ފަތުރުވެރިކަމުގެ ވިޔަފާރި ފުޅާކުރަން އިތުރު ބިން ނެތުމަކީ އެ ރަށުގެ ރައްޔިތުންގެ ކަންބޮޑުވުމެކެވެ.