ވޮލީބޯލް އެސޯސިއޭޝަން އޮފް މޯލްޑިވިސް (ވީއޭއެމް) ގެ ރައީސް މުޙައްމަދު ރަނޭޝްގެ ސްޕެޝަލް އެޑްވައިޒަރަކަށް އެ އެސޯސިއޭޝަންގެ ކުރީގެ ރައީސް މުޙައްމަދު ލަތީފް އައްޔަންކުރައްވައިފިއެވެ.
އެ އެސޯސިއޭޝަނުން އިއްޔެ ނެރުނު ނޫސް ބަޔާނެއްގައި އެކަން ހާމަކުރި ނަމަވެސް، މީގެ ދުވަސް ކޮޅެއް ކުރިން ލަތީފް މަގާމަށް އައްޔަންކުރައްވާފައިވާ ކަމަށް ވަނީ މައުލޫމާތު ލިބިފައެވެ. އެ ބަޔާނުގައި ވަނީ ވޮލީއަށް ލަތީފް ކޮއްދެއްވަމުންގެންދަވާ ޚިދުމަތްތަކާއި، ބައިނަލްއަގުވާމީ މައިދާނުގައި ލަތީފް ކުރައްވަމުންގެންދަވާ ޚިދުމަތްތައް ފާހަގަކޮށް، މަގާމަށް އަޔަންކުރެއްވިކަންވެސް ފާހަގަކޮށްފައެވެ.
މީގެ އިތުރުން 2016 އަހަރުން ފެށިގެން 2020 ވަނަ އަހަރާ ހަމައަށް ވޮލީގެ ރައީސްކަމުގައި ލަތީފް ހޭދަކުރެއްވި މުއްދަތުގައި ގެނައި ބަދަލުތަކާއި، ސެންޓްރަލް އޭޝިއާ ވޮލީބޯލް އެސޯސިއޭޝަން (ކާވާ) އާއި އޭވީސީގައި ވޮލީ ކުރިއެރުވުމަށް ލަތީފް ކުރައްވަމުންގެންދަވާ މަސައްކަތްތައްވެސް ވަނީ ފާހަގަކޮށްފައެވެ. އަދި ލަތީފުގެ އެޑްވައިޒަރުކަމުގައި ވޮލީގެ ކުރިއެރުމަށް ގިނަގުނަ މަސައްކަތްތަކެއް ކޮށްދޭނެކަމުގެ ޔަގީންކަން އެ އެސޯސިއޭޝަނަށް އެބައޮތް ކަމަވެސް ބަޔާނުގައި ވަނީ ހިމަނާފައެވެ.
މި މަގާމަށް ރަސްމީކޮށް ލަތީފް އައްޔަންކުރެއްވިއިރު، ދާދި ފަހުން އެ އެސޯސިއޭޝަނުގެ ޖެނެރަލް ސެކްރެޓަރީގެ މަގާމަށް މުޙައްމަދު ސައީދުވެސް ވަނީ އައްޔަންކުރައްވާފައެވެ. ވީއޭއެމުގެ ކަންކަން މި ފަހުން ހަމަޔަކަށް އެޅެމުން އަންނައިރު، އެ އެސޯސިއޭޝަނުގެ އެކްސްޓްރާ އޯޑިނަރީ ކޮންގްރެސްއެއް މިރޭ ބޭއްވުމަށް ވަނީ ތާވަލުކޮށްފައެވެ.