އެމްޕީއެލް ދެވަނަ ޑިވިޝަނުގެ ފައިނަލަށް ދަތުރުކޮށް، ފުރަތަމަ ޑިވިޝަނުގެ ޖާގައެއް މަސްއޮޑި ސްޕޯޓްސް ކުލަބުން ހޯދުން އެއީ ލިބިގެންދިޔަ ވަރަށް ބޮޑު ހިތްހަމަޖެހުމެއް ކަމަށް އެ ޓީމުގެ ކޯޗު މުޙައްމަދު އާތިފް (އާތީ) ބުނެފިއެވެ.
ފުރަތަމަ ޑިވިޝަނަށް ޓީމު ކޮލިފައި ކޮށްދިނުމަށްފަހު ދިން އިންޓަވިއުއެއްގައި އާތީ ބުނީ ޓީމާ ހަވާލުވީވެސް ފުރަތަމަ ޑިވިޝަނަށް ގެންދިޔުމުގެ އަޒުމުގައި ކަމަށެވެ. އަދި އުނދަގޫ ދަތުރެއް ނަމަވެސް، އެކަން ހާސިލުވުމުން ލިބުނު ހިތްހަމަޖެހުން ބޮޑުކަން އޭނާ ފާހަގަކުރިއެވެ.
އާތީ ބުނީ ކޯޗު ބޭނުންވި ހިސާބަށް ޓީމަށް ދެވިއްޖެ ކަމަށާއި، މިހިސާބަށް އައިރު ޓީމުގައި އެންމެ އުނދަގޫވި މައްސަލައަކީ ފިޓްނަސް ކަމަށާއި، ގޯލްޑަން ފުޓްސަލް ޗެލެންޖް ކުރިޔަށްދާތީވެ މެޗުތަކުގައި ކުޅުންތެރިންނަށް ވަރަށް ބޮޑަށް ބަލައިގެން، އަރާމުކުރުމުގެ ފުރުސަތުދީގެން ކުރިއަށްދިޔަ ކަމަށެވެ.
"މަސްއޮޑި ޓީމުން ހަވާލުކުރި މަސްއޫލިއްޔަތަކީ ފަސްޓް ޑިވިޝަނަށް ޕްރޮމޯޓުކޮށްދިނުން. އިރާދަކުރެއްވީތީ އެކަން ހާސިލުވެފައި މިއޮތީ.މުޙައްމަދު އާތިފް (އާތީ) - މަސްއޮޑީގެ ކޯޗު
އާތީ ވަނީ ޓީމުގެ ފިޒިކަލް ފިޓްނަސް އޮންނަނީ ކޯޗުގެ އަތްމަތީގައި ނޫންކަން ފާހަގަކޮށްފައެވެ.
މަސްއޮޑި ޓީމުން މުބާރާތުގެ ފައިނަލުގެ ޖާގައެއް ހޯދައި، ފުރަތަމަ ޑިވިޝަނަށް ކޮލިފައިވީ ސެމީ ފައިނަލް މެޗުގައި ޓެންޓް ސްޕޯޓްސް ކުލަބު 5-1 ގެ ނަތީޖާއަކުން ބަލިކުރުމަށްފަހުއެވެ. ފައިނަލުގައި މަސްއޮޑި ނުކުންނާނީ ވިކްޓަރީ ސްޕޯޓްސް ކުލަބާ ދެކޮޅަށެވެ. މިދިޔަ ސީޒަނުގެ ތިންވަނަ ޑިވިޝަނުގެ ފައިނަލުގައި މަސްއޮޑި ވާދަކުރިއިރު، އެ ފައިނަލުން އެ ޓީމު ވަނީ ބަލިވެފައެވެ.