އިނގިރޭސިވިލާތުގައި ހުންނެވި ކުރީގެ ރައީސް މުޙައްމަދު ނަޝީދުގެ ބޭސްފަރުވާއަށް އިތުރުކޮށްދެއްވި 30 ދުވަހުގެ މުއްދަތު މޯލްޑިވްސް ކަރެކްޝަނަލް ސަރވިސްއިން އަނބުރާ ގެންދަވައިފިއެވެ.
ކަރެކްޝަން ސަރވިސް އިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮމިޝަނަރ އޮފް ޕްރިޒަންސް މުޙައްމަދު ހުޝާމް ވިދާޅުވީ، ކުރީގެ ރައީސް މުޙައްމަދު ނަޝީދަށް ބޭސްފަރުވާ ކުރުމަށް އިތުރުކޮށްދެއްވި 30 ދުވަހުގެ މުއްދަތު އަނބުރާ ގެންދެވީ ސާރޖަރީއެއް ހައްދަވަން ނުޖެހޭކަމަށް އެމަނިކުފާނުގެ ވަކީލުން ވިދާޅުވަމުންދާތީ ކަމަށެވެ. ހުޝާމް ވިދާޅުވީ، ރައީސް ނަޝީދުގެ ފަރާތުން މިދިޔަ ބުރާސްފަތި ދުވަހު ހުށަހެޅުއްވި މެޑިކަލް ޑޮކިއުމަންޓްތަކުގައި މިމަހުގެ 19 ވަނަ ދުވަހު އެމަނިކުފާނު ސާރޖަރީއަކަށް ވަޑައިގަންނަވާ ވާހަކަ ބަޔާންކުރައްވާފައިވާ ކަމަށެވެ. އެހެންކަމުން އެމަނިކުފާނުގެ ފަރާތުން ހުށަހަޅުއްވާފައިވާ މެޑިކަލް ޑޮކިއުމަންޓްތަކުގައި ހުރި މަޢުލޫމާތުގެ ސައްޙަކަން ބަލަމުންދާ ކަމަށް އޭނާ ވިދާޅުވިއެެވެ.
ނަޝީދުގެ ބޭސްފަރުވާގެ މުއްދަތު ކަރެކްޝަނަލް ސަރވިސް އިން އިތުރުކޮށްދެއްވީ އިއްޔެގައެވެ. ކަރެކްޝަނަލް ސަރވިސްއިން ކުރީގެ ރައީސް މުޙައްމަދު ނަޝީދު ރާއްޖޭން ބޭރަށް ބޭސް ފަރުވާއަށް ދިއުމުގެ ހުއްދަ ދެއްވާފައިވަނީ މިއަހަރުގެ ޖެނުއަރީ 18 ވަނަ ދުވަހެވެ.