ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އިންތިޚާބުގައި ވާދަކުރައްވާނެކަމުގެ އިޝާރާތެއް އެ އެސޯސިއޭޝަނުގެ ރައީސްކަމުގައި މި ވަގުތު ހުންނެވި ބައްސާމް އަދީލް ޖަލީލް ދެއްވައިފިއެވެ.
ޗަމްޕާ ސެންޓްރަލް ހޮޓަލުގައި މިއަދު ބޭއްވި އެފްއޭއެމުގެ އެކްސްޓްރާ އޯޑިނަރީ ކޮންގްރެސްގައި ނޫސްވެރިންނާ ވާހަކަދައްކަމުން ބައްސާމް ވަނީ އިންތިޚާބުގައި ވާދަކުރެއްވުމާ ގުޅޭގޮތުން ވަކި އެއްޗެއް ބުނަން ބޭނުންނުވާ ކަމަށް ވިދާޅުވެފައެވެ.
މީގެ ކުރިން ބައްސާމް ވަނީ މިދިޔަ ޖެނުއަރީ މަހުގެ 31 ވަނަ ދުވަހު ބާއްވަން ތާވަލުކުރި އެ އިދާރާގެ އިންތިޚާބުގައި ވާދަނުކުރައްވާނެކަން އިއުލާން ކުރައްވާފައެވެ. އެކަމަކު މިއަދު ބޭއްވި ނޫސްވެރިންގެ ބައްދަލުވުމުގައި ބައްސާމް ވިދާޅުވީ އެއީ މުޅިން އެހެން އިންތިޚާބެއް ކަމަށާއި، އެ އިންތިޚާބު މިހާރު ކެންސަލް ކޮށްފައިވާ ކަމަށެވެ.
"އައު އިންތިޚާބެއްގައި ވާދަކުރެއްވުމަށް އަޅުގަނޑު އަދި ވަކި ގޮތެއް ނުވިސްނަން. އަޅުގަނޑު އަަބަދުވެސް ބުނާ ވާހަކައެއް އެއީ މެންބަރު ކުލަބުތަކުން ބޭނުންވާ ގޮތަކަށް އަޅުގަނޑު އަމަލުކުރާނެކަން.ބައްސާމް އަދީލް ޖަލީލް - އެފްއޭއެމުގެ ރައީސް
އެފްއޭއެމުން މި ފަހުން ކެންސަލްކުރި އިންތިޚާބުގައި ވާދަކުރައްވަން ހުށަހެޅުއްވީ އެ އެސޯސިއޭޝަންގެ ކުރީގެ ރައީސް އަޙްމަދު ޠާރިޤު (ޓޮމް) އާއި ކުލަބު އީގަލްސްގެ ވައިސް ޗެއާމަން މުފާވިޒް ހާޝިމް (މުފާ) އެވެ. އެކަމަކު އެ އިދާރާގެ އިންތިޚާބުގެ ކަންކަން ހުއްޓާލަން ފީފާ އާއި އޭއެފްސީން މީގެ ކުރިން ވަނީ އަންގާފައެވެ. ފީފާ އާއި އޭއެފްސީން އެގޮތަށް އެންގީ އިންތިޚާބުގައި ރައީސް ކަމަށް ވާދަކުރައްވަން ހުށަހެޅުއްވި ޠާރިޤުގެ ކެންޑިޑެސީ ބާތިލުކުރަން އެފްއޭއެމުގެ އިލެކްޓޯރަލް ކޮމިޓީން ނިންމާފައިވަނިކޮށް، އިލެކްޓޯރަލް ކޮމިޓީ އެކުލަވާލައިފައިވާ ގޮތް ސައްހަ ނޫން ކަމަށް ބަޔާންކޮށެވެ.
އެފްއޭއެމުގެ ރައީސްކަމުގައި ދެވަނަ ދައުރެއް ފުރުއްވަމުން އަންނަ ބައްސާމް، އިންތިޚާބުގައި ވާދަކުރައްވާނެކަމުގެ އިޝާރާތެއް ދެއްވިއިރު، އޭނާގެ މައްޗަށް ޕްރޮސެކިއުޓަރ ޖެނެރަލްގެ އޮފީހުން ވަނީ ޚިޔާނާތްތެރިވުމާއި މަނީލޯންޑަރިންގެ ދަޢުވާ އުފުލާފައެވެ.