ރާއްޖޭގެ ކަރަންޓްގެ އަގަށް ގެންނެވި ބަދަލުގައި އަތޮޅުތަކުގެ ކަރަންޓްގެ ރޭޓް އަލުން މުރާޖަޢާކުރައްވައި އެކަމަށް ގެންނަވާ ބަދަލު އަންނަ ހަފުތާގައި ސަރުކާރުން އިޢުލާން ކުރައްވާނެކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
ހުވަދު އަތޮޅު ދެކުނުބުރިއަށް މިއަދު ފެއްޓެވި ދަތުރުފުޅުގައި ކަނޑުހުޅުދޫ ރައްޔިތުންނާ ބައްދަލުކުރައްވައި، ރައީސުލްޖުމްހޫރިއްޔާ ދެއްކެވި ވާހަކަފުޅުގައި ވިދާޅުވީ ދާދިފަހުން ރާއްޖޭގައި ކަރަންޓް އަގަށް ގެންނެވި ބަދަލުގައި، އަތޮޅުތަކުގެ ބައެއް ހިސާބުތަކުގެ ކަރަންޓްގެ ކަންކަމުގައި ކުރިން އިންތިޒާރު ނުކުރައްވާ ނަތީޖާއެއް ނިކުމެފައިވާކަން ފާހަގަކުރެއްވިފައިވާ ކަމަށެވެ. އަދި މިކަމުގައި ރައްޔިތުން ކެތްތެރިވެވަޑައިގެން އިންތިޒާރުކޮށްދެއްވުމަށް ރައީސުލްޖުމްހޫރިއްޔާ އެދިވަޑައިގެންނެވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި ރާއްޖޭގެ ރައްޔިތުންނަށް ބޯހިޔާވަހިކަން ފޯރުވައިދެއްވުމުގެ ބޮޑު މަޝްރޫޢު އަންނަ އަންގާރަ ދުވަހުގެ ރޭ އިފްތިތާޙު ކުރައްވާނެކަންވެސް މިއަދު އިޢުލާންކުރައްވާފައިވެއެވެ. އެއީ، ބޭރުގެ އިންވެސްޓްމަންޓްތަކެއްގެ ތެރެއިން، 15،000 ފްލެޓް އެޅުންކަމަށް ރައީސް ހާމަކުރެއްވިއެވެ.