ގަތަރުގައި މިހާރު ކުރިއަށްދާ އޭއެފްސީ އޭޝިއަން ކަޕުގެ ސެމީ ފައިނަލް ފުރަތަމަ ޖާގަތައް ދެކުނު ކޮރެއާ އާއި ޖޯޑަންއިން ހޯދައިފިއެވެ.
ސެމީގެ ޖާގައެއް ދެކުނު ކޮރެއާއިން ހޯދީ ރޭ ކުޅުނު ކުއާޓާ ފައިނަލް މެޗުގައި އިތުރު ވަގުތުގެ ދެ ހާފު ކުޅެ 2-1 ގެ ނަތީޖާއަކުން އޮސްޓްރޭލިއާ ބަލިކޮށްގެންނެވެ. އޭޝިއަން ކަޕުގެ ޗެމްޕިއަންކަން ދެ ފަަހަރު ހޯދާފައިވާ ދެކުނު ކޮރެއާއިން މި ފަހަރުގެ މުބާރާތުގެ ނޮކައުޓް ބުރުގައި ކުޅުނު ދެ މެޗުވެސް ސަލާމަތްވީ އިތުރު ވަގުތުގައި ލަނޑު ޖަހައިގެންނެވެ.
އަލް ޖަނޫބް ސްޓޭޑިއަމުގައި ކުޅުނު މި މެޗުގައި އެންމެ ފުރަތަމަ ލަބޑު ޖަހައި ލީޑު ނެގީ އޮސްޓްރޭލިއާއިންނެވެ. މެޗުގެ 42 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ކްރެއިގް ގުޑްވިންއެވެ. އެކަމަކު މެޗުގެ އިތުރު ވަގުތުގެ ހަވަނަ މިނެޓުގައި ލިބުނު ޕެނަލްޓީއަކުން ހްވާން ހީ-ޗަން ވަނީ ދެކުނު ކޮރެއާއަށް ނަތީޖާ އެއްވަރުކޮށްދީފައެވެ. މިއީ އޭރިއާ ތެރެއިން ދެކުނު ކޮރެއާގެ ކެޕްޓަން ސޮން ހެއުން-މިންއަށް ކުރި ފައުލަކާ ގުޅިގެން ދިން ޕެނަލްޓީއެކެވެ.
އެއާއެކު ނަތީޖާ ނެރުމަށް އިތުރު ވަގުތުގެ ދެ ހާފު ކުޅުނުއިރު، މި މެޗުން ކޮރެއާ މޮޅުވީ ފުރަތަމަ ހާފުގައި އެ ޓީމުގެ ހިލޭ ޖެހުމަކުން ސޮން ކާމިޔާބުކޮށްދިން ލަނޑުންނެވެ. އަދި މި ހާފުގެ އިތުރު ވަގުތުގައި އޮސްޓްރޭލިއާގެ އައިޑެން އޮނީލްއަށް ވަނީ ސީދާ ރަތް ކާޑެއްވެސް ދައްކާފައެވެ.
މީގެ އިތުރުން މި މުބާރާތުގެ ސެމީގެ ޖާގައެއް ޖޯޑަންއިން ހޯދީ އިއްޔެ ކުޅުނު ކުއާޓާ ފައިނަލް މެޗުގައި ރާއްޖޭގެ ގައުމީ ޓީމުގެ ކުރީގެ ކޯޗު ޕީޓާ ސެގާޓް އިރުޝާދުދެމުން އަންނަ ތަޖިކިސްތާން އަތުން 1-0 ގެ ނަތީޖާއަކުން މޮޅުވެގެންނެވެ. އަހްމަދު ބިން އަލީ ސްޓޭޑިއަމުގައި ކުޅުނު މި މެޗުގައި ޖޯޑަންއިން ކާމިޔާބުކުރި ހަމައެކަނި ލަނޑަކީ މެޗުގެ 66 ވަނަ މިނެޓުގައި ތަޖިކިސްތާންގެ ވަހުދަތު ހަނޯނޯވް އަތުން ބައިކޮޅަށް ވަން ލަނޑެކެވެ.
މި މޮޅާއެކު ޖޯޑަން ވަނީ މި މުބާރާތުގެ ތާރީޚުގައި ފުރަތަމަ ފަހަރަށް ސެމީ ފައިނަލުގެ ޖާގައެއް ހޯދާފައެވެ. މީގެ ކުރިން 2004 އަދި 2011 ވަނަ އަހަރުގެ ކުއާޓާގައި ކުޅެ ބަލިވި ޖޯޑަންއިން ސެމީގައި ނުކުންނާނީ ޔާގަން ކްލިންސްމަން ކޯޗުކޮށްދޭ ދެކުނު ކޮރެއާއާ ދެކޮޅަށެވެ.