ބާސްކެޓްބޯޅައަކީ ރާއްޖޭގައި މިހާރު އެންމެ ޑިމާންޑް ބޮޑު އެއް ކުޅިވަރު ކަމަށް ތަޖުރިބާކާރު ކޯޗު އިލްޔާސް އިބްރާހީމް (އިއްލެ) ބުނެފިއެވެ.
ދިވެހިރާއްޖޭގެ އަޑުން ގެނެސްދިން "ސްޕޯޓްސް ބަޒް" ޕްރޮގްރާމުގައި ވާހަދައްކަމުން އިއްލެ ބުނީ ރާއްޖޭގެ ބާސްކެޓަށް ދިމާވާ އެންމެ ބޮޑު ގޮންޖެހުމަކީ ކުޅޭނެ ތަނެއް ނެތުން ކަމަށާއި، ބާސްކެޓަށް ޚާއްސަކުރެވިގެން މާލެގައި އޮތީ ހަމައެކަނި އެންމެ ދެ ކޯޓު ކަމަށެވެ. އަދި ބާސްކެޓް ކުޅޭނެ ކުދިން އިތުރުވުމުގެ ސަބަބުން މި ވަގުތު ކުލަބުތަކަށް ފައިސާ ހޯދުމަށް އޮތް މަގެއް ކަމަށްވާ ކުލަބުތަކުގެ އެކެޑަމީތަކަށް ދަތިތަކެއް ކުރިމަތިވެފައިވާ ކަމަށްވެސް ބުންޏެވެ.
މީގެ ކުރިން ރާއްޖޭގެ ގައުމީ ބާސްކެޓްބޯޅަ ޓީމުގެ ކޯޗަކަންވެސް ކުރި އިއްލެ ބުނީ ހާލަތުގެ ގޮތުން ފައިސާ ހޯދުމަށް މަގެއް ލިބިފައި އޮތް ނަމެވެސް، ތަނުގެ ދަތިކަމާހުރެ އުނދަގޫތަކެއް ދިމާވެފައިވާ ކަމަށެވެ. އަދި އެކެޑަމީތައް ރާއްޖޭގައި ހިންގި ނަމަވެސް، އެކެޑަމީތަކަށް ބެލެހެއްޓެނީ އެ އެކެޑަމީއެއްގެ ޚަރަދު އެކަނި ކަމަށްވެސް ބުންޏެވެ.
ކުލަބުތަކަށް ޚަރަދު ހޯދެން އަންނީ އޭގެއިން އިތުރަށް އެއްޗެއް ހޯދައިގެންކަން ފާހަގަކުރަމުން ރެޑްލައިނާ އާއި ޓީރެކްސްއަށް މީގެ ކުރިން ކުޅުނު އިއްލެ ބުނީ އެ ފުރުސަތުގެ ބޭނުން ކުޅިވަރަށް ހިފޭނީ މިހާރު ހުރި ކުޅިވަރު ވަސީލަތްތައް ތަރައްގީވެގެން ކަމަށެވެ.
"ނުވަ އެކެޑަމީ އާއި ރާއްޖޭގެ ފަސްޓް ޑިވިޝަން ހުރިހާ ކުލަބަކާއި، ސެކަންޑް ޑިވިޝަން ހުރިހާ ކުލަބަކާއި ދެންހުރި ބައެއްވެސް ކުޅެން މި އޮންނީ ދެ ކޯޓު ރާއްޖޭގައި.އިލްޔާސް އިބްރާހީމް (އިއްލެ) - ތަޖުރިބާކާރު ކޯޗު
އިއްލެ ބުނީ މިހާރު ދެވޭ ވަގުތަށް ވުރެން ގިނަ ވަގުތު އެކެޑަމީތަކަށް ދެވޭކަމުގައި ވަނީނަމަ، މިހާރު އެކެޑަމީތަކަށް ލިބޭ ވަރަށްވުރެން ރަނގަޅު އެއްޗެއް އާމްދަނީއެއްގެ ގޮތުގައި ލިބޭނެ ކަމަށެވެ. އެކަމަކު މިހާރު ހުރި ވަސީލަތްތަކާއެކު އެކެޑަމީއެއް ހިންގައިގެން ކުލަބަށް ފައިސާ ވަންނާނެ ގޮތެއް ނުފެންނަ ކަމަށްވެސް ގައުމީ ފުޓްބޯޅަ ޓީމަށްވެސް ކުޅުނު ކުރީގެ ފޯވާޑް އިއްލެ ބުންޏެވެ.