އިނގިރޭސި ޕްރިމިއާ ލީގުގައި ރޭ ފަސޭހަކަމާއެކު ޗެލްސީ ބަލިކޮށް ލިވަޕޫލުން ތާވަލުގެ އެއްވަނައިގައި ލީޑު ދަމަހައްޓައިފިއެވެ.
އަމިއްލަ ދަނޑުގައި ކުޅުނު މެޗުން ލިވަޕޫލް މޮޅުވީ 4-1 ގެ ނަތީޖާއަކުންނެވެ.
މި މެޗުގައި ލިވަޕޫލުން މޮޅު ކުޅުމެއް ދެއްކިއިރު، މެޗުގެ 23 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. ކޮނާ ބްރެޑްލީގެ އެހީއާއެކު މި ލަނޑު އެ ޓީމަށް ކާމިޔާބުކޮށްދިނީ ޑިއޯގޯ ޖޮޓާއެވެ. އަދި މެޗުގެ 39 ވަނަ މިނެޓުގައި ބްރެޑްލީ ވަނީ ލަނޑެއް ޖަހައި، ލިވަޕޫލުގެ ލީޑު ފުޅާކޮށްދީފައެވެ. މިއީ ޒުވާން ޑިފެންޑަރު ލިވަޕޫލަށް ޖަހައިދިން ފުރަތަމަ ލަނޑެވެ.
މި މެޗުގެ ފުރަތަމަ ހާފު ނިމުމުގެ ކުރިން ލިވަޕޫލަށް ވަނީ ތިންވަނަ ލަނޑެއް ޖަހަން ޕެނަލްޓީއެއްވެސް ލިބިފައެވެ. އެކަމަކު އެ ޓީމުގެ ޑާވިން ނޫނޭޒް ފޮނުވާލި ޕެނަލްޓީ އަމާޒުވީ ގޯލުގެ އަރިމަތީ ދަނޑިއަށެވެ. މި މެޗުގައި ނޫނޭޒް ގިނަ ހަމަލާތަކެއް އުފެއްދިއިރު، ހަތަރު ހަމަލާއެއް ވަނީ ގޯލުގެ ދަނޑިއަށް އަމާޒުވެފައެވެ.
މި މެޗުގައި ލިވަޕޫލުން ތިންވަނަ ލަނޑެއް ޖެހީ މެޗުގެ 65 ވަނަ މިނެޓުގައެވެ. ބްރެޑްލީ ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ ޑޮމިނިކް ސޮބޯސްލާއިއެވެ. އެކަމަކު މެޗުގެ 71 ވަަނަ މިނެޓުގައި ކްރިސްޓޮފާ އެންކުންކޫ ވަނީ ލަނޑެއް ޖަހައި، ޗެލްސީއަށް އުއްމީދެއް ހޯދައިދީފައެވެ. ނަމަވެސް އޭގެ އަށް މިނެޓު ފަހުން ނޫނޭޒް ދިން ބޯޅައަކުން ލުއިސް ޑިއާޒް ވަނީ ލަނޑެއް ޖަހައި، ލިވަޕޫލުގެ ލީޑު އަލުން ފުޅާކޮށްދީފައެވެ.
މި މޮޅާއެކު ތާވަލުގެ އެއްވަނައިގައި ލިވަޕޫލް އޮތީ ކުޅުނު 22 މެޗުން ލިބުނު 51 ޕޮއިންޓާއެކުއެވެ. އަދި މެޗުން ބަލިވި ޗެލްސީ އަޮތީ ތާވަލުގެ 10 ވަނައިގައި 22 މެޗުން 31 ޕޮއިންޓާއެކުއެވެ.