ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ރިޔާސީ ވަޢުދުތަކުގެ ދަށުން ރާއްޖޭގައި ގާއިމުކުރާ ފުޓްސަލް އަދި ނެޓްބޯޅަ ކޮމްޕްލެކްސް މަސައްކަތުގެ ބިންގާ އަންނަ މަހު އެޅުމަށް ހަމަޖެހިފައިވާ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ދާދި ފަހުން ބޭއްވި "އަހާ" ފޯރަމްގައި ރައްޔިތުންގެ ސުވާލުތަކަށް ޖަވާބުދެއްވަމުން ވަޒީރު ވިދާޅުވީ ފަސް ފުޓްސަލް ދަނޑުގެ މި ކޮމްޕްލެކްސްގެ މަސައްކަތް ޑިޒައިންކޮށް، ހުޅުމާލެ ފޭސް ދޭއްގައި ފުޓްސަލް ކޮމްޕްލެކްސް އާއި ފޭސް އެކެއްގައި ނެޓްބޯޅަ ކޮމްޕްލެކްސް ގާއިމުކުރުމަށް ހަމަޖެހިފައިވާ ކަމަށެވެ. އަދި މި ތަނުގެ ބިންގާ އަންނަ މަހު އެޅިގެންދާއިރު، ރާއްޖޭގައި މިހާތަނަށް އިންޑޯ ފުޓްސަލް ކޮމްޕްލެކްސްއެއް އެޅިފައި ނެތްކަންވެސް ވަޒީރު ވަނީ ފާހަގަކުރައްވާފައެވެ.
"މިދިޔަ 33 އަހަރެއްހާ ދުވަހު ފެންނަނީ މާލޭގައި އެންމެ ކޮމްޕްލެކްސްއެއް، އެއީ ސޯޝަލް ސެންޓަރު. އޭގެ ބަދަލުގައި އަޅުގަނޑުމެން އެބަ އަޅަން ފޭސް ދޭއްގައި ފުޓްސަލް އަދި ފޭސް އެކެއްގައި ނެޓްބޯޅަ ކޮމްޕްލެކްސްއެއް.ޢަބްދުﷲ ރާފިޢު - ކުޅިވަރާއި ހަށިހެޔޮކަމާ ބެހޭ ވަޒީރު
މި ދެ ކޮމްޕެލްކްސް ވެގެންދާނީ މަލްޓި ސްޕޯޓްސް ކުޅެވޭ ގޮތަށް ފަރުމާކުރެވިގެން ތައްޔާރުކުރެވޭ ދެ ތަންކަމަށް ވަޒީރު ވަނީ ފާހަގަކުރައްވާފައެވެ.
ވަޒީރު ވިދާޅުވީ މާލެ ސަރަހައްދުގައި ފުޓްސަލް ދަނޑެއް އެޅުމުގެ މަސައްކަތް ވަރަށް ބާރަށް ކުރިއަށްދާ ކަމަށެވެ. އެ މަސައްކަތުގެ ކޮންސެޕްޓާއި ކުރެހުންވެސް މިހާރު ނިމި، އަންނަ ހޯމަ ދުވަހު އިއުލާންކުރެވިގެންދާނެ ކަމަށްވެސް ވިދާޅުވިއެވެ.
މީގެ ކުރިން ވަޒީރު ވަނީ ކުޅިވަރު ދެ ކޮމްޕްލެކްސް އާއެކު ރާއްޖޭގެ ކުޅިވަރުގެ އިންފްރާސްޓްރަކްޗާއަށް ބޮޑު އިންގިލާބީ ބަދަލެއް އަންނާނެކަން ފާހަގަކުރައްވާފައެވެ.