ރާއްޖޭގައި 23 ފުޓްސަލް ދަނޑެއްގައި މަސައްކަތް މިހާރު ކުރިއަށްދާ ކަމަށާއި، މިހާތަނަށް 86 ދަނޑެއްގެ މަސައްކަތް ނިންމާލާފައިވާ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ދާދި ފަހުން ބޭއްވި "އަހާ" ފޯރަމުގައި ރައްޔިތުންގެ ސުވާލަތަކަށް ޖަވާބުދެއްވަމުން ރާފިޢު ވިދާޅުވީ މުޅި ރާއްޖޭގައި ފުޓްސަލް ދަނޑުތައް މަރާމާތުކުރުމުގެ މަސައްކަތް ކުރިއަށްދާ ކަމަށެވެ. ފުޓްސަލް ދަނޑުގެ މަރާމާތުތަކަށް ބެލިކަމުގައި ވިއަސް ދަނޑެއް އެޅުމަށް ދާ ޚަރަދު މަރާމާތްކުރުމަށްދާ ކަންވެސް ރާފިޢު ވަނީ ފާހަގަކުރައްވާފައެވެ.
"މިހެން ދެންނިވިއަސް، މިއީ އަސްލު އައު ދަނޑެއް އެޅުން ކަހަލަ ކަމެއް. ފުޓްސަލް ދަނޑު މަރާމާތު ކުރުމޭ މި ދަންނަވަނީ ސަބްބޭސް އެއްކޮށް ހަދާފައި، ޓާފްވެސް އަޅާފައި، ގިނަ ފަހަރަށް ފެންސުވެސް އައުކުރަން ޖެހިފަ އޮންނަނީ.ޢަބްދުﷲ ރާފިޢު - ކުޅިވަރާއި ހަށިހެޔޮކަމާ ބެހޭ ވަޒީރު
މި ވަގުތު 23 ދަނޑެއްގެ މަސައްކަތް ކުރިއަށްދާއިރު، ސަރުކާރުން ދަނީ ރާއްޖޭގެ ކުޅިވަރު އިންފްރާސްޓްރަކްޗާއަށް އިންގިލާބީ ބަދަލެއް ގެނެވޭވަރުގެ މަޝްރޫއެއް ކަމަށްވާ ފުޓްސަލް އިންޑޯ އާއި ނެޓްބޯލް ކޮމްޕްލެކްސްގެ މަސައްކަތް ބާރަށް ކުރިއަށްގެންދަމުންނެވެ.