މި އަހަރު ރާއްޖޭގައި ބައިނަލްއަގުވާމީ ތިން ވޮލީބޯޅަ މުބާރާތެއް ބޭއްވުމަށް ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) އިން ތާވަލުކޮށްފައިވާ ކަމަށް އެ ޖަމުއިއްޔާގެ ރައީސް މުޙައްމަދު ލަތީފް ވިދާޅުވެއްޖެއެވެ.
ރާއްޖޭގައި ބާއްވަން ނިންމާފައިވާ ތިން މުބާރާތަކީ 20 އަހަރުން ދަށުގެ ބައިނަލްއަޤްވާމީ ވޮލީ މުބާރާތަކާއި ކާވާ ޗެލެންޖް ކަޕުގެ އިތުރުން ކާވާ ކުލަބް ޗެމްޕިއަންޝިޕެވެ.
ރާއްޖޭގެ ވޮލިބޯޅަ ކުރިއެރުވުމުގެ ގޮތުން ހާއްސަކޮށް ދިވެހި ވޮލީގައި ހަރަކާތްތެރިވާ ޒުވާން ކުޅުންތެރިން ފުރުސަތު ފަހިކޮށްދިނުމުގެ ގޮތުން ބައިނަލްއަޤްވާމީ ގިނަ ވޮލީ މުބާރާތްތަކެއް ކާވާއިން މި އަހަރު ތާވަލުކޮށްފައިވާ ކަމަށް ލަތީފް ވިދާޅުވިއެވެ.
ޕީއެސްއެމުން ގެނެސްދޭ "ކުޅިވަރު ވިންދު" ޕްރޮގްރާމްގައި ވާހަކަދައްކަވަމުން ދާދިފަހުން އޭވީސީގެ ޒޯނަލް ނައިބު ރައީސްކަމަށް ޢައްޔަނުކުރެވުނު ލަތީފް ވިދާޅުވީ އަންހެން ވޮލީ ކުރިއެރުވުމަކީ ސަރަހައްދީ ޖަމުޢިއްޔާތަކުން ވަރަށް ބޮޑަށް އަމާޒު ހިފާފައިވާ ކަމެއް ކަމަށާއި، އޭގެދަށުން މި އަހަރު ރާއްޖޭގެ އަންހެން ކުދިންނަށް ހާއްސަކޮށްގެން ކާވާއިން 20 އަހަރުން ދަށުގެ ބައިނަލްއަޤްވާމީ ވޮލީ މުބާރާތެއް ތާވަލުކޮށްފައިވާ ކަމަށެވެ.
މިހާރު މުބާރާތާއި ގުޅިގެން އިދާރީ މަސައްކަތްތައް ވަރަށް ބާރަށް ކުރިއަށްދާކަމަށް ލަތީފް ވިދާޅުވިއެވެ. މީގެ އިތުރުން ކާވާއިން މި އަހަރު ސެޕްޓެންބަރު މަހު ކާވާގެ މެންބަރު 9 ގައުމުގެ މެދުގައި ކާވާ ޗެލެންޖް ކަޕު އޮންނާނެ ކަމަށާއި ކާވާ ކުލަބް ޗެމްޕިއަންޝިޕް މި އަހަރު ރާއްޖޭގައި ބޭއްވިގެންދާނެކަމަށް ލަތީފް ވިދާޅުވެއެވެ.
"މި އަހަރަކީ ހާއްސަކޮށް އަންހެން ކަނބަލުންނަށް އަންހެން ވޮލީ ކުޅުންތެރިންނަށް ލިބިގެންދާނެ ވަރަށް ބޮޑު ފުރުސަތުތަކެއް، ގައުމުގައި އަމިއްލަ ސަޕޯޓަރުންގެ ކުރިމަތީގަ، ރަނގަޅު ކުޅުމެއް ދައްކަން، އަޅުގަނޑު ވަރަށް އުންމީދު އެބައޮތް އިރާދަކުރެއްވިއްޔާ އަޅުގަނޑު މުބާރާތް ނުނިންމާނެކަން ހުސްއަތާ.މުޙައްމަދު ލަތީފް - ކާވާގެ ރައީސް
ކާވާ ކުލަބު ޗެމްޕިއަންޝިޕުގައި ރާއްޖޭގެ ދެ ކުލަބަކަށް މުބާރާތުން ފުރުސަތު ލިބިގެންދާނެ ކަމަށް ލަތީފް ވިދާޅުވިއެވެ. މިއަހަރަކީ ރާއްޖޭގައި އަންހެން ވޮލީއަށް ގިނަ ފުރުސަތުތަކެއް ހުރި އަހަރެއް ކަން ފާހަގަކުރަމުން ލަތީފް ވިދާޅުވީ އަމިއްލަ ސަޕޯޓަރުންގެ ކުރިމަތީގައި އަމާޒަކި މެޑަލް ދިވެހި ޓީމުން ހޯދުންކަމަށެވެ