ޕީޕީއެމް/ޕީއެންސީ މަޖިލިސް ޕްރައިމަރީއަށް ފޯމު ހުށައެޅި އެންމެނަށް ވާދަކުރެވޭ ގޮތަށް ރައީސް ނިންމަވައިފި
-
ރައީސް މިގޮތަށް ނިންމެވީ ޝަކުވާތަކަށް ރިޢާޔަތް ކުރެއްވުމަށްފަހު
-
ޕްރައިމަރީ އޮންނާނީ މި މަހުގެ 27 ގައި
-
ޕްރައިމަރީއަށް 354 ފޯމު ވަނީ ހުށަހަޅައިފަ
މާޗު މަހު ބާއްވާ ރައްޔިތުންގެ މަޖިލިސް އިންތިޚާބުގައި، ޕްރޮގްރެސިވް ކޮންގްރެސް ކޯލިޝަންގެ ޕްރައިމަރީގައި ވާދަކުރަން ނަން ހުށަހެޅުއްވި ހުރިހައި އެންމެނަށް އެޕްރައިމަރީގައި ވާދަކުރުމުގެ ފުރުޞަތު ދެއްވުމަށް ކޮންގްރެސް ޕާޓީގެ ރައީސް އަދި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ނިންމަވައިފިއެވެ.
ރައީސް މިގޮތަށް ނިންމެވީ ޕީޕީއެމް/ޕީއެންސީގެ ޓިކެޓު ހޯދުމަށް ޕްރައިމަރީގައި ވާދަކުރުމަށް ފޯމު ހުށަހެޅި ބައެއް ފަރާތްތަކަށް ވާދަނުކުރެވޭނެ އެޕާޓިން އަންގާފައިވުމުން، އެކަމާމެދު އެ ފަރާތްތަކުން ކަންބޮޑުވުން ފާޅުކުރުމުންނެވެ. ކޮންގްރެސް ޕާޓީގެ ޗެއަރޕާސަން ޢަބްދުއްރަހީމް ޢަބްދުﷲ ސޮއިކުރައްވާ ބައެއް މީހުންނަށް ފޮނުއްވެވި ސިޓީގައި އެމީހުންނަށް ޕްރައިމަރީން ފުރުޞަތު ނުދެއްވުމަށް ނިންމެވީ ޕާޓީއަށް ކޮށްދެއްވި ޚިދުމަތްތަކަށް ބެލުމަށްފަހުކަމަށް ބަޔާންކުރައްވާފައިވެއެވެ.
މިކަމާއި ގުޅިގެން ކޮންގްރެސް ޕާޓީގެ ޗެއަރޕާސަން "އެކްސް"ގައި ކުރެއްވި ޕޯސްޓެއްގައި ވިދާޅުވީ ޕީ.ޕީ.އެމް/ޕީ.އެން.ސީގެ ޕްރައިމަރީގައި ވާދަކުރައްވަން ނަން ހުށަހެޅުއްވި ބައެއް ބޭފުޅުންނަށް ކުރިމަތި ނުލެވޭގޮތަށް ނިންމުމާ ގުޅިގެން ހުށަހެޅުނު ޝަކުވާތަކަށް ރިޢާޔަތް ކުރެއްވުމަށްފަހު، ޕްރައިމަރީގައި ވާދަކުރަން ނަން ހުށަހެޅުއްވި ހުރިހައި ބޭފުޅުންނަށް ވާދަކުރެއްވޭގޮތަށް ޕްރައިމަރީ ބާއްވަން ޕާޓީގެ ރައީސް، އަދި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނިންމަވާފައިވާކަމަށެވެ.
ޕީޕީއެމް/ޕީއެންސީ ޕްރައިމަރީ ބޭއްވުމަށް ނިންމާފައިވަނީ މި މަހުގެ 27 ވަނަ ދުވަހުއެވެ. އެ ޕްރައިމަރީގައި ވާދަކުރުމަށް 354 ފޯމު ވަނީ ހުށަހަޅައިފައެވެ.
މަޖިލިސް އިންތިޚާބުގެ ހުރިހާ ދާއިރާއަކަށް ވާދަކުރުމަށް އެ ކޯލިޝަނުން ވަނީ ނިންމާފައެވެ.