އެމްޕީއެލް ދެވަނަ ޑިވިޝަން ފުޓްބޯޅަ މުބާރާތުގެ ގްރޫޕް ބީގައި ދަ ގްރާންޑޭ ސްޕޯޓްސް ކުލަބާ ދެކޮޅަށް ކުޅުނު މެޗު ނިއު ރޭޑިއަންޓް ސްޕޯޓްސް ކުލަބުން ކާމިޔާބުކޮށްފިއެވެ.
ގައުމީ ފުޓްބޯޅަ ދަނޑުގައި މިއަދު ހަވީރު ކުޅުނު މެޗުން ނިއު ރޭޑިއަންޓް މޮޅުވީ 3-0 ގެ ނަތީޖާއަކުންނެވެ.
މި މެޗަކީ އެންމެ ފުރަތަމަ މިދިޔަ ޑިސެމްބަރު މަހުގެ 31 ވަނަ ދުވަހު ކުޅެން ތާވަލުކުރި މެޗެކެވެ. އެކަމަކު ވިއްސާރަވުމުގެ ސަބަބުން އެ މެޗު ފަސްކުރަން ޖެހުނީއެވެ. އަދި މިއީ އެއް އަހަރާއި ފަސް މަސް ދުވަހުގެ ތެރޭގައި ނިއު ރޭޑިއަންޓުން ކުޅުނު ރަސްމީ ފުރަތަމަ މެޗެވެ. އެގޮތުން މި މެޗުގެ ކުރިން މި މަހުގެ 13 ވަނަ ދުވަހު ކުލަބު ޓީނޭޖާ ދެކޮޅަށް ކުޅެން އޮތް މެޗަށް ޓީނޭޖުގެ ކުޅުންތެރިން ހާޒިރުނުވުމުން، އެ މެޗުން ނިއު ރޭޑިއަންޓް މޮޅުވީ ކަމަށް ވަނީ ނިންމާފައެވެ.
މިއަދު ކުޅުނު މެޗު އެއްކޮށް ކަހަލަ ގޮތަކަށް ނިއު ރޭޑިއަންޓުން ޑޮމިނޭޓުކުރިއިރު، އެ ޓީމުން ވަނީ ދަ ގްރާންޑޭގެ ގޯލާ އަމާޒުކޮށް ގިނަ ހަމަލާތަކެއް އުފައްދާފައެވެ. އެ ހަމަލާތަކުގެ ހުރަހަކަށްވީ ދަ ގްރާންޑޭގެ ގޯލްކީޕަރު އަދި އެ ޓީމުގެ ކެޕްޓަން އިސްމާޢީލް ޝިހާމެވެ.
މި މެޗުގައި ނިއު ރޭޑިއަންޓުން ލީޑު ނެގީ މެޗުގެ 23 ވަނަ މިނެޓުގައެވެ. އުޒްބެކިސްތާން މިޑްފީލްޑަރު އުމަރްޔޮނޯފް އަޚްރޮރް ދިން ބޯޅައަކުން މި ލަނޑު ކާމިޔާބުކޮށްދިނީ ގާނާގެ މިޑްފީލްޑަރު އަބޫ ސަނޫނޫއެވެ.
އަދި މި މެޗުގެ ދެވަނަ ހާފު ފަށައިގެން ފުރަތަމަ މިނެޓުގައި ނިއު ރޭޑިއަންޓުން ވަނީ ލީޑު ފުޅާކޮށްފައެވެ. ކެޕްޓަން ޔަސްފާދު ހަބީބު (މުލަކޭ) ދިން ބޯޅައަކުން ގޯލު ކުރިމަތީ ހުހަށްހުރެ މި ލަނޑު ކާމިޔާބުކޮށްދިނީ ގާނާގެ ފޯވާޑް ކޯފީ އޮވޫސޫއެވެ.
އޭގެ ފަހުން މި މެޗުގެ ދެވަނަ ހާފުގައި ބަދަލަކަށް ކުޅެން އެރި ދެ ކުޅުންތެރިން ކަމަށްވާ އަޔާޒް އަޙްމަދާއި އަބްދުﷲ މިދުހަތު ފަހުމީ (ބިޗަޑް) ފޮނުވާލި ހަމަލާތައް ވަނީ ގޯލުގެ އަރިމަތީ ދަނޑިއަށް އަމާޒުވެފައެވެ. އެކަމަކު މެޗު ނިމެން ތިން މިނެޓަށް ވެފައި ވަނިކޮށް އޭރިއާ ބޭރުން ފޮނުވާލި ހަމަލާއަކުން އަޔާޒް ވަނީ ނިއު ރޭޑިއަންޓުގެ ތިންވަނަ ލަނޑު ޖަހައިދީފައެވެ.
މި މޮޅާއެކު ނިއު ރޭޑިއަންޓާއި މި ގްރޫޕުގައި ދެން ހިމެނޭ ލެގޫންސް ސްޕޯޓްސް ކުލަބު އަދި ބީޖީ ސްޕޯޓްސް ކުލަބަށް ވަނީ ހަ ޕޮއިންޓް ލިބިފައެވެ. މި މުބާރާތުގައި ނިއު ރޭޑިއަންޓުން ދެން މެޗެއް ކުޅޭނީ މި މަހުގެ 25 ވަނަ ދުވަހެވެ. އެ ދުވަހު އެ ޓީމު ނުކުންނާނީ ބީޖީއާ ދެކޮޅަށެވެ.