ގަތަރުގައި މިހާރު ކުރިއަށްދާ އޭއެފްސީ އޭޝިއަން ކަޕުގައި ސީރިއާ ބަލިކޮށް ދެވަނަ ބުރުގެ ޖާގައެއް އޮސްޓްރޭލިއާއިން ހޯދިއިރު، އިންޑިއާ ބަލިކޮށް އުޒްބެކިސްތާނުން އުއްމީދު އައުކޮށްފިއެވެ.
ގަތަރުގެ ޖާސިމް ބިން ހަމްދު ސްޓޭޑިއަމުގައި އިއްޔެ ކުޅުނު ގްރޫޕް ބީގެ މެޗުން އޮސްޓްރޭލިއާ މޮޅުވީ ސީރިއާ އަތުން 1-0 ގެ ނަތީޖާއަކުންނެވެ.
ވާދަވެރި ކުޅުމެއް ފެނިގެންދިޔަ މެޗުގައި އޮސްޓްރޭލިއާއިން ގިނައިރު ބޯޅަ ގެންގުޅުނު ނަމަވެސް، ސީރިއާއިން ވަނީ މެޗުގައި ވަރަށް ރަނގަޅު ކުޅުމެއް ދައްކާފައެވެ. މި މެޗުގައި އޮސްޓްރޭލިއާއަށް ލަނޑު ޖަހާނެ މާގިނަ ފުރުސަތުތަކެއް ލިބިގެންގޮސްފައި ނުވާއިރު، އެ ޓީމުން ލީޑު ނަގާފައިވަނީ މެޗުގެ ދެވަނަ ހާފުގައެވެ. މެޗުގެ 59 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ޖެކްސަން އައިވީންއެވެ.
މީގެ އިތުރުން ރޭ މި ގުރޫޕުގައި 3-0 ގެ ނަތީޖާއަކުން އިންޑިއާ ބަލިކޮށް އުޒްބެކިސްތާނުން ވަނީ ދެވަނަ ބުރުގެ އުއްމީދު އައުކޮށްފައެވެ.
މި މެޗުގައި އުޒްބެކިސްތާނުން ތިން ލަނޑުވެސް ޖަހާފައި ވަނީ ފުރަތަމަ ހާފުގައެވެ. އެގޮތުން މެޗު ފަށައިގެން ހަތަރުވަނަ މިނެޓުގައި އުޒްބެކިސްތާނަށް ލީޑު ނަގައިދިނީ އަބޫސްބެކް ފަޒުލާއެފްއެވެ. އަދި މެޗުގެ 18 ވަނަ މިނެޓުގައި އީގޯ ސެރްގީފް ވަނީ އުޒްބެކިސްތާނުގެ ލީޑު ފުޅާކޮށްދީފައެވެ. އޭގެ ފަހުން ފުރަތަމަ ހާފުގެ އިތުރު ވަގުތު ތެރޭގައި ޝެރްދޯފް ނަސްރުލްލާއެފް ވަނީ އުޒްބެކިސްތާނުގެ ތިންވަނަ ލަނޑު ޖަހައިދީފައެވެ.
މި ނަތީޖާތަކާއެކު ކުޅުނު ދެ މެޗުން މޮޅުވެ ހަ ޕޮއިންޓާއެކު އޮސްޓްރޭލިއާއިން ދެވަނަ ބުރުގެ ޖާގައެއް ހޯދިއިރު، އިންޑިއާ ވަނީ ދެ މެޗުން ބަލިވެ މުބާރާތުން ކަޓާފައެވެ. އަންނަ އަންގާރަ ދުވަހު ގުރޫޕުގެ ފަހު މެޗުގައި އުޒްބެކިސްތާން އަތުން ބަލިނުވެ ފަރުޖައްސާލައިގެން އޮސްޓްރޭލިއާއަށް ގުރޫޕުގެ އެއްވަނަ ހޯދުމުގެ ފުރުސަތު އޮތްއިރު، ސިރިއާއިން އިންޑިއާ ބަލިކޮށްގެން ނޫންގޮތަކަށް ދެވަނަ ބުރުގެ ފުރުސަތެއް ނުލިބޭނެއެވެ.
މީގެ އިތުރުން މި މުބާރާތުގެ ގްރޫޕް ސީގައި ރޭ 10 މީހުންނާއެކު ކުޅުނު ޔުނައިޓެޑް އަރަބި އެމިރޭޓްސް (ޔޫއޭއީ) އާ 1-1 ގެ ނަތީޖާއަކުން އެއްވަރުކޮށް ފަލަސްތީނުން ވަނީ މުބާރާތުގައި ފުރަތަމަ ޕޮއިންޓް ހޯދާފައެވެ.