ގައުމީ ބާސްކެޓްބޯޅަ ލީގު 2024 ގެ އަންހެން ޑިވިޝަނުގެ ކުޅުން ރޭ ފެށިއިރު، ކުއީންސް ބާސްކެޓްބޯލް ކުލަބުން ލީގުގެ ފެށުން ރަނގަޅުކޮށްފިއެވެ.
މި އަހަރު ގައުމީ ލީގުގެ އަންހެން ޑިވިޝަނުގެ ކުޅުން ކުރިއަށްދާއިރު، އެންމެ ފަހުން އަންހެން ޑިވިޝަނުގެ ލީގު ބޭއްވީ 2022 ވަނަ އަހަރެވެ. އެ ފަހަރު ފަހު މެޗުގައި ފަސޭހަކަމާއެކު ކުއީންސް ބަލިކޮށް ލީގު ކާމިޔާބުކުރީ ސައިކްލޯން ބާސްކެޓްބޯލް ކްލަބުންނެވެ. އެކަމަކު ދިމާވި އެކި ސަބަބުތަކާ ހުރެ މިދިޔަ އަހަރު ގައުމީ ލީގުގެ އަންހެން ޑިވިޝަން ބާއްވާފައެއް ނުވެއެވެ.
މި ފަހަރުގެ އަންހެން ޑިވިޝަނުގައި ވާދަކުރާ ޓީމުތަކަކީ ކުއީންސް އާއި، ސައިކްލޯންގެ އިތުރުން އެލީޓް ސްޕޯޓްސް ކުލަބު އަދި ލަޔަނެސް ސްޕޯޓްސް ކުލަބެވެ.
ލީގުގެ ކުޅުން ރޭ ފެށިއިރު، ފުރަތަމަ މެޗުގައި ބައްދަލުކުރީ ކުއީންސް އާއި އެލީޓްއެވެ. ފޯރިގަދަ ކުޅުމެއް ފެނިގެންދިޔަ މި މެޗު 82-56 ޕޮއިންޓުން ކާމިޔާބުކުރީ ކުއީންސްއިންނެވެ. މި މެޗުގައި ކުއީންސްގެ ކެޕްޓަން އާމިނަތު ޝިއުރާ އަބްދުލް ބާރީ ވަނީ 18 ޕޮއިންޓް ހޯދައިދީ 10 ރީބައުން ނަގައިދީ ދެ އެސިސްޓް ކޮށްފައެވެ. އަދި އެ ޓީމުގެ ތަޖުރިބާކާރު ކުޅުންތެރިޔާ ފާތިމަތު ރިޝްމާ ވަނީ 10 ޕޮއިންޓް ހޯދައިދީ 14 ރީބައުން ނަގައިދީ ހަތް އެސިސްޓް ކޮށްފައެވެ.
މި އަހަރު ގައުމީ ލީގުގެ އަންހެން ޑިވިޝަނުގައި ކުޅުނު ފުރަތަމަ މެޗު ކުއީންސްއިން ކާމިޔާބުކުރިއިރު، އެ ޓީމުން އެންމެ ފަހުން ގައުމީ ލީގު ކާމިޔާބުކޮށްފައިވަނީ 2020 ވަނަ އަހަރެވެ.