އޭއެފްސީ އޭޝިއަން ކަޕް ފުޓްބޯޅަ މުބާރާތުގެ ދެވަނަ ބުރުގެ ޖާގައެއް އެންމެ ފަހުގެ ޗެމްޕިއަން ގަތަރުން ހޯދައިފިއެވެ.
ގަތަރުގައި ކުރިއަށްދާ މި މުބާރާތުގައި އިއްޔެ އަލް ބައިތު ސްޓޭޑިއަމުގައި ކުޅުނު މެޗުން އެ ޓީމު މޮޅުވީ ތަޖިކިސްތާން އަތުން 1-0 ގެ ނަތީޖާއަކުންނެވެ.
ގަތަރުން ޑޮމިނޭޓުކޮށްގެން ކުޅުނު މި މެޗުގައި ގިނަ ހަމަލާތަކެއް އެ ޓީމުން ވަނީ ތަޖިކިސްތާނުގެ ގޯލާ އަމާޒުކޮށް ފޮނުވާލާފައެވެ. އެހެން ނަމަވެސް އޭގެ ތެރެއިން އެންމެ ހަމަލާއެއް ގަތަރުން ލަނޑަކަށް ބަދަލުކޮށްލިއިރު، މެޗުގައި އެ ޓީމުން ޖެހި ހަމައެކަނި ލަނޑު މެޗު ފަށައިގެން 17 ވަނަ މިނެޓުގައި އަލްމޯޒް އަލީ ތަނަވަސްކޮށްދިން ފުރުސަތެއްގައި ކާމިޔާބުކޮށްދިނީ މެޗުގައި މޮޅު ކުޅުމެއް ދެއްކި ގަތަރުގެ އަކްރަމް އަފީފީއެވެ.
މި މެޗުގެ ދެވަނަ ހާފުގައި ތަޖިކިސްތާނުގެ އަމްޑޯނީ ކަމަލޯފަށް ސީދާ ރަތް ކާޑެއް ދެއްކުމާ ގުޅިގެން، އެ ޓީމުން މެޗު ނިންމާލީ 10 ކުޅުންތެރިންނާއެކުއެވެ.
މި މޮޅާއެކު ގްރޫޕް އޭގައި ހެނޭ ގަތަރު ވަނީ މުބާރާތުގައި ކުޅުނު ދެ މެޗުންވެސް މޮޅުވެ ހަ ޕޮއިންޓާއެކު ދެވަނަ ބުރުގެ ޖާގައެއް ޔަގީންކޮށްފައެވެ. ގުރޫޕް އޭގެ ފަހު މެޗުތައް އަންނަ ހޯމަ ދުވަހު ކުޅޭއިރު، މި ގުރޫޕްގެ ދެވަނަ ޓީމުގެ ގޮތުގައި ދެވަނަ ބުރުގެ ޖާގައެއް ހޯދަން ލުބުނާނާއި، ތަޖިކިސްތާން އަދި ޗައިނާއަށްވެސް ފުރުސަތު އެބައޮތެވެ. އިއްޔެ މި ގުރޫޕްގައި ޗައިނާ އާއި ލުބްނާން ވާދަކުރި މެޗު ނިމުނީ ލަނޑެއް ނުޖެހި އެއްވަރުވެގެންނެވެ. އެއާއެކު ދެ މެޗުން ހޯދި ދެ ޕޮއިންޓާއެކު ޗައިނާ ދެވަނައިގައި އޮތްއިރު، ލުބުނާނާއި ތަޖަކިސްތާނަށް ލިބެނީ އެންމެ ޕޮއިންޓެކެވެ.