ސަރުކާރުގެ ހަފުތާ 14 ގެ މަގުޗާޓުގައި ހިމެނޭ ކަންތައްތަކުގެ ތެރެއިން، ކުޅިވަރު ވަސީލަތްތައް ރަށްރަށުގައި ފުރިހަމަކުރުމުގެ ޕްރޮގްރާމް ރަސްމީކޮށް ފަށައިފިއެވެ.
ހަފުތާ 14 ގައި ހިމެނޭ ކުޅިވަރު ވައުދުތަކުގެ ތެރެއިން އެންމެ ޗެލެންޖިން ބޮޑު އެއް ވައުދުގެ ގޮތުގައި އޮތީ ރަށްރަށުގައި ނުނިމިހުރި މަޝްރޫއުތައް ނިންމުމުގެ ޕްރޮގްރާމެވެ. މި ޕްރޮގްރާމް ރަސްމީކޮށް ފެށުން ކުރިއަށްދިޔައީ ނ. މާފަރުގައި ތަރައްގީކުރި ވޮލީބޯޅަ އައުޓްޑޯ ކޯޓު ހުޅުވުމުގެ ތެރެއިންނެވެ. މާފަރުގައި ވޮލީ ކޯޓު ހުޅުއްވައިދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢުއެވެ.
އިއްޔެ އޮތް ރަސްމިއްޔާތުގައި ވާހަކަދައްވަމުން ވަޒީރު ވަނީ މި ޕްރޮގްރާމުގެ ދަށުން ރަށްރަށުގައި ނުނިމި ހުރި މަޝްރޫއުތަކުގެ މަސައްކަތްތައް ނިންމުމަށް ބޭނުންވާ ފައިސާ ހަމަޖައްސައި، އެ މަސައްކަތްތައް ނިންމައި ކައުންސިލްތަކާ ހަވާލުކުރެވޭނެ ކަމަށް ވިދާޅުވެފައެވެ. ހަމައެއާއެކު ރަށްރަށަށް އިތުރަށް ބޭނުންވާ ކުޅިވަރު ވަސީލަތްތައް ދެނެގަތުމަށް އެސެސްމަންޓްތައް ހަަދައި، އެ ރަށްރަށުގައި ވަސީލަތްތައް ފުރިހަމަކުރެވޭނެ ކަަމަށްވެސް ވިދާޅުވިއެވެ. ވަޒީރު ވިދާޅުވީ ހުރިހާ ރަށެއްގައިވެސް ކުޅިވަރު ވަސީލަތްތައް ފުރިހަމަކުރުމާއެކު، އެކި ކުޅިވަރުތަކުން ކުރިއަށްދިޔުމުގެ ފުރުސަތު ފަހިކޮށްދިނުމަކީ ސަރުކާރުގެ އެންމެ މުހިންމު އެއް އަމާޒު ކަމަށެވެ.
ކުޅިވަރު ވަސީލަތްތައް ރަށްރަށުގައި ފުރިހަމަ ކުރުމުގެ ޕްރޮގްރާމަކީ ސަރުކާރުގެ ހަފުތާ 14 ގެ ވައުދުތަކުގެ ތެރެއިން ކުޅިވަރު ވުޒާރާއިން ފުރިހަމަކުރި ދެވަނަ ވައުދެވެ. ހަފުތާ 14 ގެ މަގުޗާޓުގައި ހިމެނޭ ވައުދުތަކުގެ ތެރެއިން ކުޅީވަރާއި ހަށިހެޔޮކަމާ ގުޅުން ހުރި ހަތް ވައުދެއް ހިމެނެއެވެ. އޭގެ ތެރެއިން ދެ ވައުދެއް މިހާރު ވަނީ ފުރިހަމަކޮށްފައެވެ. ކުރިން ފުރިހަމަކުރި ޕްރޮގްރާމަކީ ގައުމީ އަދި ބައިނަލްއަގުވާމީ ކުޅިވަރު ކުޅޭ ތަންތަނުގައި ހުރުން ލާޒިމުކުރާ ސިއްހީ ޚިދުމަތްތައް ދިނުމަށް ބޭނުންވާ ވަސީލަތްތައް ގާއިމުކުރުމުގެ މަސައްކަތެވެ.