ގައުމީ ބާސްކެޓްބޯޅަ ލީގު 2024 ގެ ފިރިހެން ފުރަތަމަ ޑިވިޝަނުގެ ކުޅުން ރޭ ފެށިއިރު، ޓީރެކްސް ބާސްކެޓްބޯލް ކުލަބާއި އެންމެ ފަހުގެ ޗެމްޕިއަން ކިންގްސް ބާސްކެޓްބޯލް ކުލަބުން ފެށުން ރަނގަޅުކޮށްފިއެވެ.
މި އަހަރު ގައުމީ ލީގުގެ ފުރަތަމަ ޑިވިޝަނުގެ ކުޅުން ކުރިއަށްދާއިރު، އެންމެ ފަހުން މި މުބާރާތް ބޭއްވީ 2022 ވަނަ އަހަރެވެ. އެ ފަހަރުގެ ފިރިހެން ފުރަތަމަ ޑިވިޝަނުގައި އެއްވެސް މެޗަކުން ބަލިނުވެ ކިންގްސްއިން ވަނީ ގައުމީ ލީގު ދިފާއުކޮށްފައެވެ. އެކަމަކު ދިމާވި އެކި ސަބަބުތަކާ ހުރެ މިދިޔަ އަހަރު ގައުމީ ލީގުގެ ފުރަތަމަ ޑިވިޝަން ބާއްވާފައެއް ނުވެއެވެ.
މި ފަހަރުގެ ފުރަތަމަ ޑިވިޝަނުގައި ވާދަކުރާ ފިރިހެން ޓީމުތަކަކީ ކިންގްސް އާއި ޓީރެކްސްގެ އިތުރުން ސްޓިންގާސް ބާސްކެޓްބޯލް ކުލަބާއި، ރޯޔަލްސް ބާސްކެޓްބޯލް ކުލަބާއި، ރެޑްވިންގްސް އަދި ރެޕްޓާސްއެވެ.
މުބާރާތުގެ ކުޅުން ރޭ ފެށިއިރު، ފުރަތަމަ މެޗުގައި ބައްދަލުކުރީ ޓީރެކްސް އާއި ސްޓިންގާސްއެވެ. މި މެޗު ފަސޭހަކަމާއެކު 137-46 ޕޮއިންޓުން ކާމިޔާބުކުރީ ޓީރެކްސްއެވެ. މި މެޗުގައި ޓީރެކްސްގެ އިސްމާޢީލް ވިލްދާން ޔޫސުފް ވަނީ 33 ޕޮއިންޓް ހޯދައިދީ ހަތް ރީބައުން ނަގައިދީ ފަސް އެސިސްޓް ކޮށްފައެވެ.
މީގެ އިތުރުން މި މުބާރާތުގައި ރޭ ކުޅުނު ދެވަނަ މެޗުގައި ބައްދަލުކުރީ އެންމެ ފަހުގެ ޗެމްޕިއަން ކިންގްސް އާއި ރޯޔަލްސްއެވެ. މި މެޗު ފަސޭހަކަމާއެކު 125-42 ޕޮއިންޓުން ކާމިޔާބުކުރީ ކިންގްސްއެވެ. މި މެޗުގައި ކިންގްސްގެ އަބްދުﷲ އަމްޒަރު މުޙައްމަދު ވަނީ 27 ޕޮއިންޓް ހޯދައިދީ 17 ރީބައުން ނަގައިދީ ދެ އެސިސްޓް ކޮށްފައެވެ.
މި އަހަރު ގައުމީ ލީގުގެ ފުރަތަމަ ޑިވިޝަނުގެ ކުޅުން ރޭ ފެށިއިރު، ބާސްކެޓްބޯޅަ ސީޒަން ފެށުމުގެ ގޮތުން މިދިޔަ ހޯމަ ދުވަހުގެރޭ ވަނީ ފުރަތަމަ ޑިވިޝަނަށް ނިސްބަތްވާ ޓީމުތަކުގެ ކުޅުންތެރިންގެ މެދުގައި ޚާއްސަ އެގްޒިބިޝަން މެޗެއްވެސް ކުޅެފައެވެ.