ފީފާއިން ހޮވާ އަހަރުގެ އެންމެ މޮޅު ފިރިހެން ފުޓްބޯޅަ ކުޅުންތެރިޔާގެ މަގާމު މި ފަހަރުވެސް އާޖެންޓީނާގެ ކެޕްޓަން ލިއޮނެލް މެސީ ހޯދައިފިއެވެ.
މިއީ މި އެވޯޑް މެސީ ހޯދި ތިންވަނަ ފަހަރެވެ. އެގޮތުން މެސީ ވަނީ މި އަހަރުގެ އިތުރުން 2019 އަދި 2022 ވަނަ އަހަރު މި އެވޯޑު ހާސިލުކޮށްފައެވެ.
މި ފަހަރު މެސީ އެވޯޑު ހޯދީ މެންޗެސްޓާ ސިޓީއަށް ކުޅެމުން އަންނަ ނޯވޭގެ ފޯވާޑް އާލިން ބްރައުޓް ހާލަންޑާއި ޕީއެސްޖީއަށް ކުޅެމުން އަންނަ ފްރާންސްގެ ތަރި ކީލިއަން އެމްބާޕޭއެވެ. މެސީ އާއި ހާލަންޑަށް އެއްވަރަށް ޕޮއިންޓް ލިބުނު ނަމަވެސް، މެސީއަށް އެވޯޑް ދޭން ނިންމީ ގައުމީ ޓީމުތަކުގެ ކެޕްޓަނުންގެ ވޯޓު މެސީއަށް ގިނަވުމުންނެވެ.
ރޭ ބޭއްވި ހަފުލާއަށް މެސީ އާއި، ހާލަންޑް އަދި އެމްބާޕޭއަށްވެސް ހާޒިރުނުވެވޭތީީ، ޓްރޮފީއާ ހަވާލުވީ އެ ޝޯގެ ހޯސްޓަކަށް ހުރި ފްރާންސްގެ ލެޖެންޑް ތިއަރީ އޮންރީއެވެ.
ފީފާ ދަ ބެސްޓް އެވޯޑް މެސީ ހޯދިއިރު، މިދިޔަ އަހަރު މެސީ ވަނީ ފްރާންސް ފުޓްބޯޅަ މަޖައްލާއިން ދޭ ބަލޮންޑޯ އެވޯޑް އަށްވަނަ ފަހަރަށް ކާމިޔާބުކޮށްފައެވެ. މެސީ އަކީ މި އެވޯޑް އެންމެ ގިނައިން ހޯދާފައިވާ ކުޅުންތެރިޔާއެވެ.
ފީފާ ދަ ބެސްޓް އެވޯޑުގައި އެންމެ މޮޅު ކޯޗުގެ މަގާމު ސިޓީގެ ޕެޕް ގާޑިއޯލާ ހޯދިއިރު، އެންމެ މޮޅު ގޯލްކީޕަރަކީ ސިޓީއަށް ކުޅެމުން އަންނަ ބްރެޒިލުގެ ކީޕަރު އެޑަސަންއެވެ. އަދި އެންމެ މޮޅު އަންހެން ކުޅުންތެރިޔަކީ ބާސެލޯނާއަށް ކުޅެމުން އަންނަ ސްޕެއިންގެ މިޑްފީލްޑަރު އައިޓާނާ ބޮންމަޓީއެވެ. އެންމެ މޮޅު އަންހެން ކޯޗަކީ އިންގްލަންޑުގެ ސަރީނާ ވައިގްމަންއެވެ.