މި އަހަރުގެ ބާސްކެޓްބޯޅަ ސީޒަން ފެށުމުގެ ގޮތުން ފުރަތަމަ ޑިވިޝަނަށް ނިސްބަތްވާ ޓީމުތަކުގެ ކުޅުންތެރިންގެ މެދުގައި ޚާއްސަ އެގްޒިބިޝަން މެޗެއް ކުޅެފިއެވެ.
މި މެޗު ޝަރަފްވެރިކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ. މީގެ އިތުރުން ކުޅިވަރާއި ހަށިހެޔޮކަމާއި ބެހޭ ވަޒީރު ޢަބްދުﷲ ރާފިޢު އާއި ކޮމިޝަނަރ އޮފް ސްޕޯޓްސް މުޙައްމަދު ޠަލާލްވެސް ބައިވެރިވެވަޑައިގެންނެވިއެވެ.
އެގްޒިބިޝަން މެޗުގައި ކުޅުނު ދެ ޓީމުގައި ހިމެނެނީ ހަ ޓީމަށް ނިސްބަތްވާ ކުޅުންތެރިންނެވެ. މި ހަ ޓީމު ވަނީ ދެ ބަޔަކަށް ބަހާލާފައެވެ. އެގޮތުން ޓީމު އޭގައި ހިމެނުނީ ސްޓިންގާސް ބީސީ އާއި ކިންގްސް ބީސީ އަދި ރެޑްވިންގްސްގެ ކުޅުންތެރިންނެވެ. އަދި ޓީމު ބީގައި ހިމެނުނީ ރެޕްޓާސް ބީސީ އާއި ޓީރެކްސް ބީސީ އަދި ރޯޔަލްސްގެ ކުޅުންތެރިންނެވެ.
ގައުމީ ބާސްކެޓްބޯޅަ ލީގުގެ އެއްވަނަ ޑިވިޝަން މާދަމާ ހަމަޖެހިފައިވާއިރު، އެއްވަނަ ޑިވިޝަންގައި ވާދަކުރާ ފިރިހެން ޓީމުތަކަކީ ޓީރެކްސް އާއި، ސްޓިންގާސް އާއި، ކިންގްސް އާއި، ރޯޔަލްސް އާއި، ރެޑްވިންގްސް އަދި ރެޕްޓާސްއެވެ. މުބާރާތުގެ އަންހެން ޑިވިޝަން މެޗުތައް ފެށުމަށް ތާވަލުކޮށްފައިވަނީ ބުރާސްފަތި ދުވަހެވެ. އަންހެން ޑިވިޝަންގައި ވާދަކުރާ ޓީމުތަކަކީ ކުއީންސް އާއި، އެލީޓް އާއި، ސައިކްލޯން އަދި ލަޔަނެސްއެވެ.