އޭޝިއަން ވޮލީބޯލް ކޮންފަޑެރޭޝަން (އޭވީސީ) ގެ އެގްޒެކުޓިވް ޒޯނަލް ނައިބު ރައީސްކަމަށް ރާއްޖޭގެ ވޮލީބޯލް އެސޯސިއޭޝަނުގެ ކުރީގެ ރައީސް އަދި މިހާރު ސެންޓްރަލް އޭޝިއާ ވޮލީބޯލް އެސޯސިއޭޝަން (ކާވާ) ގެ ރައީސް މުޙައްމަދު ލަތީފް އައްޔަންކުރައްވައިފިއެވެ.
މި މަގާމަށް ލަތީފް އައްޔަންކުރެއްވިއިރު، އޭނާ ވަނީ ކާވާގެ ރައީސްކަމުގެ ދެވަނަ ދައުރަކަށް ކުރިމަތިލައްވާނެ ކަމަށް މީގެ ކުރިން ވިދާޅުވެފައެވެ. ވޮލީގައި ރާއްޖެ ހިމެނޭ ސަރަހައްދުގެ އެންމެ އިސްފަރާތަކީ އޭވީސީއެވެ. އޭވީސީން ވަނީ އެ ޖަމުއިއްޔާގެ ކަންތައްތައް ކުރިއަށްގެންދިއުމަށް ފަސް ޒޯނަކަށް ބަހާލާފައެވެ.
ސެންޓްރަލް އޭޝިއާގެ ޒޯނަލްއަކީ ދެކުނު އޭޝިއާގެ ހަރަކާތްތައް ކުރިއަށްގެންދާނެ އެންމެ އިސްފަރާތެވެ. މި ހުރިހާ ޒޯންތައް އޭވީސީގެ ބެލުމުގެ ދަށުން ހަރަކާތްތެރިވާއިރު، ވޮލީގެ މައި އިދާރާއަކީ އެފްއައިވީބީއެވެ. ލަތީފް ވަނީ 2017 ވަނަ އަހަރުވެސް އޭވީސީގެ ބޯޑަށް އިންތިޙާބުވެވަޑައިގެންފައެވެ.
އޭވީސީގެ އެގްޒެކުޓިވް ޒޯނަލްގެ ނައިބު ރައީސްގެ މަގާމާއެކު ލަތީފަށް ވަނީ އޭވީސީގެ ބޯޑް އޮފް އެޑްމިނިސްޓްރޭޝަނުގެ މެންބަރުކަމާއި، އޭވީސީގެ ހިންގާ ކޮމިޓީގެ މެންބަރުކަންވެސް ލިބިވަޑައިގެންފައެވެ. ލަތީފުގެ ކުރިން އޭވީސީގެ ހިންގާ ކޮމިޓީއަށް އެންމެ ފުރަތަމަ ހޮވިވަޑައިގެންނެވި ދިވެހި ބޭފުޅަކީ ވޮލީބޯލް އެސޯސިއޭޝަނުގެ ކުރީގެ ރައީސް މުޙައްމަދު ރިޔާޒެވެ.
"ޕީއެސްއެމް ސްޕޯޓްސް" އާ ވާހަކަދައްކަމުން ލަތީފް ވިދާޅުވީ އޭވީސީގެ އެގްޒެކުޓިވް ޒޯނަލްގެ ނައިބު ރައީސްގެ މަގާމު ލިބުމަކީ ރާއްޖޭގެ ވޮލީއަށް ލިބިގެންދިޔަ ކާމިޔާބީއެއް ކަމަށެވެ. އަދި މިއާއެކު ރާއްޖޭގެ ވޮލީ ކުރިއަރުވަން އިތުރު މަސައްކަތްތަކެއް ކުރައްވާނެ ކަމަށްވެސް ވިދާޅުވިއެވެ.
މީގެ ކުރިން ލަތީފް ވަނީ 2020 ވަނަ އަހަރު ކާވާގެ ރައީސްކަމަށް ފުރިހަމަ އަގުލަބިއްޔަތާއެކު އިންތިޚާބުކުރައްވާފައެވެ. ކާވާއަކީ ސެންޓްރަލް އޭޝިއާގެ ފަސް ގައުމާއި އަފްޣާނިސްތާނާއެކު ސައުތު އޭޝިއާގެ އަށް ގައުމު ހިމެނޭހެން 14 ގައުމެއްގެ މައްޗަށް އެކުލެވޭ ޖަމުއިއްޔާއެކެވެ. އެ އެސޯސިއޭޝަނަކީ ވޮލީބޯޅައިގެ ދުނިޔޭގެ ފެޑެރޭޝަން، އެފްއައިވީބީން އުފައްދާފައިވާ 22 ޒޯނަލް އެސޯސިއޭޝަންގެ ތެރެއިން އެއް އެސޯސިއޭޝަނެވެ.