މިދިޔަ 2015 އަހަރުގެ ނޮވެމްބަރު މަހުގެ 05 ވަނަ ދުވަހު ލަންކާގައި، ހ. ހަންޑްރެޑް ފްލާވަރ، ޙުސައިން ރަޒީން (29)، އަނިޔާތަކާއެކު މަރުވެފައި އޮއްވާ ފެނުނު މައްސަލާގައި މާލެއިން މީހަކު ހައްޔަރުކޮށްފިއެވެ.
މި މައްސަލައާ ގުޅިގެން ކޯޓު އަމުރެއްގެ ދަށުން ހައްޔަރުކޮށްފައިވަނީ 28 އަހަރުގެ ދިވެހި ފިރިހެނެއް ކަމަށް ފުލުހުން ވިދާޅުވެއެވެ. އަދި މި މީހާގެ ބަންދަށް 15 ދުވަސް ކޯޓުން ދެއްވާފައިވާކަމަށްވެސް ފުލުހުން މަޢުލޫމާތުދެއްވައެވެ.
މިކަމާ ގުޅޭގޮތުން މަޢުލޫމާތު ދެއްވަމުން ކްރައިމް އިންވެސްޓިގޭޝަން ކޮމާންޑްގެ ޑެޕިއުޓީ ހެޑް ޗީފް ސުޕްރިންޓެންޑެންޓް އޮފް ޕޮލިސް މުޙައްމަދު ރިޔާޟް ވިދާޅުވީ ޙުސައިން ރަޒީންގެ މަރުގެ މައްސަލައާ ގުޅިގެން މިއަދު މެންދުރު މީހަކު ހައްޔަރުކޮށްފައިވަނީ ދިވެހި ފުލުހުން ރާއްޖޭގަ ކުރަމުންދާ ތަހުޤީގަށް ލިބިފައިވާ ހެއްކާއި މަޢުލޫމާތުގެ މައްޗަށް ބިނާކޮށް ކަމަށެވެ.
“ޙުސައިން ރަޒީން މަރާލުމުގަ ބައިވެރިވި މީހުންގެ ތެރެއިން ރާއްޖޭގަ މިވަގުތު ތިބި މީހުންގެ ބައި، ލަންކާ ފުލުހުންނާ ގުޅިގެން މިދަނީ ތަހުގީގު ކުރަމުން” ޗީފް އެސްޕީ މުޙައްމަދު ރިޔާޟް ވިދާޅުވިއެވެ. މި މައްސަލައިގެ ތަަހުޤީގަށް ދިވެހި ފުލުހުންގެ ޓީމެއް ލަންކާއަށް ގޮސް ސްރީލަންކާގެ ފުލުހުންނާއެކު ހަރަކާތްތެރިވެފައިވެއެވެ.